ޚަބަރު
މަސްތުވާތަކެތީގެ ވަބާގައި ޖެހި މަގުމަތީގައި އުޅޭ 47 މީހަކު މިހާތަނަށް ފަރުވާއަށް ނެގިފައިވޭ!
ޑްރަގް އޭޖެންސީ. ފޮޓޯ: ޕީއެސްއެމް
މަސްތުވާތަކެތީގެ ވަބާގައި ޖެހި މަގުމަތީގައި އުޅޭ 47 މީހަކު މިހާތަނަށް ފަރުވާ ނިޒާމުގެ ތެރެއަށް ނެގިފައިވާކަމަށް އެންޑީއޭ އިން ހާމަކޮށްފިއެވެ.
މަސްތުވާތަކެތީގެ ވަބާގައި ޖެހި މަގުމަތީގައި އުޅޭ މީހުން ފަރުވާގެ ނިޒާމަށް ނެގުމަށް ޚާއްސަ ޕްރޮގްރާމެއް ފަށައިފައިވަނީ މިދިޔަ އޮކްޓޯބަރު މަހުގެ 22 ވަނަ ދުވަހުއެވެ.
އެންޑީއޭއިން ބުނެފައިވަނީ އެއޮޕަރޭޝަން ނިންމާލުމަށް ވަކި ތާރީޚެއް ކަނޑައަޅާފައިނުވާ ކަމަށާއި، އަދި މި އޮޕަރޭޝަންގެ ދަށުން މަގުމަތީގައި ސަލާންޖަހަން އުޅޭ މަސްތުވާތަކެތި ބޭނުންކުރާ މީހުންނާއި ވައްކަމާއި ފޭރުމުގައި ހަރަކާތްތެރިވާ މަސްތުވާތަކެތި ބޭނުންކުރާ މީހުންނާއި މަގުމަތީ މަސްތުގެ ހާލަތުގައި އުޅޭ މީހުންގެ އިތުރުން މިސްކިތްތަކުގައި ނިދާ މަގުމަތިވެފައިވާ މީހުން ފަރުވާ ނިޒާމަށް ގެނެސް، އެ މީހުންނަށް ބޭނުންވާ ފަރުވާ ދެވޭނެކަމަށެވެ.
އެންޑީއޭއިން ބުނެފައިވަނީ އަމާޒަކީ ފަރުވާއަށް ގެނެވޭ މީހުންނަށް ފަރުވާ ދިނުމަށްފަހު އަނބުރާ މުޖުތަމަޢަށް ނެރުން ކަމަށެވެ. އަދި އެމީހުން މުޖުތަމަޢަށް ނެރުމަށްފަހުވެސް އެ މީހުންނަށް ބޭނުންވާ އާފްޓަރކެއަރދެވޭނަކަމަށެވެ. ރާއްޖޭގައި ޑްރަގް އޮފެންޑަރ ރިމާންޑް ސެންޓަރު ނުވަތަ މަސްތުވާތަކެތި ބޭނުންކުރާ މީހުންނަށް ފަރުވާދޭ ސެންޓަރުތައް ހުންނަނީ ކ. ހިންމަފުއްޓާއި ހުޅުމާލޭގައެވެ. ސަރުކާރުން އެންމެ ބޮޑު އިސްކަމެއްދެއްވައިގެން ހައްލުކުރަން ބޭނުންވާ އިޖުތިމާޢީ މައްސަލަތަކުގެ ތެރޭގައި މަސްތުވާތަކެތީ ވަބާއިން ދިވެހިން ސަލާމަތްކުރުން ހިމެނެއެވެ.
