މީޑިއާ ކައުންސިލާއި ބްރޯޑްކޮމް އެއްކޮށްލަނީ!

މޯލްޑިވްސް މީޑިއާ ކައުންސިލާއި މޯލްޑިވްސް ބްރޮޑްކާސްޓިންގ ކޮމިޝަން އެއްކޮށްލުމަށް ރައްޔިތުންގެ މަޖިލީހަށް ބިލެއް ހުށައަޅައިފިއެވެ.

މިދެއިދާރާ އެއްކޮށްލުމަށް ރައްޔިތުންގެ މަޖިލީހަށް ބިލް ހުށައަޅުއްވައިފައިވަނީ ތުޅާދޫ ދާއިރާގެ މެމްބަރު ޢަބްދުލްޙަންނާން އަބޫބަކުރެވެ. 

މިބިލްގައި ހުށައަޅުއްވައިފައިވަނީ މީޑިއާ ކައުންސިލާއި ބްރޯޑްކޮމް އުވާލައި އެ ދެއިދާރާގެ ބަދަލުގައި މޯލްޑިވްސް މީޑިއާ އެންޑް ބްރޯޑްކާސްޓިންގެ ނަމުގައި ކޮމިޝަނެއް އުފެއްދުމަށެވެ. 

މެމްބަރު ހަންނާނު ހުށައެޅުއްވި އެބިލްގެ މަޤްސަދުތަކުގެ ތެރޭގައި ރާއްޖޭގައި ނޫސްވެރިކަމުގެ މިނިވަންކަން ކުރިއަރުވައި، ނޫސްވެރިކަން ތަރައްޤީކޮށް ދެމެހެއްޓުމެވެ. 

މީގެއިތުރުން ރާއްޖޭގައި ނޫސްވެރިކަމުގެ މިނިވަންކަން ދެމެހެއްޓުމާއެކު ބްރޯޑްކާސްޓް މީޑިއާ ހިމެނޭހެން، މީޑިއާގައި މަސައްކަތްކުރާ މީހުންނާއި ނޫސްވެރިންގެ ޒިންމާދާރުކަން އިތުރުކޮށް ބަލަހައްޓާނެ މިނިވަން އިދާރީ ނިޒާމެއް ގާއިމުކުރުން ހިމެނެ އެވެ.

ބިލުގައިވާ ގޮތުން މިބިލް ޤާނޫނަކަށްވެ، ޢަމަލުކުރަން ފެށުމާއެކު އެމްއެމްސީއާއި ބްރޯޑްކޮމް އުވާލެވޭނެއެވެ. އަދި އަލަށް އުފައްދާ ކޮމިޝަންގައި ތިބޭނީ 7 މެމްބަރުން ކަމަށް ވަނީ ބުނެފައެވެ. އެއީ ރައްޔިތުންގެ މަޖިލީހުން ރުހުން ދީގެން ހޮވާ 4 މެމްބަރުންނާއި މީޑިއާތަކުން އައްޔަން ކުރާ ތިން މެމްބަރުންނެވެ. މި ކޮމިޝަންގެ ރައީސް އާއި ނައިބު ރައީސް ކަނޑައެޅުމުގެ ބާރު ދީފައިވަނީ ރައީސުލްޖުމްހޫރިއްޔާއަށެވެ. 

ބިލުގައި ވާގޮތުން ކޮމިޝަން އެކުލަވާލާ މެންބަރުން ކޮމިޝަން ހިންގުމާ ހަވާލުވަންދެން, ކޮމިޝަނުގެ ކަންކަން ވަގުތީ ގޮތުން ހިންގާނީ ސިވިލް ސާވިސް ކޮމިޝަނުން އެކުލަވާލާ 5 މެންބަރުންގެ ވަގުތީ ކޮމިޓީއަކުންނެވެ.

އަލަށް އުފައްދާ ކޮމިޝަންގެ ޒިންމާތަކުގެ ތެރޭގައި މީޑިއާތަކާއި ނޫސްވެރިން އަމަލުކުރަން ޖެހޭ ސުލޫކީ މިންގަނޑެއް އެކުލަވާލުން ހިމެނެއެވެ. 

މިކަން ކުރުމަށް ނިންމާފައިވަނީ މީޑިއާތަކާއި ނޫސްވެރިންގެ މަޝްވަރާއަށް ބެލުމަށްފަހުއެވެ. އަދި ރާއްޖޭގައި ތިބި ނޫސްވެރިންނާއި އެޑިޓަރުންގެ ދަފްތަރެއް އެކުލަވާލައި، ނޫސްވެރިންނަށް ފާސް ދޫކުރުމަކީ ވެސް އެކޮމިޝަންގެ ޒިންމާއެކެވެ.