ކުރީގެ ސަރުކާރުން 8 ބިލިއަން ރުފިޔާ ޗާޕުކޮށް ވިއްކާލީ ޤައުމުގެ މުސްތަޤްބަލު

އެމްޑީޕީ ސަރުކާރު އުފެދި، ވަޢުދުތައް ފެނި، "އަހާ ސަހަރޯއޭ" ހިތަށް އެރި އެވެ. "ޖަޒީރާ ރާއްޖެ ހާދަ ތަފާތޭ" އަދި "ކިރިޔާ އޭ ރާއްޖެ ރާއްޖެއަކަށް ވާން މިއުޅެނީ" ހިތާހިތުން ކިޔާލެވުނު ގިނަ ރައްޔިތުންތަކެއް ތިބީ މިއަދު މޮޔަހީވެފައެވެ. ދައްކަން އުޅުނު ބޮޑު މަންޒަރު ތަފާތުވެގެން ދިޔައީ ކިހިނެއްތޯއެވެ؟ ޢަމަލީ ގޮތުން ކަންތައްތައް ހިނގައިދިޔަ ގޮތް ތަފާތުވިއެވެ.

ކުރީގެ ސަރުކާރުން، މައިގަނޑު ގޮތެއްގައި 2020 އާއި 2023 އާ ދެމެދު، ގާތްގަނޑަކަށް 8 ބިލިއަން ރުފިޔާ ޗާޕުކުރިކަމަށް ބުނެވެއެވެ. މިއީ ސަރުކާރުގެ ފައިސާގެ ދައުރު ހިފެހެއްޓުމަށާއި ކޮވިޑް-19ގެ ބަލިމަޑުކަމާ ގުޅިގެން އިޤްތިޞާދަށް ކުރިމަތިވި ދަތިތަކަށް ހައްލު ހޯދުމުގެ ނަމުގައި ކުރެވުނު ކަމެކެވެ. މިސާލަކަށް، 2022 ވަނަ އަހަރު އެކަނި ގާތްގަނޑަކަށް 3.9 ބިލިއަން ރުފިޔާ ޗާޕުކުރެވުނެވެ. މީގެ ބޮޑު ބައެއް ޗާޕުކުރެވުނީ އަހަރުގެ ފަހުކޮޅު، ކުއްލި މާލީ ދަތިތަކަށް ހައްލު ހޯދުމަށް ކަމުގައި ބުނެއެވެ.

އިޤްތިޞާދީ މާހިރުންނާއި މާލީ ތަޖުރިބާކާރުން މިހާ ބޮޑަށް ފައިސާ ޗާޕުކުރުމަށް ބަރޯސާވުމާމެދު ފާޑުކިޔާފައިވެއެވެ. ޚާއްޞަކޮށް ބޭރު ފައިސާގެ ރިޒަރވް މަދު ޙާލަތެއްގައެވެ. އެމީހުން އިންޒާރުދީފައިވަނީ، ބޭރު ފައިސާގެ ރިޒަރވް އިތުރުނުވެ ނުވަތަ އިޤްތިޞާދީ އުފެއްދުންތެރިކަން އިތުރުނުވެ، ބާޒާރުގައި ދައުރުވާ ފައިސާގެ އަދަދު އިތުރުވުމުން ރުފިޔާގެ އަގު ދަށްވެ، އަގުތައް މައްޗަށް ދިއުމާއި، ދިވެހިރާއްޖޭގެ ދަރަނީގެ ޙާލަތު އިތުރަށް ގޯސްވެދާނެ ކަމަށެވެ. 

އެމްޑީޕީގެ ސަރުކާރުން ރައްޔިތުން އިނދަޖައްސާލާ، އަހަރުތަކެއްގެ ދަރަނީގެ ތެރެއަށް ވައްޓާލި އެވެ. ޤައުމު އިނދަޖައްސާލީ ތިޔަހެނެއް ނޫނެވެ. އެމްޑީޕީގެ ސަރުކާރުން ރައްޔިތުންގެ ފައިސާއާ ކުޅެލީ ވިސްނުމެއް ހިޔާލެއް ފިކުރެއް ނެތިއެވެ. 

ޖުމްލަ ގޮތެއްގައި، އެމްޑީޕީގެ މާލީ ސިޔާސަތުތަކުގެ ދުރުރާސްތާގެ އަސަރު އަދިވެސް ވަނީ ޔަޤީންކަމާއެކު ނޭނގޭ ހާލަތެއްގައެވެ. މިހާރު ސަރުކާރުގެ ކުރިމަތީގައިވާ ގޮންޖެހުމަކީ މާލީ ފޯރުންތެރިކަން އަލުން ގެނައުމާއެކު، އިޤްތިޞާދުގެ އަސާސީ މައްސަލަތަކަށް ދެމެހެއްޓެނިވި ހައްލުތަކެއް ހޯދުމެވެ.

