ގަލުފަޅުގައި ނޫވެލި އައިލެންޑް ރިޓްރީޓް ތަރައްޤީކުރަން ނިންމައިފި

ރާއްޖޭގެ ލަގްޒަރީ ރިއަލް އެސްޓޭޓް އަދި ޓޫރިޒަމް ދާއިރާ ކުރިއެރުވުމަށް އަމާޒުކޮށް، ގަލުފަޅުގެ ލެގޫނުގައި "ނޫވެލި އައިލެންޑް ރިޓްރީޓް" ގެ ނަމުގައި އައު މަޝްރޫޢެއް ތަޢާރަފުކުރުމަށްނިންމައިފިއެވެ. މި މަޝްރޫޢަކީ މާލެ އާއި ހުޅުމާލެއާ ކައިރިން ލަގްޒަރީ ދިރިއުޅުމުގެ ތަޖުރިބާއެއް ފޯރުކޮށްދިނުމަށް ރޭވިފައިވާ މަޝްރޫޢެކެވެ.

ނޫވެލި އައިލެންޑް ރިޓްރީޓްގައި ލަގްޒަރީ ގެތަކުގެ އިތުރުން، ކަނޑުގެ ހިތްގައިމު މަންޒަރާއެކު ސަންރައިޒް އަދި ސަންސެޓް ރެސްޓޯރަންޓްތައް ހިމެނެއެވެ. އަދި ހަރަކާތްތެރި ދިރިއުޅުމެއް އުޅުމަށް ބޭނުންވާ ވަސީލަތްތަކާއި، ވިޔަފާރިތަކަށް ފުރުސަތު ދިނުމަށް ކޮމާޝަލް ޕްލާޒާއެއްވެސް ހިމެނެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވިސްނުމާ އެއްގޮތަށް، މި މަޝްރޫޢުގައި މީޓިންގްސް، އިންސެންޓިވްސް، ކޮންފަރެންސަސް އަދި އެގްޒިބިޝަންސް (އެމް.އައި.ސީ.އީ) މާރކެޓަށް އަމާޒުކޮށް އިވެންޓް ސްޕޭސްތަކާއި، ކޮންވެންޝަން ސެންޓަރެއް، އެގްޒިބިޝަން ހޯލްތަކާއި ހޯލްތަކާއި، ބޭންކުއެޓް ހޯލެއް ހިމެނެއެވެ.

މި މަޝްރޫޢުގެ މަޤްޞަދަކީ ގްރޭޓަރ މާލެ ސަރަޙައްދުގައި ލަގްޒަރީ ރިއަލް އެސްޓޭޓް އަދި ޓޫރިޒަމް ދާއިރާ ފުޅާކޮށް، މަތީ ފަންތީގެ ޗުއްޓީ ހޭދަކުރުމަށް ބޭނުންވާ ފަރާތްތަކަށާއި އިންވެސްޓްމަންޓް ފުރުސަތުތައް ހޯދާ ފަރާތްތަކަށް އަމާޒުކޮށް ތަރައްޤީކުރެވޭ މަޝްރޫޢެކެވެ.

މި މަޝްރޫޢުގެ ސަބަބުން ރާއްޖޭގެ އިޤްތިޞާދަށް ބޮޑު ކުރިއެރުމެއް ލިބި، ވަޒީފާގެ އިތުރު ފުރުސަތުތައް އުފެދޭނެކަމަށް ބެލެވެއެވެ.