ރޭގެ އަލިފާނުގެ ޙާދިސާއާ ގުޅިގެން ޢާއިލާއަކަށް ވަޤުތީ އެހީތެރިކަން ފޯރުކޮށްދީފި

ރޭ މާލޭގައި ހިނގި އަލިފާނުގެ ހާދިސާއާއި ގުޅިގެން، ޢާއިލާއަކަށް ވަގުތީ އެހީ ފޯރުކޮށްދީފަވާކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ، އެންޑީއެމްއޭ އިން ވިދާޅުވެއްޖެއެވެ.

ސައިރިކްސް ކޮލެޖު ކައިރީ ހުރި ‏ގ. ވިންޓަރ ހައުސް 3ގައި އަލިފާނުގެ ހާދިސާއެއް ހިނގައިގެން އުޅޭކަމުގެ މަޢުލޫމާތު އެމްއެންޑީއެފް ފަޔާރ އެންޑް ރެސްކިޔު ސާވިސްއަށް ލިބިފައި ވަނީ ރޭ 23:22 ހާއިރުއެވެ. މި ޙާދިސާގެ މަޢުލޫމާތު ލިބުމާ އެކު، މާލޭ ފަޔަރ ސްޓޭޝަނުގެ ފަޔަރފައިޓަރުން ވަނީ އެ ސަރަޙައްދަށް ގޮސް އަލިފާން ނިއްވުމުގެ މަސައްކަތް ކޮށްފައެވެ. އެގޮތުން، ފަޔަރފައިޓަރުން ކުރި މަސައްކަތުން އިމާރާތުގައި ރޯވެފައި ހުރި އަލިފާން ކޮންޓްރޯލް ކުރެވުނީ ރޭ 23:56 ހާއިރުއެވެ. 

ގ.ވިންޓަރ ހައުސް 3 ގައި މިރޭ ހިނގި އަލިފާނުގެ ހާދިސާގައި އިންސާނީ އެހީ ފޯރުކޮށްދޭން ޖެހުނު ފަރާތްތަކަށް މި އޮތޯރިޓީން ވަނީ އެހީތެރިކަން ފޯރުކޮށްދީފައި. pic.twitter.com/DmAkRGLmJd

— NDMA Maldives (@NDMAmv) January 5, 2026

މިކަމާއި ގުޅިގެން އެންޑީއެމްއޭއިން ވިދާޅުވީ، އެހީތެރިކަން ފޯރުކޮށްދީފައި ވަނީ، އަލިފާން ރޯވި އިމާރާތާއި އިންވެގެން ހުރި ގޭގެ އެޕަރޓްމަންޓެއްގެ ފެން ހޮޅިއަކަށް ގެއްލުންވެގެން އެގެއިން ފެނުގެ ޚިދުމަތް ކެނޑިފައިވާތީ ކަމަށެވެ. އެގޮތުން، އެ އެޕަރޓްމަންޓްގައި ދިރިއުޅެމުންދިޔަ 2 މީހުންނަށް ރެއިން ފަށިގެން ވަގުތީ ބޯހިޔާވަހިކަން ފޯރުކޮށްދީފައިވާ ކަމަށާއި، ފެނުގެ ނިޒާމަށް ލިބުނު ގެއްލުން ދެނެގަނެ އެކަން ޙައްލުކުރުމަށް ކުރަންޖެހޭ މަސައްކަތްތައް ކުރަމުންދާކަމަށް އެންޑީއެމްއޭއިން ވަނީ ވިދާޅުވެފައެވެ.

މި ހާދިސާއާއި ގުޅިގެން އެއްވެސް މީހަކަށްވެސް އަދި އިތުރު ބޮޑު ގެއްލުމެއްވެސް ނުވާކަމަށް އެންޑީއެމްއޭއިން ވިދާޅުވެފައިވެއެވެ.