އެޗްޑީސީން 15 މަޝްރޫޢު ފަށައި، "ޓްރާންސްފޯމިން ޓުމޯރޯ" ރަސްމީކޮށް އިފްތިތާޙުކޮށްފި

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކުރިއަށް ގެންދާ މައިގަނޑު 15 މަޝްރޫޢެއް ފެށުމަށްޓަކައި "ޓްރާންސްފޯމިން ޓުމޯރޯ" ރަސްމީކޮށް އިއްޔެ ރޭ އިފްތިތާޙު ކޮށްފިއެވެ. މި ރަސްމިއްޔާތު ބޭއްވުނީ ހުޅުމާލޭ ސެންޓްރަލް ޕާކުގައެވެ.

މި ޚާއްޞަ ރަސްމިއްޔާތުގައި، މި ތުގައި، މި ޕްރޮޖެކްޓްތައް އިފްތިތާޙު ކޮށްދެއްވީ އިކޮނޮމިކް މިނިސްޓަރު މުޙައްމަދު ސަޢީދެވެ. މި ރަސްމިއްޔާތުގައި ހުޅުމާލޭގައި ހިންގާ އިތުރު ބޯހިޔާވަހިކަމުގެ މަޝްރޫޢުތަކާއި ރާއްޖެއަށް މުޅިން އަލަށް ތަޢާރަފުކުރާ މަޝްރޫޢުތައް ހިމެނޭ ގޮތަށް ޖުމްލަ 15 މަޝްރޫޢެއް އިފްތިތާޙު ކުރެވުނެވެ. އަދި ބައެއް މަޝްރޫޢުތަކުގެ މޮޑެލްތައް ވެސް ދައްކާލެވުނެވެ.

މި މަޝްރޫޢުތަކުގެ ތެރޭގައި ހިމެނެނީ ރަސްމާލެ ޕްރޮޖެކްޓާއި، ހުޅުމާލޭގައި ހިންގާ އިތުރު ދެ ސޯޝަލް ހައުސިންގ މަޝްރޫޢު، ރޯ ހައުސް މަޝްރޫޢު، އަދި ބިންވެރިޔާ ސްކީމުން ގޯތި ލިބިފައިވާ މީހުންނަށް ޚާއްޞަކޮށްގެން ކުރިއަށް ގެންދާ ޕްރީ ފެބް ގެތަކުގެ މަޝްރޫޢެވެ. މީގެ އިތުރުން، ލަގްޒަރީ ވިލާތަކަށް ޚާއްޞަކޮށްފައިވާ ފަރުކޮޅުފުށި ގޭޓެޑް ކޮމިއުނިޓީ ޕްރޮޖެކްޓާއި، އެޗްޑީސީގެ އައު ހެޑް އޮފީސް އިމާރާތާއި، އުމުރުން ދުވަސްވީ މީހުންނަށް ޚާއްޞަކޮށްފައިވާ އެލްޑަލީ ކެއަރ ފެސިލިޓީ ވެސް ހިމެނެއެވެ.

އައިލް އެޑްވެންޗަރ ޕާކުގެ ޑިޒައިން ކޮންސަލްޓަންސީ އަދި ތަނުގެ އޮޕަރޭޝަނަށް މުހިންމު ތަމްރީނުތައް ދިނުމާ ގުޅޭ އެމްއޯޔޫގައި ވެސް މި ރަސްމިއްޔާތުގައި ސޮއިކުރެވުނެވެ. މި އެއްބަސްވުމުގައި ސޮއިކުރެއްވީ އެޗްޑީސީގެ މެނޭޖިންގ ޑިރެކްޓަރު ފަޟުލް ރަޝީދު އަދި ސިޓީ ޑިވެލޮޕްމަންޓްސް ޕްރައިވެޓް ލިމިޓެޑްގެ ޑިރެކްޓަރު ޑޭވިޑް ޕިއެރިސްއެވެ.

މި މަޝްރޫޢުތަކަކީ ރައީސް ޑރ. މުޙައްމަދު މުޢިއްޒުގެ މެނިފެސްޓޯއާ އެއްގޮތަށް، ހުޅުމާލެ ހިމެނޭ ގޮތަށް އެޗްޑީސީގެ ބެލުމުގެ ދަށުގައިވާ ރަށްތައް ތަރައްޤީ ކުރުމަށް އިފްތިތާޙު ކުރެވުނު މަޝްރޫޢުތަކެކެވެ. މި މަޝްރޫޢުތަކުގެ ސަބަބުން މާލޭ ސަރަޙައްދުގެ ބޯހިޔާވަހިކަމުގެ މައްސަލައަށް ޙައްލެއް ހޯދައިދިނުމަށް މަގުފަހިވާނެ ކަމަށް އުންމީދު ކުރެވެއެވެ.