މީހަކު ރަހީނުކޮށް އަނިޔާކުރި މައްސަލައިގައި މީހަކު ހައްޔަރުކޮށްފި

ހުޅުމާލޭގައި ފިރިހެނަކު ރަހީނުކޮށް، އަނިޔާކޮށް ބިރުދައްކައި އަދި އޭނާގެ ޢާއިލާގެ މީހުންނަށް ގުޅައި ފައިސާއަށް ޑިމާންޑް ކުރި މައްސަލައާ ގުޅިގެން 37 އަހަރުގެ ފިރިހެނަކު ފުލުހުން ވަނީ ހައްޔަރުކޮށްފައެވެ.

މި މައްސަލައިގައި ހައްޔަރުކުރެވުނީ މާލޭ ދަފްތަރު ނަންބަރު އާރު.އެސް 9022، ތޮލާލް މޫސާ (37 އަހަރު) އެވެ. މި ހާދިސާ ހިނގާފައިވަނީ ނޮވެމްބަރ 11 ވަނަ ދުވަހުގެ ރޭ ހުޅުމާލޭ އޯކިޑްމާގޭގައި ކަމަށް ފުލުހުން މަޢުލޫމާތު ދީފައިވެއެވެ.

ފުލުހުން ބުނާ ގޮތުގައި މި މައްސަލައިގައި ދިވެހި ފިރިހެނަކު ކާރެއްގެ ތެރޭގައި ރަހީނުކޮށް ހިފަހައްޓައި، އަނިޔާކޮށް ބިރުދައްކައި އަދި އެ މީހާގެ ޢާއިލާގެ މީހުންނަށް ގުޅައި ފައިސާއަށް ޑިމާންޑް ކޮށްފައިވެއެވެ.

މި މައްސަލައާ ގުޅޭ އިތުރު ތަފްސީލު މި ވަގުތު ހާމަކޮށްފައި ނުވާއިރު، ފުލުހުން ބުނެފައިވަނީ މި މައްސަލަ ތަޙުޤީޤު ކުރަމުން ގެންދާ ކަމަށެވެ.