ޚަބަރު
ރަސްގެތީމުގައި ދިރިއުޅޭ ބިދޭސީން ހޭލުންތެރިކުރުވުމަށް މަޢުލޫމާތު ދިނުމުގެ ސެޝަނެއް ކުރިއަށް ގެންގޮސްފި
ސެޝަންގެ ތެރެއިން/ފޮޓޯ: ފުލުހުން
ރ. ރަސްގެތީމުގައި ދިރިއުޅޭ ބިދޭސީން ހޭލުންތެރިކުރުވުމަށް މަޢުލޫމާތު ދިނުމުގެ ސެޝަނެއް ކުރިއަށް ގެންގޮސްފިއެވެ.
މިއީ، ކުށްމަދު އަމާން މާޙައުލެއް ޤާއިމުކުރުމަށް ރަސްގެތީމު ޕޮލިސް ޕޯސްޓުން ކުރަމުންދާ މަސައްކަތުގެ ތެރެއިން، ރަސްގެތީމުގައި ދިރިއުޅޭ ބިދޭސީންނަށް ކުރިއަށް ގެންދިޔަ ސެޝަނެކެވެ.
މިހިނގާ ޖަނަވަރީ މަހުގެ 3 ވަނަ ދުވަހު ކުރިއަށް ގެންދިޔަ މި ސެޝަންގައި، ރަށުތެރޭގައި އުޅޭ އުޅުމުގައި ޤާނޫނުތަކާއި ޤަވާއިދުތަކަށް ބޯލެނބުމަށާއި، އެއްގަމު އުޅަނދު ދުއްވުމުގައި ތިމާއާއި އަނެކުންގެ ސަލާމަތާއި ރައްކާތެރިކަމަށް ކުރަންޖެހޭ ކަންކަން ވެސް ކިޔައިދީފައިވާކަމަށް ފުލުހުން ވިދާޅުވިއެވެ. އަދި ވައްކަމުގެ މައްސަލަތަކުން ރައްކާތެރިވެ ތިބުމަށާއި ގެންގުޅޭ މުދަލަށް ރައްކާތެރިވުމަށް ކުރެވިދާނެ ކަންކަން ބުނެދީފައިވާކަމަށް ފުލުހުން މަޢުލޫމާތުދެއެވެ.
މީގެ އިތުރުން، މަކަރާއި ހީލަތުން ފައިސާއާއި މުދާ ހޯދުމުގެ މައްސަލަތަކުން ދުރުހެލިވެ، ރައްކާތެރިވުމަށާއި ރަށުގައި އުޅޭއިރު ދިމާވާ ނޭދެވޭ ކަންކަމުން ދުރުހެލިވެތިބުމަށް ވެސް ނަސޭހަތްތެރިވެފައިވާކަމަށް ފުލުހުން ވިދާޅުވިއެވެ.
ރަށްރަށުގައި މަސައްކަތްކުރާ ބިދޭސީން ޤާނޫނުތަކާއި ޤަވާއިދުތަކަށް އަހުލުވެރިކުރުވައި ހޭލުންތެރިކުރުވުމަށް މަޢުލޫމާތު ދިނުމުގެ ސިލްސިލާ ޕްރޮގްރާމްތައް ފުލުހުން ހިންގަމުންދާކަން ފާހަގަކޮށްލެވެއެވެ.
Ads by MSS
