ހަނދުގެ ވަގުތު ބަލާނެ ދުނިޔޭގެ ފުރަތަމަ ސޮފްޓްވެއާ ޗައިނާއިން އުފައްދައިފި

ޗައިނާގެ ސައިންސްވެރިން ހަނދުގެ ވަގުތު ބަލައި، ހިސާބުކުރެވޭނެ ދުނިޔޭގެ ފުރަތަމަ ސޮފްޓްވެއާ އުފައްދައިފިއެވެ. މިއީ ކުރިއަށް އޮތް ތަނުގައި ހަނދަށް ކުރާ ދަތުރުތަކުގެ މުވާސަލާތީ ކަންކަމާއި ނެވިގޭޝަން ނިޒާމަށް ލިބޭނެ ވަރަށް ބޮޑު ކުރިއެރުމެއް ކަމަށް މާހިރުން ދެކެއެވެ.

ދުނިޔޭގެ އެކި ގައުމުތަކުގެ ޖައްވީ އިދާރާތަކާއި އަމިއްލަ ކުންފުނިތަކުން ހަނދަށް އުޅަނދުތައް ފޮނުވުމަށް ތައްޔާރުވަމުންދާއިރު، ހަނދުގައި ސައްހަ ވަގުތު ބެލެހެއްޓުމަކީ ދުނިޔޭގައި ގަޑި ބަލާލުން ފަދަ އާދައިގެ ކަމެއް ނޫނެވެ. ސަބަބަކީ ދުނިޔެއަށްވުރެ ހަނދުގައި ވަގުތު ހިނގާލެއް ކުޑަކޮށް އަވަސްވުމެވެ.

ސައިންސްވެރިން ހާމަކުރާ ގޮތުގައި، ދުނިޔޭގެ ކޮންމެ ދުވަހަކަށް ހަނދުގައި ގާތްގަނޑަކަށް 56 މައިކްރޯސެކަންޑް އިތުރުވެއެވެ. މިއީ ވަރަށް ކުޑަ މިންވަރެއް ކަމަށް ހީވި ނަމަވެސް، ޖައްވީ އުޅަނދުތައް ހަނދަށް ތިރިކުރުމާއި ދަތުރުކުރުމުގެ ފުރިހަމަކަން ކަށަވަރުކުރުމަށްޓަކައި މިއީ ވަރަށް މުހިންމު ވަގުތުކޮޅެކެވެ.

ޗައިނާގެ ޕާޕަލް މައުންޓަން އޮބްޒަވޭޓަރީގެ މާހިރުން މި ސޮފްޓްވެއާ ތައްޔާރުކޮށްފައިވަނީ ހަނދުގެ ބާރުދެރަ ގްރެވިޓީއާއި އޭގެ އޯބިޓަލް މޯޝަނަށް ރިއާޔަތްކޮށްގެންނެވެ. "އެލް.ޓީ.އީ 440" (LTE 440) ގެ ނަން ދެވިފައިވާ މި ސޮފްޓްވެއާގެ ސަބަބުން، އުނދަގޫ ހިސާބުތަކަކާ ނުލައި ދުނިޔޭގެ ވަގުތާއި ހަނދުގެ ވަގުތު ސީދާ އަޅާކިޔާލެވޭނެއެވެ.

މި ސޮފްޓްވެއާގެ އެންމެ ފާހަގަކޮށްލެވޭ އެއް ކަމަކީ އޭގެ ސައްހަކަމެވެ. ދިރާސާވެރިން ބުނާ ގޮތުގައި، ކުރިއަށް އޮތް 1،000 އަހަރުގެ ތެރޭގައި ވެސް މި ސޮފްޓްވެއާގެ ވަގުތަށް އަންނާނީ  މަދު ނެނޯސެކަންޑެއްގެ ތަފާތެކެވެ. މީގެ ސަބަބުން ކުރިއަށް އޮތް ގަރުނުތަކުގައި ހަނދުގައި ކުރާ މަސައްކަތްތަކަށް ބޮޑު ލުޔެއް ލިބޭނެއެވެ.

ވޭތުވެދިޔަ އެތައް އަހަރެއްގެ ތެރޭގައި ހަނދުގެ މިޝަންތަކުގައި ބޭނުންކުރަމުން އައީ ދުނިޔޭގެ ވަގުތެވެ. އަދި ވަގުތަށް އަންނަ ކުދި ބަދަލުތައް މީގެ ކުރިން ތަރުތީބުކުރަމުން އައީ އަތުންނެވެ. ނަމަވެސް، ގިނަ އަދަދެއްގެ އުޅަނދުތައް ހަނދަށް ދަތުރުކުރާ މި ދުވަސްވަރު، އެންމެ މައިކްރޯސެކަންޑެއްގެ ތަފާތަކުން ވެސް ޖީ.ޕީ.އެސް ނިޒާމަށް ބޮޑެތި މައްސަލަތަކެއް ކުރިމަތިވެދާނެ ކަމަށް ސައިންސްވެރިން ބުނެއެވެ.

ޗައިނާގެ މި ސޮފްޓްވެއާ ބިނާކޮށްފައިވަނީ 2024 ވަނަ އަހަރު އިންޓަނޭޝަނަލް އެސްޓްރޮނޮމިކަލް ޔޫނިއަނުން ކަނޑައެޅި "މޫން ސްޓޭންޑަޑް ޓައިމް" ފްރޭމްވޯކްގެ މައްޗަށެވެ. މި ނިޒާމު ފުރިހަމަކުރުމަށްޓަކައި ސައިންސްވެރިން ވަނީ ދުނިޔެއާއި ހަނދާ ދެމެދު ދަތުރުކުރާ އުޅަނދުތަކުން ލިބުނު މައުލޫމާތު ބޭނުންކޮށްފައެވެ.

މި ސޮފްޓްވެއާ މިހާރު އޮތީ ކޮންސެޕްޓް މަރުހަލާގައެވެ. ނަމަވެސް ވަރަށް އަވަހަށް މިއީ އަމަލީ ގޮތުން ބޭނުންކުރަން ފަށާނެ އެއްޗަކަށް ވާނެ ކަމަށް ދިރާސާވެރިން އުންމީދުކުރެއެވެ. މި ދިރާސާގެ ހޯދުންތައް މިހާރު ވަނީ ސައިންޓިފިކް ޖާނަލްއެއްގައި ޝާއިއުކޮށްފައެވެ.