ރާއްޖޭގެ އެކި ރަށްރަށުން 14 ބޭފުޅުން ކުނި މެނޭޖްކުރުމާ ގުޅޭ ތަމްރީނު ޕްރޮގްރާމެއްގައި ބައިވެރިވުމަށް ނިއުދިއްލީއަށް ފުރައިފި

މޯލްޑިވްސް ކްލީން އެންވަޔަރަންމަންޓް ޕްރޮޖެކްޓް (އެމް.ސީ.އީ.ޕީ) ގެ ދަށުން ރާއްޖޭގެ 2، 4 އަދި 5 ވަނަ ޒޯނުގެ އެކި ރަށްރަށުން 14 ބޭފުޅުންނާއި މަޝްރޫޢުގެ މުވައްޒަފުން ހިމެނޭ ވަފުދެއް އިންޑިއާގެ ނިއު ދިއްލީއަށް މިއަދު ފުރައިފިއެވެ. މި ވަފުދު ދަތުރުކުރީ ނިއު ދިއްލީގައި ހުންނަ ޓެރީ ސްކޫލް އޮފް އެޑްވާންސްޑް ސްޓަޑީޒްގައި ކުރިއަށްދާ "ވޭސްޓް މެނޭޖްމަންޓް ސިސްޓަމްސް: އޮޕަރޭޝަން އެންޑް މެއިންޓަނަންސް" އާ ގުޅޭ ތަމްރީނު ޕްރޮގްރާމެއްގައި ބައިވެރިވުމަށެވެ.

މި ވަފުދުގައި ހިމެނެނީ އެމް.ސީ.އީ.ޕީ މަޝްރޫޢުގެ ޕްރޮޖެކްޓް ކޯޑިނޭޓަރާއި ކޮމިއުނިޓީ އެންގޭޖްމަންޓް ކޯޑިނޭޓަރުންގެ އިތުރުން ރަށްރަށުން ހޮވާލެވުނު 14 ބޭފުޅުންނެވެ. ވަފުދު އިންޑިއާއަށް ފުރުމުގެ ކުރިން މިނިސްޓްރީގެ ޑެޕިއުޓީ މިނިސްޓަރާއި ޑިރެކްޓަރ ޖެނެރަލް އަދި އިސް އޮފިޝަލުން ބައްދަލުކޮށް ވަފުދަށް ހެޔޮ އެދުންތައް ފޮނުވައި، މި ފުރުޞަތުގެ ބޭނުން އެންމެ ފުރިހަމައަށް ހިފުމަށް ބާރުއަޅުއްވާފައިވެއެވެ.

ނޮވެމްބަރު 11 އިން 14 އަށް ހިންގޭ މި 4 ދުވަހުގެ ތަމްރީނު ޕްރޮގްރާމަކީ ޓެރީ ސްކޫލް އޮފް އެޑްވާންސްޑް ސްޓަޑީޒްގެ އައި.ސީ.ޑަބްލިއު.އެމް.އާރުގައި ކުރިއަށްދާ ޕްރޮގްރާމެކެވެ. މި ޕްރޮގްރާމުގެ މަޤްޞަދަކީ ބައިވެރިންގެ ކުނި މެނޭޖްކުރުމުގެ ހުނަރު އިތުރުކޮށް، އެ ބޭފުޅުންގެ ރަށްރަށުގައި ތިމާވެށި ރައްކާތެރިކުރުމުގެ މަސައްކަތްތައް އިތުރަށް ހަރުދަނާކުރުމެވެ.

މި ތަމްރީނު ޕްރޮގްރާމުގެ ސަބަބުން ރާއްޖޭގެ ރަށްރަށުގައި ކުނި މެނޭޖްކުރުމުގެ ނިޒާމު ހަރުދަނާވެ، ތިމާވެށި ރައްކާތެރިކުރުމުގެ މަސައްކަތްތައް އިތުރަށް ކުރިއަރައިގެންދާނެ ކަމަށް ބެލެވެއެވެ. އަދި މި ތަޖުރިބާގެ އަލީގައި ބައިވެރިން އެ ބޭފުޅުންގެ ރަށްރަށުގައި ކުނި މެނޭޖްކުރުމުގެ ރަނގަޅު އާދަތައް އަށަގެންނެވުމަށް މަސައްކަތްކުރާނެ ކަމަށް އުންމީދުކުރެވެއެވެ.