އިޒްރާއިލް ޕާސްޕޯޓު މަނާކުރުން ލަސްވާތީ އެމްޑީޕީ އިން މަޖިލީހަށް ގަރާރެއް ހުށައަޅައިފި!

އިޒްރާއިލް ޕާސްޕޯޓު މަނާކުރުން ލަސްވާތީ އިދިކޮޅު އެމްޑީޕީ އިން ރައްޔިތުންގެ މަޖިލީހަށް ގަރާރެއް ހުށައަޅައިފިއެވެ. 

އެމްޑީޕީގެ ފަރާތުން މި ގަރާރު މަޖިލީހަށް ހުށަހަޅުއްވާފައިވަނީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމެވެ.

އެ ގަރާރުގައި މެންބަރު ވިދާޅުވީ، ބިލު ހުށަހެޅި ދުވަހު ވަޒީރުންގެ މަޖިލީހުގެ ބައްދަލުވުމުގައި ވެސް އިޒްރާއިލް މީހުން ރާއްޖެ އެތެރެވުން މަނާ ކުރުމަށްޓަކައި ޤާނޫނު އިސްލާހު ކުރުމަށް ނިންމާފައިވާކަން ސަރުކާރުން އިއުލާން ކޮށްފައިވާ ކަމަށެވެ.

އެހެންނަމަވެސް އެކަމަށް ޢަމަލީ ސިފައެއް ގެންނަން ސަރުކާރުން އެއްވެސް މަސައްކަތެއްކޮށްފައެއް ނުވާ ކަމަށާ، ބިލުގެ މަސައްކަތް ކުރިއަށް ނުގޮސް ކޮމެޓީގައި އޮންނަތާ ހަތަރު މަހަށް ވުރެ ގިނަ ދުވަސް ވެފައިވާ ކަން ފާހަގަކުރެއްވިއެވެ.

މިއާއެކު އެ ގަރާރުގައި ބުނެފައިވަނީ، ސަރުކާރުގެ އަޤުލަބިއްޔަތު ހިނގަމުން މިދާ މަޖިލީހަށް ލިބިފައިވާ ކަމަށާ، އަދި ސަރުކާރުން އެ ހިނދަކަށް ބޭނުންވާ ކަމެއް ބޭނުންވާ ގޮތަށް މަޖިލީހުގެ ތެރެއިން ނިންމަމުން ގެންދާ ކަމަށެވެ.

އެގޮތުން ދައުރުން ބޭރުން ޖަލްސާތައް ބާއްވައިގެން ވެސް ބައެއް ބިލުތައް ފާސްކޮށްފައިވާކަން ފާހަގަކުރެއްވިއެވެ.

މީގެއިތުރުން ގަރާރުގައި ބުނެފައިވަނީ މުޅި އިސްލާމީ އުއްމަތަށް އިސްރާއީލުން ޖައްސަމުން މިދާ ގިލަންވެރިކަމާއި އާފާތް ކުށްވެރިކޮށް އަޅުގަނޑުމެން އެކަމާއި ކަނޑައެޅިގެން ދެކޮޅުވެރިކަން ހާމަކޮށްދިނުމަށްޓައި ކޮންމެހެން ކުރަން ޖެހޭ ކަމެއްގެ ގޮތުން އިޒްރޭލު ޕާސްޕޯޓް މިހާރުން މިހާރަށް މަނާކުރުމަށްޓަކައި ޤާނޫނު ނަމްބަރު 1/2007 (ދިވެހިރާއްޖޭގެ އިމިގްރޭޝަން ގާނޫނު)އަށް އިސްލާހު ގެނައުމަށް ހުށަހަޅައިފައިވާ ބިލު އަވަހަށް ފާސްކުރުމަށް ބާރުއަޅައިދިނުމަށް ސަރުކާރަށް ގޮވައިލުމަށްޓަކައި މި ގަރާރު ހުށައަޅާކަމަށެވެ.

އިޒްރާއިލް ޕާސްޕޯޓް މަނާކުރުމަށް ގޮވާލާ އެމްޑީޕީގެ ފަރާތުން ގަލޮޅު ދެކުނު ދާއިރާގެ މެންބަރު މީކާއިލް ނަސީމް ބިލު ހުށަހެޅުއްވީ މީގެ ފަސް މަސް ކުރިން ޖޫން މަހު 10ގަ އެވެ.

އެފަހުން އެ ބިލުގެ މަސައްކަތް ކުރިއަށް ނުގޮސް ސަލާމަތީ ޚިދުމަތްތަކާ ބެހޭ 241 ކޮމިޓީ އަށް ހުށައެޅިގޮތައް އޮތޯއެވެ. އެ ކޮމިޓީން ވަނީ އެ ބިލުގެ ދިރާސާއަށް ފުރަތަމަ ކޮމެޓީ ބައްދަލުވުން މިއަދު ހެނދުނު 9:30 އަށް ތާވަލްކޮށްފަ އެވެ.

ކުރިން އެމްޑީޕީ ސަރުކާރު ހިނގަމުންދިޔައިރު އޭރުގެ އިދިކޮޅުން އިޒްރާއިލްގެ ޕާސްޕޯޓު މަނާކުރުމަށް ގޮވައިލިއެވެ. ނަމަވެސް އޭރުގެ ސަރުކާރާއި އެމްޑީޕީ މެޖޯރިޓީ އޮތް މަޖިލީހުން އެ މައްސަލާގައި އެއްވެސް ފިޔަވަޅެއް އަޅާފައިނުވާކަން ފާހަގަކޮށްލަންޖެހެއެވެ.