ދަތުރުގޮސް އުޅެނިކޮށް ގެއްލުނު މީހަކު ފުލުހުން ހޯދަނީ!

މާލެ އަތޮޅު ރަށެއް ކައިރީގައި އޮތް ފަސްގަނޑަކަށް ދަތުރު ގޮސް އުޅެނިކޮށް މީހަކު ގެއްލިގެން އެމީހާ ހޯދުމުގެ މަސައްކަތް ދިވެހި ފުލުހުންގެ ޚިދްމަތުން ކުރަމުންދާ ކަމަށް އެ އިދާރާއިން ބުނެފިއެވެ.

މިކަމާ ގުޅިގެން އެކްސްގައި ފުލުހުން ކޮށްފައިވާ ޕޯސްޓެއްގަ ބުނެފައިވަނީ ކ ހުވަފެންފުށީ ދެކުނުން ހިއްކާފައި އޮންނަ ފަސްގަނޑަށް އޮގަސްޓު 30 ވަނަ ދުވަހު ދަތުރު ގޮސް އުޅުނު  ތަސްލީމް މުޙައްމަދު (43އ) މ. އަސަރީހަނދާން، މާލެ ގެއްލިފައިވާ ކަމަށް ރިޕޯޓުކޮށްފައިވާތީ އޭނާ ހޯދުމުގެ މަސައްކަތް ފުލުހުން ކުރަމުން ދާ ކަމަށެވެ.

މީގެ އިތުރުން އޭނާ އެންމެފަހުން ފެނިފައި ވަނީ އިއްޔެ 10:00 އާއި 11:00 ހާއިރު ކަމަށް އޭނާއާއެކު ދަތުރުދިޔަ މީހުން މައުލޫމާތުދީފަވާ ކަމަށް ފުލުހުން ބުނެފައިވެއެވެ.

ކ. ހުވަފެންފުށި ދެކުނުން ހިއްކާފައި އޮންނަ، ފަސްގަނޑަށް އޮގަސްޓު 30 ވަނަ ދުވަހު ދަތުރު ގޮސް އުޅުނު މާލެ، މ. އަސަރީހަނދާން، ތަސްލީމް މުޙައްމަދު (43އ) ގެއްލިފައިވާ ކަމަށް ރިޕޯޓުކޮށްފައިވާތީ އޭނާ ހޯދުމުގެ މަސައްކަތްދަނީ ކުރަމުން.

— Maldives Police (@PoliceMv) August 31, 2024

ފުލުހުން ބުނެފައިވަނީ ގެއްލިގެން ހޯދަމުންދާ ތަސްލީމާއި ގުޅޭ އެއްވެސް މަޢުލޫމާތެއް ލިބިފައިވާނަމަ އަދި އޮގަސްޓު 29 އަދި 30 (ބުރާސްފަތި / ހުކުރު) ދުވަހު މި ފަސްގަނޑަށް އެއްވެސް ބަޔަކު ދަތުރުގޮސްފައި ވާނަމަ އެކަން ހިންމަފުށި ޕޮލިސް ސްޓޭޝަންގެ ނަންބަރު (9794639) އަށް ގުޅުއްވައި ހިއްސާކޮށްދެއްވުން އެދޭކަމަށެވެ. 

ތަސްލީމް ގެއްލިގެން ހޯދުމަށް އޭނާގެ އާއިލާއިންވެސް ސޯޝަލް މީޑިއާގައި ޕޯސްޓު ކޮށްފައިވެއެވެ.