ޚަބަރު
ރައްޔިތުން އައްޔަނުކުރާ ކޮންމެ މީހަކީ ރައްޔިތުން ބޭނުންވެއްޖެ ހިނދެއްގައި މަޤާމުން ދުރުކުރެވެންޖެހޭނެ މީހެއް!
ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޖުމްހޫރީދުވަހުގެ ޖަލްސާގައި
ރައްޔިތުން އައްޔަނުކުރާ ކޮންމެ މީހަކީ ރައްޔިތުން ބޭނުންވެއްޖެ ކޮންމެ ހިނދެއްގައި މަޤާމުން ދުރުކުރެވެންޖެހޭނެ މީހެއްކަމަށް ރައްޔިތުންގެ މަޖިލީހުގެ ރައީސް ޢަބްދުރަޙީމް ޢަބްދުﷲ ވިދާޅުވެއްޖެއެވެ.
މަޖިލީހުގެ ރައީސް ޢަބްދުއްރަޙީމް މިހެން ވިދާޅުވީ ޖުމްހޫރީ ދުވަހުގެ މުނާސަބަތުގައި ދައުލަތުގެ ޓީވީ އަށް ދެއްވެވި ޚާއްސަ އިންޓަރވިއުއެއްގައެވެ.
ޢަބްދުއްރަޙީމް ވިދާޅުވީ ޤާނޫނު އަސާސީން ލިބިދޭ ބާރުން ޤައުމުގެ އެންމެ މަތީ ވެރިޔާ މަޤާމުން ދުރުކުރެވޭނެ ގޮތް ފަހިކޮށްދީފައި އޮތްނައިރު، އޭގެ ދަށުން ރައްޔިތުން އިންތިޚާބުކުރާ އެހެން މެންބަރުންވެސް މަޤާމުން ވަކިކުރެވޭނެ ފުރުޞަތު ނެތުމަކީ މި ޒަމާނަށް ފައިހަމަކުރާ އުސޫލެއް ނޫންކަމަށެވެ.
މަޖިލީހުގެ ރައީސް ޢަބްދުއްރަޙީމް ވިދާޅުވީ ޤާނޫނުތަކާއި ސިޔާސަތުތައް އެކުލަވާލާލުމުގައި ވަގުތާ ޙާލަތާއި، ޒަމާނަށް އަންނަ ބަދަލުތަކަށް ރިޢާޔަތްކުރަންޖެހޭކަމަށެވެ. އެގޮތުން ރާއްޖޭގެ މިހާރު ހުރި ޤާނޫނުތަކަށްވެސް އިސްލާހު ގެންނަންޖެހޭ މުހިންމު ކަންތައްތަކެއް ހުރިކަމަށް ވެސް އެމަނިކުފާނު ވިދާޅުވިއެވެ.
އެންމެ ބޮޑު ބަދަލެއް ގެންނަންޖެހޭ ކަމެއްގެ ގޮތުގައި ޢަބްދުއްރަޙީމް ފާހަގަކުރެއްވެވި ކަމަކީ ރައްޔިތުން އައްޔަނުކުރާ ކޮންމެ މަޤާމެއްގައި ހުންނަ މީހަކީ، ރައްޔިތުން ބޭނުންވެއްޖެ ޙާލަތުގައި ދުރުކުރެވޭނެ ފުރުޞަތު ޤާނޫން އޮންނަޖެހޭ ކަމެއްގެ ގޮތުގައި ފާހަގަކުރެއްވިއެވެ.
މަޖިލީހުގެ ރައީސް އަދި ފޮނަދޫ ދާއިރަގެ މެމްބަރު ޢަބްދުއްރަޙީމް ވިދާޅުވީ ރައްޔިތުން އިންތިޚާބުކުރާ ޤައުމުގެ އެންމެ މަތީ ވެރިޔާ، ރައީސުލްޖުމްހޫރިއްޔާ ވަކިކުރުމުގެ ބާރު ރައްޔިތުންގެ މަޖިލީހަށް އޮންނަކަމަށެވެ.
އަދި ޤައުމުގެ އެންމެ މަތީ ވެރިޔާ ވަކިކުރުމުގެ ގޮތް އޮންނައިރު، އެއަށްވުރެ ކުޑަ އާބާދީއެއްގެ ރައްޔިތުން ވޯޓުދީ ހޮވާ މީހުންނަށްވެސް، މި އުސޫލުން ޢަމަލުކުރެވޭނެ ގޮތެއް އޮންނަންޖެހޭކަމަށް މަޖިލީހުގެ ރައީސް ވިދާޅުވިއެވެ. ޢަބްދުއްރަޙީމް ވިދާޅުވީ މުޅި ރައްޔިތުން އައްޔަނުކުރާ ވެރިޔާ ބަދަލުކުރެވޭނަމަ، 5000 މީހުން ވޯޓުދީ އިންތިޚާބުރާ މީހާ، އެފަދަ ޙާލަތެއް ކުރިމަތިވެއްޖެނަމަ ވަކިކުރެވޭނެ ގޮތް ޤާނޫގައި ލިޔެވިފައި އޮންނަންޖެހޭކަމަށެވެ.
