ސިފައިންނާއި ފުލުހުންގެ ވެލްފެއަރ ސްކީމަށް ބަދަލު ގެންނަނީ!

ދިވެހި ސިފައިންނާއި ފުލުހުންގެ މެޑިކަލް ވެލްފެއަރ ސްކީމަށް ބަދަލު ގެނެސް ޕްރައިވެޓް އިންޝިއުރެންސް އަކަށް ބަދަލުކުރަން ސަރުކާރުން ނިންމައިފިއެވެ. 

މާލީ ވުޒާރާައިން އާންމުކޮށްފައިވާ ދައުލަތުގެ ބަޖެޓު ޕޮޒިޝަން ރިޕޯޓުގައިވަނީ ސިފައިންނާއި، ފުލުހުންގެ އާއިލާތަކަށް މެޑިކަލް ވެލްފެއާގެ ސްކީމް އޮތް ނަމަވެސް އެކަމަށް ބޮޑު ހޭދައެއް ކުރާ ކަމަށެވެ. އަދި އެކަން ކޮންޓްރޯލް ކުރަން ނިންމާފައިވާ ކަމަށް އެ ރިޕޯޓުގައި ބުނެފައިވެއެވެ.

އެގޮތުން މި ނިންމުން ނިންމާފައިވަނީ ސިފައިންނާއި ފުލުހުންގެ އާއިލާތަކަށް މެޑިކަލް ވެލްފެއާ ސްކީމުން ބޮޑު ހަރަދެއް ހިނގާތީ އެކަމަށް ހައްލެއް ގެނައުމަށް ކަމަށް އެ ވުޒާރާގެ ރިޕޯޓުގައި ބުނެފައިވެއެވެ. 

މި ގެންނަ ބަދަލާއެކު ޕްރައިވެޓް އިންޝުއަރެންސް ހަމަވުމަށްފަހު އާސަންދަ ނިޒާމުގެ ތެރެއިން ޞިއްޙީ ފަރުވާ ލިބޭނެއެވެ.

އެ ވުޒާރާގެ ރިޕޯޓުގައިވާ ގޮތުން މިއަހަރު އެކަނިވެސް ސިފައިންނާއި ފުލުހުންގެ އާއިލާތަކަށް މެޑިކަން ވެލްފެއާގެ ގޮތުގައި 322 މިލިއަން ރުފިޔާ ވަނީ ހޭދަކޮށްފައެވެ. އެ ސްކީމަށް ލިމިޓެއް ނޯވެއެވެ.

އެހެންކަމުން އެ ވުޒާރާއިން ވަނީ ޕްރައިވެޓް އިންޝުއަރެންސް އަކަށް މި ނިޒާމް ބަދަލުކޮށް، އަންނަ އަހަރުގެ ކުރީކޮޅުން ފެށިގެން އަމަލު ކުރުމަށް ނިންމައިފައެވެ.

މިދިޔަ އަހަރުވެސް ސިފައިންނާއި ފުލުހުންނަށް އިންޝުއަރެންސަށް ކަނޑައަޅާފައިވާ ބަޖެޓަށްވުރެ އިތުރަށް ހޭދަކޮށްފައިވާ ކަމަށް ވަނީ ދައްކައިފައެވެ. އެގޮތުން ބަޖެޓުގައި އިތުރު އިންޝުއަރެންސްތަކަށް 179 މިލިއަން ރުފިޔާ ކަނޑައަޅާފައިވާއިރު މިދިޔަ އަހަރު ނިމުނު އިރު އެ އަދަދު ހުރީ 241 މިލިއަން ރުފިޔާއަށް މަތިވެފައެވެ.