ޣައްޒާގެ އަލް-ޝިފާ ހޮސްޕިޓަލުގެ ހަލާކުވެފައިވާ އިމާރާތުގެ ތެރޭގައި "ހިއުމެނިޓީ ކޯހޯޓް" ގެ ޑޮކްޓަރުން ދަސްވެނިވެއްޖެ

އިޒްރާއީލުގެ ހަމަލާތަކުގައި ސުންނާފަތިކޮށްލާފައިވާ ގައްޒާގެ އެންމެ ބޮޑު ހޮސްޕިޓަލް، އަލް-ޝިފާ މެޑިކަލް ކޮމްޕްލެކްސްގެ ކުނިބުނީގެ ތެރޭގައި ފަލަސްތީނުގެ 168 ޑޮކްޓަރަކު މެޑިކަލް ސެޓިފިކޭޝަން ހާސިލްކޮށް ދަސްވެނިވެއްޖެއެވެ.

މި ރަސްމިއްޔާތު ބާއްވާފައިވަނީ ބުރާސްފަތި ދުވަހު، ހަލާކުކޮށްލާފައިވާ ހޮސްޕިޓަލުގެ ކުރިމަތީގައެވެ.

"ހިއުމެނިޓީ ކޯހޯޓް" ގެ ނަމުން ނަންދީފައިވާ މި ޑޮކްޓަރުންނަކީ ފަލަސްތީނަށް ކުރިމަތިވެފައިވާ ހަނގުރާމައާއި، ބަނޑުހައިހޫނުކަމާއި، އަދި މަޖުބޫރުން ހިޖުރަކުރަން ޖެހިފައިވާ ދަތި ހާލަތުގައިވެސް ހޮސްޕިޓަލްތަކުގައި މެދުނުކެނޑި މަސައްކަތް ކުރަމުން ޕަލަސްޓީނިއަން ބޯޑް ސެޓިފިކޭޝަން ފުރިހަމަކުރި ޑޮކްޓަރުންނެވެ. މީގެ ތެރެއިން ބައެއް ޑޮކްޓަރުންނަކީ ހަމަލާތަކުގައި އަނިޔާވެފައިވާ، ހައްޔަރުކުރެވިފައިވާ ނުވަތަ އާއިލާގެ މެންބަރުން ޝަހީދުވެފައިވާ ފަރާތްތަކެވެ.

ޣައްޒާގެ ހެލްތު މިނިސްޓްރީގެ ތަފާސްހިސާބުތަކަށް ބަލާއިރު، މިދިޔަ އަހަރެއްހާ ދުވަހުގެ ތެރޭގައި ފަލަސްތީނުގެ 1,722 ޞިއްޙީ ހިދުމަތްތެރިން ވަނީ ޝަހީދުވެފައެވެ. އަދި ދުނިޔޭގެ ސިއްހަތު ޖަމްއިއްޔާ  އިން ހާމަކުރާ ގޮތުގައި ހަނގުރާމަ ފެށުނު ފަހުން 306 ޞިއްޙީ މުވައްޒަފުން ވަނީ އިސްރާއީލުން ހައްޔަރުކޮށްފައެވެ. މިފަދަ ނުރައްކާތެރި މާހައުލެއްގައިވެސް ޞިއްޙި ޚިދުމަތްތެރިން ދައްކުވައިދެނީ ފަލަސްތީނުގެ ރައްޔިތުންގެ ސާބިތުކަމާއި ކެތްތެރިކަމެވެ.

ޣައްޒާގެ ހެލްތު މިނިސްޓްރީގެ އޮފިޝަލް ޔޫސުފް އަބޫ އަލް-ރީޝް މި ރަސްމިއްޔާތު ސިފަކުރެއްވީ "ބޮން އެޅުމާއި، ކުނިބުންޏާއި، އަދި ލޭގެ ކޯރުތަކުގެ ތެރެއިން، ތަހައްމަލުކުރަންޖެހުނު ވޭނުގެ ތެރެއިން ލިބުނު ކާމިޔާބީއެއް" ގެ ގޮތުގައެވެ. އަލް-ޝިފާގެ މެޑިކަލް ޑައިރެކްޓަރު ޑރ. މުހައްމަދު އަބޫ ސަލްމިއްޔާ ވިދާޅުވީ އިޒްރާއީލުން ފަލަސްތީނުގެ އިންސާނީ ވަސީލަތްތައް ނައްތާލަން ކުރި މަސައްކަތް ނާކާމިޔާބުވެފައިވާ ކަމަށެވެ.

މި ރަސްމިއްޔާތުގައި، ހަނގުރާމައިގައި ޝަހީދުވި ޞިއްޙީ ޚިދުމަތްތެރިންގެ ހަނދާނުގައި ފޮޓޯ ޖަހާފައިވާ ހުސް ގޮނޑިތަކެއް ބަހައްޓާފައިވެއެވެ. ޣައްޒާގެ ހެލްތު މިނިސްޓްރީގެ ޑައިރެކްޓަރު ޖެނެރަލް ޑރ. މުނީރު އަލް-ބުރުޝް ފާހަގަކުރެއްވި ގޮތުގައި، މި ބެޗުގައި ހިމެނޭ 10 ޑޮކްޓަރަކު ވަނީ ކިޔަވަމުން ދަނިކޮށް ޝަހީދުވެފައެވެ. އޭނާ ވިދާޅުވީ އެމީހުން ޖިސްމާނީ ގޮތުން ވަކިވެދިޔަ ނަމަވެސް، އެމީހުންގެ ހަނދާންތައް ކޮންމެ ސެޓިފިކެޓެއްގައާއި ސަލާމަތްކުރެވޭ ކޮންމެ ފުރާނައެއްގައި ދެމިއޮންނާނެ ކަމަށެވެ.

ދުނިޔޭގެ ޞިއްޙަތު ޖަމިއްޔާ އިން ހާމަކޮށްފައިވާ ގޮތުގައި، ޣައްޒާގެ 36 ހޮސްޕިޓަލުގެ ތެރެއިން މިހާރު މަސައްކަތް ކުރަނީ އެންމެ 18 ހޮސްޕިޓަލެވެ. އަލް-ޝިފާ ހޮސްޕިޓަލަކީ ތަކުރާރުކޮށް އިޒްރާއީލުގެ ހަމަލާތައް އަމާޒުވެފައިވާ ތަނެކެވެ. މި ހަމަލާތަކުގައި 400 އަށްވުރެ ގިނަ އާންމުން ޝަހީދުވެފައިވާއިރު، އޭގެ ތެރޭގައި ޞިއްޙީ އެހީތެރިކަމަށް އިންތިހާއަށް ބޭނުންވެފައި ތިބި ބަލިމީހުންވެސް ހިމެނެއެވެ.