އިޒްރާއިލް ޕާސްޕޯޓު މަނާކުރާ ބިލްގެ މަސައްކަތް ފެބުރުއަރީ 2025 އަށް ނިންމަނީ!

އިޒްރާއިލް ޕާސްޕޯޓު މަނާކުރުމުގެ ބިލްގެ މަސައްކަތް ފެބުރުއަރީ 2025 އަށް ނިންމަން ރައްޔިތުންގެ މަޖިލީހުގެ 241 ކޮމިޓީ ނުވަތަ ސަލާމަތީ ޚިދުމަތްތަކާ ބެހޭ ކޮމިޓީގެ މިއަދުގެ ބައްދަލުވުމުން ނިންމައިފިއެވެ. 

އިޒްރާއީލްގެ ޕާސްޕޯޓުގައި ރާއްޖެ އެތެރެވުން މަނާކުރަން މަޖިލިހަށް ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީގެ މެމްބަރު މީކާއިލް އަހުމަދު ނަސީމެވެ. މީކާއިލް ހުށައެޅުއްވި މިބިލު ބަލައިގަނެ މަޖިލިހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) އަށް ވަނީ ފޮނުވައިވަނީ މިދިޔަ ޖޫން މަހުގެ 10 ވަނަ ދުވަހުއެވެ.

މިއަދުގެ ކޮމެޓީގައި ވާހަކަދައްކަަވަމުން ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރު ވިދާޅުވީ، މި އިސްލާޙާއި ގުޅޭގޮތުން މަޝްްވަރާ ކުރަން ޖެހޭ ވަރަށް ގިނަ މުވައްސަސާތައް ހުރި ކަމަށް ފާހަގަކުރެވޭ ކަމަށެވެ. 

އަދި ބަޖެޓް ކަންކަންވެސް އޮތްއިރު، ޑިސެމްބަރު 1އިން ފެށިގެން މަޖިލީސް ޗުއްޓީއަށް ދާތީއާއެކު މި މައްސަލަ ނިންމުމުގެ ސުންގަޑިއަކީ 2025ގެ ފެބްރުއަރީގެ ނިޔަލަށް ހެދުމަށް ފާސް ކުރުމަށް ހުށަހަޅާ ކަމަށް އޭނާ ވިދާޅުވިއެވެ.

މަޖިލީހުގެ މާފަންނު އުތުރު ދާއިރާގެ މެންބަރު މުހައްމަދު ނާޒިމް ވިދާޅުވީ، މިއީ ވަރަށް ހައްްސާސް މައްސަލައަކަށްވާއިރު، މިތާ ހަމަ ތިބެލާފައި މަދު މެންބަރުން ކޮޅެއް ގޮތެއް ނިންމުމަކީ ރަނގަޅު ގޮތެއް ނޫން ކަމަށެވެ. އަދި މިކަމާއި ބެހޭ ގޮތުން ގިނަފަރާތްތަކާއި މަޝްވަރާކޮށް ދެކޭ ގޮތް ބަލަން ޖެހޭ ކަމަށާއި، އޭގެ ތެރޭގައި ސިޔާސީ ޕާޓީތަކާއި، އެންޖީއޯ، އައިޖީއޯ އަދި އެހެނިހެންވެސް ކަމުވޮށިގެންވާ ހުރިހާ ފަރާތްތަކަކާއި މަޝްވަރާ ކުރަން ޖެހޭ ކަަމަށް އޭނާ ގަބޫލުފުޅު ކުރައްވާ ކަމަށް ނާޒިމް ވިދާޅުވިއެވެ.

މިއާއެކު ފެބްރުއަރީގެ ނިޔަލަށް މި ބިލްގެ ސުންގަޑި ކަނޑައަޅަން މިއަދުގެ ކޮމެޓީގައި ފާސްކޮށްފައި ވަނީ ކޮމެޓީގައި ބައިވެރިވެވަޑައިގެން މެންބަރުންގެ އައުލަބިއްޔަތުން ވަނީ ފާސްކޮށްފައެވެ.

އިސްރާއީލްގެ ޕާސްޕޯޓު މަނާކުރުމަށް ނިމިދިޔަ 19 ވަނަ މަޖިލީހުން ގަރާރެއް ފާސްކޮށްފައިވީ ނަމަވެސް، މިހާތަނަށް ވަކި ގޮތަކަށް އަމަލުކޮށްފައިނުވާތީ ޤާނޫނަށް އިސްލާޙު ގެންނަން ބޭނުންވާ ކަމަށް ވެސް ބިލްގެ މަޤްސަދުތަކުގެ ތެރޭގައި ހިމެނެއެވެ.

ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ދަނީ ފަލަސްޠީނުގައި އިޒްރާއިލުން ހިންގަމުންދާ އަނިޔާވެރި ޢަމަލުތައް ހުއްޓުވުމަށް ބައިނަލްއަޤްވާމީ ދުނިޔޭގައި އަޑުހަރުކޮށް ގޮވައިލަމުންނެވެ.