ޕެންޝަނަށް ދޭ ފައިސާ ކުޑަކުރުމަށްވުރެ، ކުރީގެ ރައީސުންގެ އެލަވަންސް ކުޑަކުރުން ރަނގަޅު!

ދައުލަތުގެ ބަޖެޓުން އަސާސީ ޕެންޝަންގެ ގޮތުގައި ދޭ ފައިސާ ކުޑަކުރުމަށްވުރެ ކުރީގެ ރައީސުންނަށް ދޭ އެލަވަންސް ކުޑަކުރުން މާރަނގަޅު ވާނެ ކަމަށް ކެންދޫ ދާއިރާގެ މެމްބަރު މަޢުރޫފް ޒާކިރު ވިދާޅުވެއްޖެއެވެ. 

މިއަދު މަޖިލީހުގައި ކުރިއަށް ގެންދާ 2025 އަށް ލަފާކޮށް ސަރުކާރުން ހުށައަޅާފައިވާ ބަޖެޓް ބަހުސްގައި ވާހަކަ ފުޅު ދައްކަވަމުން މެމެބަރު މަޢުރޫފް ވަނީ 2025ގެ ބަޖެޓުގައި އަސާސީ ޕެންޝަންއަށް ދޭން ކަނޑައަޅާފައިވާ މިންވަރު ކުޑަކޮށްފައިވާތީ ވަރަށް ބޮޑަށް އެކަމަށް ފާޑުވިދާޅުވެފައެވެ. 

އެގޮތުިން މަޢުރޫފް ވިދާޅުވީ އަސާސީ ޕެންޝަންގެ ގޮތުގައި 5000 ރުފިޔާ ދޭން އޮތް އަދަދު، ބަޖެޓުގައި އޮތީ ކުޑަކޮށްފައި ކަމަށެވެ. އަދި ޕެންޝަން އަށްދޭ ޢަދަދު ކުޑަކޮށްފައިއޮތީ ކީއްވެގެންތޯ އޭނާ ސުވާލުކުރެއްވެވިއެވެ.

މަޢުރޫފް ވިދާޅުވީ ކުރީގެ ރައީސުންނަށް ދޭ ޢިނާޔަޔްތަކާއި ދެންވެސް އެކަހަލަ ފަރާތްތަކަށް ދޭ ޢިނާޔަތް މަދުކޮށްފައި ޢުމުރުން ދުވަސްވީ މީހުންނަށް ދެ 5000 ރުފިޔާ ދިނުން މާރަނގަޅުވާނެ ކަމަށެވެ.

މީގެ އިތުރުން، މައުރޫފް ވަނީ، ބަޖެޓް ހަދާފައިވަނީ މަޖިލީހުގެ މަދު މެންބަރުން ކޮޅެއް ބޭނުންވާ ގޮތަށް، އެ މެންބަރުންގެ ދާއިރާއަށް އެކަނި ފައިދާވާ ގޮތަށް ކަމަށް ތުހުމަތު ކުރައްވާފައެވެ.

އަދި 2025 ވަނަ އަހަރަށް ލަފާކުރާ ބަޖެޓްގައި ކެންދޫ ދާއިރާގެ ރަށްތަކަށް އެއްވެސް ޕްރޮޖެކްޓެއް ބަޖެޓްގައި ހިމަނާފައި ނުވާކަން އޭނާ ފާހަގަކުރައްވައިފައިވެއެވެ.

އެއީ ރާއްޖޭގައި ފުރަތަމަ ފަހަރަށް މެންބަރުގެ ސިޔާސީ ފިކުރަށް ބަލައިގެން ތައްޔާރު ކުރެވިފައިވާ ބަޖެޓް ކަމަށްވެސް މަޢުރޫފްވަނީ ތުހުމަތު ކުރައްވާފައެވެ.

އަދި އެފަދައިން، ކަން ނުކުރައްވައި، ކެންދޫ ދާއިރާގެ ރަށްތަކުގެ ތަރައްޤީއަށް، ބޭނުންވެފައިވާ ކަންކަން ބަޖެޓުގައި ހިމަނައި ދެއްވުމަށް އޭނާ ވަނީ އެދިވަޑައިގެންފައެވެ.

2025 ވަނަ އަހަރުގެ ބަޖެޓަކީ ގެދޮރުވެރިކަމުގެ ބަޖެޓްކަމަށް ސަރުކާރުން ބުނި ނަމަވެސް، އެ ބަޖެޓްގައި ގެދޮރުވެރިކަމަށް އޮތީ އެންމެ 15 އިންސައްތަ ކަމަށް މަޢުރޫފްވަނީ ވިދާޅުވެފައެވެ.

އަންނަ އަހަރަށް ލަފާކުރާ ބަޖެޓުގައިވާ ގޮތުން އެ ބަޖެޓުގައި، ދެމެހެއްޓެނިވި ގޮތުގައި ޕެންޝަން ނިޒާމު ކުރިއަށް ގެންދިއުމަށް ގިނަ އިސްލާޙީ ފިޔަވަޅުތައް އެޅުމަށް ވަނީ ނިންމާފައެވެ.

އެގޮތުން، 65 އަހަރުން މަތީގެ މީހުންނަށް ދޭ ބޭސިކް ޕެންޝަން އިނާޔަތް ވެސް ފޯރުންތެރި ކަމަށް ބަލައިގެން އެންމެ މަދުން އާމްދަނީ ލިބޭ ފަރާތްތަކަށް ދޭ ގޮތަށް އަންނަ އަހަރުގެ އޭޕްރީލް މަހުން ފެށިގެން ބަދަލުތަކެއް ގެންނާނެ ކަމަށް ބަޖެޓުގައި ބުނެފައިވެ އެވެ.

އެ ބަދަލުތަކާއެކު، ޕެންޝަންގެ އިނާޔަތް ބަދަލުވާނީ ޓާގެޓް ޕެންޝަން ނިޒާމަކަށް ކަމަށް އެ ބަޖެޓުގައި ބުނެއެވެ.