ހުޅުމާލޭގައި ކާރެއްގައި މީހަކު ރަހީނުކުރި މައްސަލަ: އިތުރު ހަތަރު މީހަކު ހައްޔަރުކޮށްފި!

ހުޅުމާލޭގައި ކާރެއްގެ ތެރޭގައި ދިވެހި ފިރިހެނަކު ރަހީނުކޮށް ޢާއިލާގެ މެމްބަރުންނަށް ގުޅައި ފައިސާދިނުމަށް ކީ މައްސަލައާއި ގުޅިގެން އިތުރު މީހަކު ހައްޔަރުކޮށްފިއެވެ.

ދިވެހި ފުލުހުންގެ ޚިދުމަތުން މިމައްސަލައާއި ގުޅިގެން ކުރިން ބުނެފައިވަނީ ނޮވެންބަރު 11 ވަނަ ދުވަހުގެ ރޭ ހުޅުމާލެ އޯކިޑްމާ ހިނގުމުގައި ކާރެެއްގެ ތެރޭގައި ދިވެހި ފިރިހެނަކު ރަހީނުކޮށް ހިފަހައްޓައި، އަނިޔާކޮށް ބިރުދައްކައި އަދި އެމީހާގެ ޢާއިލާ މެމްބަރުންނަށް ގުޅައި ފައިސާ ދިނުމަށް ކީ މައްސަލައެއްގައި މާލޭ ދަފްތަރު ނަމްބަރު އާރްއެސް 9022 ޠަލާލް މޫސާ ހައްޔަރުކޮށްފައިވާ ކަމަށެވެ. 

ހުޅުމާލޭގައި މީހަކު ރަހީނު ކުރި މައްސަލާގައި ހައްޔަރުކުރި ޠަލާލް މޫސާ

މިރޭގެ ވަގުތެއްގައި ފުލުހުން ވަނީ މިމައްސަލާގެ އިތުރު ތަފްސީލް ހާމަކުރައްވައިފައެވެ. އެގޮތުން މިމައްސަލާގައި ޠަލާލް މޫސާގެ އިތުރުން މިކަންތައް ހިންގި ސަރަހައްދުން އިތުރު ހަތަރު މީހަކު ހައްޔަރުކޮށްފައިވާ ކަމަށް ފުލުހުން ވަނީ ބުނެފައެވެ. 

އެގޮތުން ހައްޔަރު ކޮށްފައިވާ ހަތަރު މީހުންނަކީ ހދ ކުމުންދޫ ރަތްބަގީޗާގެ ހުސާމް އިބްރާހިމް، މާލެ ގ.ކަޅަގާރިމާގެ ހުސެއިން ހައިކަލް ނިޔާޒް، ހދ ކުމުންދޫ ރަތްބަގީޗާގެ އާދަމް ޝަރީފް އަދި ހުޅުމާލެ ފްލެޓް ނަމްބަރު 71-1-04 އަޙްމަދު ރިޝްފާނެވެ.

ފުލުހުން އިތުރަށް ބުނީ މިމައްސަލާގައި ހައްޔަރުކުރި ފަސް މީހުންގެ ބަންދާއި މެދު ގޮތެއް ނިންމުމަށް ހުޅުމާލެ މެޖިސްޓްރޭޓް ކޯޓަށް ހާޒިރުކުރުވުމުން ފަސްމީހުންވެސް 7 ދުވަހަށް ބަންދު ކުރުމަށް މުއްދަތު ޖަހައިދީފައިވާ ކަމަށެވެ. 

ފުލުހުން ބުނެފައިވަނީ މިމައްސަލަ އިތުރަށް ތަހުޤީޤު ކުރަމުންދާކަމަށެވެ.