ދައުލަތުގެ ހަރަދަށް ޒިންމާވުމުގެ ގާނޫނުގެ ދަށުން މަރުކަޒީ ބޭންކު، އެމްއެމްއޭއިން ސަރުކާރަށް ދަރަނި ނެގޭ މިންވަރު އޮންނަނީ ލިމިޓުކޮށްފައެވެ.

ނަމަވެސް ކޮވިޑްގެ ދުވަސްވަރު ދައުލަތުގެ ހަރަަދަށް ޒިންމާވުމުގެ ގާނޫނުގެ ބައެއް މާއްދާތައް ސަސްޕެންޑް ކުރުމަށް އޭޕްރީލް 2020 ގައި މަޖިލީހުން ފާސްކޮށްފައި ވަނިކޮށް އެ ގާނޫނުގެ ބައެއް މާއްދާތައް ސަސްޕެންޑްކުރި މުއްދަތު ފަހުން ވަނީ އިތުރުކޮށްފައެވެ. 

ރައީސް އިބްރާހީމް މުޙައްމަދު ޞާލިޙްގެ ވެރިކަމުގައި ދައުލަތުގެ ދަރަނި އިންތިހާއަށް އިތުރުވެފައިވާ މިންވަރަކީ ހައިރާންވާންޖެހޭ ކަމެއްނޫނެވެ. 2023 ވަނަ އަހަރު ނިމޭއިރު ދައުލަތުގެ ދަރަނި 98 ބިލިއަން ރުފިޔާއަށް އަރާނެ ކަމަށް ލަފާކުރެވި،  ކޮންމެ ދިވެއްސެއްގެ ބޮލުގައި  180,000 ރުފިޔާގެ ދަރަންޏެއް އެޅުވިއެވެ. އުފަންނުވާ ކުދިންގެ ބޮލުގައިވެސް މިހާރު އެޅިފައިވަނީ ބޮޑު ދަރަންޏެކެވެ. މިއީ އެމްޑީޕީން ދިވެހި ރައްޔިތުންނަށް ދިން "ހަދިޔާ" އެވެ.

ދަރަނި-ޖީޑީޕީ ރޭޝިއޯ 105 އިންސައްތައަށް އަރާނެ ކަމަށް ލަފާކުރެވޭއިރު، މިއީ ދިވެހިރާއްޖެއިން އުފައްދާ މިންވަރަށްވުރެ ބޮޑު އަދަދެއް ދަރަނީގެ ގޮތުގައި އޮތުމެވެ. މިއީ ދިވެހިރާއްޖެ ދަރަނީގެ ވަޅުގަނޑަށް ވެއްޓި، އަރައިގަތުމަށް ބޭނުންވާ ވަގުތު އިތުރުވެގެންދާނެ ކަމެކެވެ. 

މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ކުރީ ސަރުކާރުން ފައިސާ ޗާޕުކުރާތީ ކެމްޕޭނުގެ ތެރޭގައި ވެސް އެކަމަށް ފާޑު ވިދާޅުވެފައެވެ. ރައީސް މުޢިއްޒު ވަނީ، ވެރިކަމަށް އައުމަށް ފަހު އެންމެ ފުރަތަމަ އިސްކަން ދޭނީ ރާއްޖޭގެ ހާރިޖީ ސިޔާސަތަށާއި އިގްތިޞާދީ އަނދަވަޅުން ގައުމު ނަގާ ކޮޅަށް ޖެހުމަށް ކަމަށް ވިދާޅުވެފައެވެ. އެގޮތުން ފައިސާ ޗާޕުކުރަން ފުރުޞަތު ހޯދަން ސަސްޕެންޑް ކޮށްފައިވާ މާއްދާ އުވާލަން ރައްޔިތުންގެ މަޖިލީހަށް ހުށަހަޅުއްވާނެ ކަމަށާއި ފައިސާ ޗާޕު ނުކުރައްވާނެ ކަމަށް މުޢިއްޒު ވަނީ ވިދާޅުވެފައެވެ. އަދި ރައީސް މުޢިއްޒުގެ ވެރިކަމަށް އަހަރަށް ވާން ދާއިރު، ވެރިކަމާއި ހަވާލުވެވަޑައިގެން އިރު ވިދާޅުވިގޮތަށް ފައިސާ ޗާޕް ކުރުން ވަނީ ހުއްޓަވައިލައްވާފައެވެ.