ޚަބަރު
އިޓަލީވިލާތުގައި ރާއްޖޭގެ އެމްބަސީ އެއް ގާއިމްކުރަނީ!
ޚާރިޖީ ވުޒާރާ ހިންގާ ފަތުޙުﷲ ޖަމީލް ބިލްޑިންގ.
އިޓަލީވިލާތުގައި ރާއްޖޭގައި އެމްބަސީ އެއް ގާއިމްކުރުމުގެ މަސައްކަތް ކުރައްވަމުންދާ ކަމަށް ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވިދާޅުވެއްޖެއެވެ.
ރައީސް ޑރ މުޢިއްޒު މިހެން ވިދާޅުވީ ޖުމްހޫރީ ދުވަހުގެ މުނާސަބަތުގައި ބޭއްވި ޖަލްސާގައި ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވީ، މިސަރުކާރުގެ އަމާޒަކީ ހުރިހާ ޤައުމަކާއެކުވެސް ގާތް ގުޅުމެއް ބާއްވައި ޚާރިޖީ ގުޅުން ވަރުގަދަކުރެއްވުންކަމަށެވެ. އެގޮތުން ބޭރުގެ ޤައުމުތަކުގައި އެމްބަސީތައް ހުޅުވުމުގެ މަސައްކަތް ކުރައްވަމުން ގެންދަވާކަމަށްވެސް އެމަނިކުފާނު ވިދާޅުވިއެވެ.
ރައީސް ވިދާޅުވީ، އިޓަލީވިލާތުގައި ރާއްޖޭގެ އެމްބަސީއެއް ހުޅުވުމަށް މިހާރު ހުއްދަ ލިބިފައިވާކަމަށާއި، އެހެންކަމުން އެ ޤައުމުގައި ރާއްޖޭގެ އެމްބަސީއެއް ހުޅުވުމުގެ މަސައްކަތް ކުރައްވަމުން ގެންދަވާކަމަށް ވިދާޅުވިއެވެ. ރައީސް ވިދާޅުވީ މި ނިމިގެންދާ އަހަރުގެ ތެރޭގައި ތުރުކީވިލާތުގައި އެމްބަސީއެއް ހުޅުވައިފައިވާ ކަމަށާއި،އިޓަލީވިލާތުގައި އެމްބަސީއެއް ހުޅުވަން މިހާރު ހުއްދަލިބިފައިވާ ކަމަށެވެ.
“އަޅުގަނޑުމެން އެކަމަށް ހުށައަޅައިގެން އިރާދަކުރެއްވިއްޔާ އަޅުގަނޑުމެންގެ ޓޫރިޒަމަށް ވަރަށް މުހިންމު ވީމަ އެކަން ކުރަން ނިންމީ. އަދި ހަމަ އެއާއެކީގައި އަޅުގަނޑުމެންގެ ވިޔަފާރިއަށް މުހިންމު ޤައުމުތަކާ އެކީގައިވެސް އަޅުގަނޑުމެން ބޭނުންތެރި ތަންތަނުގައި ޤައުމަށް ފައިދާހުރި ތަންތަނުގައި އެމްބަސީތަކާއި ހައި ކޮމިޝަންތައް ހުޅުވާނަން." ރައީސް ޑރ މުޙައްމަދު މުޢިއްޒު ވިދާޅުވިއެވެ.
އިޓަލީވިލާތަކީ ރާއްޖެއަށް ގިނަ އަދަދަކަށް ފަތުރުވެރިން އަންނަ ޤައުމެކެވެ. އެ ޤައުމުން މިހާތަނަށް ރާއްޖެއަށް 116،195 ފަތުރުވެރިން ވަނީ އައިސްފައެވެ.ރާއްޖޭން ބޭރުގެ ޤައުމުތަކުގައި ރާއްޖޭގެ 16 އެމްބަސީއާއި ހައިކޮމިޝަންތައް މިހާރުވެސް ވަނީ ހުޅުވާފައެވެ.
