ލޯނުތައް ނެގުމަކީ ކުރެވުނު ރަނގަޅު ކަމެއް، މިއަދު ޤައުމު ސަލާމަތްވެފައި މިއޮތީ އެމްޑީޕީގެ މަސައްކަތުން!

މިދިޔަ ސަރުކާރުން ބޭރުގެ އެކި ޤައުމުތަކުންނާއި ބައިނަލްއަޤްވާމީ މާލީ އިދާރާތަކުން ނެގުނު ލޯނުތައް ނެގުމަކީ ކުރެވުނު ރަނގަޅު ކަމެެއް ކަމަށާއި، މިއަދު ދިވެހި ޤައުމު ސަލާމަތްވެފައި މިއޮތީ އެމްޑީޕީއިން އޭރު ކުރި މަސައްކަތުން ކަމަށް ކުރީގެ ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ރޭ އެމްޑީޕީ އިން ބޭއްވި “ފުދިއްޖެ ފުނޑިއްޖެ” ޖަލްސާގައި ވާހަކަފުޅު ދައްކަވަމުންނެވެ. 

ރައީސް ޞާލިޙްގެ ވާހަކަފުޅު ކުރިއަށް ގެންދަވަމުން ވިދާޅުވީ އެމްޑީޕީ ސަރުކާރުން ލޯނުތައް ނެގި ވާހަކަ ދައްކާއިރު، އެކަން ކުރަންޖެހުނު ސަބަބާއި މިއަދު ހާލަތު އޮތްގޮތާއި އަޅާކިޔަން ޖެހޭ ކަމަށެވެ.

އަދި ކޮވިޑް ތެރޭގައި ކަންވެގެން ދިޔަގޮތުން ދުނިޔެ ދެކެފައިނުވާވަރުގެ ޢާލަމީ ވަބާއެއް ކުރިމަތިވެގެން ދިޔަކަމަށާއި އެކަމުގެ ސަބަބުން ދައުލަތަށް ލިބެމުން އައި އާމްދަނީ ހުއްޓުމަކަށް އައިކަމަށް އެމަނިކުފާނު ވިދާޅުވިއެވެ. 

ރައީސް ޞާލިޙް ވިދާޅުވީ ދައުލަތުގެ ރިޒާވްފައި އޭރު ފައިސާނެތްކަމަށެވެ.  އަދި ރައީސް ޔާމީނުގެ ވެރިކަން ނިމިގެންދިޔައިރު ދައުލަތުގެ ރިޒާވްގައި އެއެް ބިލިއަން ޑޮލަރު ހުންނާނޭކަމަށް ވިދާޅުވަމުންދިޔަ ނަމަވެސް އެއީ ކަނޑައެޅިގެން ބުހުތާނު ދޮގެއް ކަމަށް އެމަނިކުފާނު ވިދާޅުވިއެވެ. 

ރައީސް ޔާމީނުގެ ވެރިކަމުގެ ދައުރު ނިމުނުއިރު، ދައުލަތުގެ ރިޒާވްގައި ހުރީ 572 މިލިއަން ޑޮލަރު ކަމަށާއި، ބޭނުން ކުރެވޭ ރިޒާވްގައި 200 މިލިއަން ޑޮލަރުވެސް ނެތްކަމަށް ރައީސް ޞާލިޙް ވިދާޅުވިއެވެ. އަދި ދައުލަތުގެ ރިޒާވްގައި އެއްޗެއް ހުރިނަމަ ހުރީ ޖީއެމްއާރަށްދީ ނިންމާފައިކަމަށްވެސް ކުރީގެ ރައީސް ޞާލިޙްގެ ވާހަކަފުޅުގައި ވިދާޅުވިއެވެ.

ދައުލަތެއްގެ އެ އޮންނަ ވެރިކަމެއްގެ ބޭނުމަކީ ރައްޔިތުންނަށް ޖެހޭ ދަތި އުނދަގޫ ދަނޑިވަޅުތަކުގައި އެހީތެރިވެ ދިނުން ކަމަށާއި މިގޮތުން ކުރިމަތިވި ކޮވިޑްގެ ޢާލަމީ ވަބާގެ ތެރޭގައި މުސާރަބަރާބަރަށް ދެވުނުއިރު، ވަޒީފާއިން އެއްވެސް މީހަކު ވަކިކޮށްފައި ނުވާއިރު، ރިސޯތްތަކުގެ ކުލިވެސް ފަސްކޮށްދެވުނު ކަމަށް ރައީސް ޞާލިޙް ވިދާޅުވިއެވެ. 

މީގެ އިތުރުން ވިޔަފާރިތަކަށް ލޯނާއި އެހީތެރިކަންވެސް ދީފައިވާނޭކަން ފާހަގަކުރައްވަމުން ރައީސް ޞާލިޙް ވިދާޅުވީ މިއަދު މިހާލަތުގައި ޤައުމު ފެންނަން މިއޮތީ އޭރު އެޅި ފިޔަވަޅުތަކުގެ ސަބަބުންކަމަށް ރައީސް ވިދާޅުވިއެވެ.

ރައީސް ޞާލިޙް ވިދާޅުވީ އޭރު ނެގިލޯނުތައް ނެގުމަލީ ރަނގަޅު ކަމެއް ކަމަށް ކެރިގެން ދަންނަވަން ކެރޭނެ ކަމަށެވެ.

މިއަދު މިޤައުމު ސަލާމަތްވެފައި މިއޮތީ އެދުވަހު އެމްޑީޕީ ސަރުކާރުން ކުރި މަސައްކަތުން ކަމަށްވެސް އެމަނިކުފާނު ވިދާޅުވިއެވެ. މީގެ އިތުރުން 2022 ވަނަ އަހަރާ ހަމަޔަށް އައިއިރު އިޤްތިޞާދު އޭރު އޮތް ހާލަތަށް ދިޔައީ އޭރު އެގޮތައް ޢަމަލުކުރެވުނީމަ ކަމަށް ރައީސް ޞާލިޙް ވިދާޅުވިއެވެ.

މިއަދު ފެންނަނީ ޤައުމުގެ އިޤްތިޞާދު ހުއްޓިފައި އޮތް މަންޒަރުކަމަށާއި ދުނިޔެއަށް އިޤްތިިޞާދީ ގޮތުން ލޮޅުމެއް ނައިސް ރާއްޖޭގެ މާލީ ޙާލަތު މިހާ ދަށަށް މިދިޔައީ ހިންގަން ނޭނގުނުކަމުން ކަމަށެވެ. ރައީސް ޞާލިޙް ވިދާޅުވީ އަދުގެ ސަރުކާރުގެ މިސްރާބު މިއަދު ހުރީ ބާރުތަށް މުށުތެރެއަށް ލައިގެން 2028 ވަނަ އަހަރުގެ ރިޔާސީ އިންތިިޚާބު ފޭރިގަންނަން ކަމަށެވެ.