ޚަބަރު
2،100 އަށްވުރެ ގިނަ ސޯޝަލް ހައުސިންގ ޔުނިޓް އިމާރާތްކުރަން ނިންމައިފި
ހައުސިންގ ޔުނިޓްތައް ހިމެނޭ އިމާރާތުގެ ކުރެހުމެއް ފޮޓޯ:އެޗްޑީސީ
ރާއްޖޭގެ ރައްޔިތުން ދިމާވެފައިވާ ގިނަ ގޮންޖެހުންތަކަށް ހައްލެއް ހޯދުމުގެ ގޮތުން ގޭދޮރުވެރިކަމަކީ އެންމެ މުހިންމު އެއް ކަމެއްގެ ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެކެވަޑައިގަންނަވައެވެ. މިގޮތުން، ދެ އައު ސޯޝަލް ހައުސިންގ މަޝްރޫޢެއް ތަޢާރަފުކުރުމަށް ސަރުކާރުން ނިންމާފައިވާ ކަން އެޗްޑީސީއިން ވަނީ ހާމަކޮށްފައެވެ.
މި ދެ މަޝްރޫޢުގެ ދަށުން 1،700 ސޯޝަލް ހައުސިންގ ޔުނިޓާއި 400 އަށްވުރެ ގިނަ ސޯޝަލް ހައުސިންގ ޔުނިޓް އިމާރާތްކުރެވޭނެ ކަމަށް މައުލޫމާތުލިބެއެވެ. މި މަޝްރޫޢުތަކަކީ ހަމައެކަނި ގޭދޮރުވެރިކަން ފޯރުކޮށްދިނުމަށް އަމާޒުކޮށްފައިވާ މަޝްރޫޢުތަކެއް ނޫން ކަމަށާއި، އިޤްތިޞާދީ ކުރިއެރުން ހޯދުމަށްވެސް މަގުފަހިކޮށްދޭނެ މަޝްރޫޢުތަކެކެވެ.
މި މަޝްރޫޢުތަކުގައި ވިޔަފާރިތަކަށް ޚާއްޞަކުރެވިފައިވާ ސަރަޙައްދުތައް ހިމެނޭނެ ކަމަށާއި، މީގެ ސަބަބުން އިޤްތިޞާދީ ޙަރަކާތްތައް އިތުރުވެ، ރައްޔިތުންނަށް ބޭނުންވާ އަސާސީ ޚިދުމަތްތައް ލިބުމަށް ފަސޭހަވެގެންދާނެ ކަމަށް އެޗްޑީސީއިން ވަނީ ބުނެފައެވެ. އަދި މިކަމުގެ ސަބަބުން ރައްޔިތުން ދުރު ސަރަޙައްދުތަކަށް ދަތުރުކުރަން ޖެހޭ މިންވަރު މަދުވެގެންދާނެ ކަމަށްވެސް ހާމަކުރިއެވެ.
މުޖުތަމަޢުއަށް އަމާޒުކޮށްގެން ތަރައްޤީކުރެވޭ މި މަޝްރޫޢުތަކުގެ ސަބަބުން ރައްޔިތުންގެ ދިރިއުޅުމުގެ ފަސޭހަކަމާއި ދެމެހެއްޓެނިވި ގޮތެއްގައި ދިރިއުޅެވޭނެ މާޙައުލެއް ޤާއިމުކުރެވިގެންދާނެ ކަމަށް ސަރުކާރުން އުންމީދުކުރާ ކަމަށް ރައީސް މުޢިއްޒު ވިދާޅުވިއެވެ.
