ފުކުޝީމާ ކާރިސާއަށްފަހު ޖަޕާނުގެ އެންމެ ބޮޑު ނިއުކްލިއާ ޕްލާންޓްގެ މަސައްކަތް އަލުން ފަށައިފި

ދުނިޔޭގައި ހުރި އެންމެ ބޮޑު ނިއުކްލިއާ ޕަވަރ ޕްލާންޓް ކަމަށްވާ ޖަޕާނުގެ ކަޝިވަޒާކީ-ކަރިވާ ނިއުކްލިއާ ޕްލާންޓުގެ މަސައްކަތް، 2011 ވަނަ އަހަރު ކުރިމަތިވި ފުކުޝީމާ ނިއުކްލިއާ ކާރިސާއަށްފަހު ފުރަތަމަ ފަހަރަށް އަލުން ފަށައިފިއެވެ.

މި ޕްލާންޓް ހިންގާ ޓޯކިޔޯ އިލެކްޓްރިކް ޕަވަރ ކޮމްޕެނީ ޓެޕްކޯ އިން ކަށަވަރުކޮށްދިން ގޮތުގައި، ޕްލާންޓުގެ ސިންގަލް ރިއެކްޓަރުގެ މަސައްކަތް ފަށާފައިވަނީ މިދިޔަ ބުދަ ދުވަހުގެ ރޭގަނޑު 19:02 (ޖީ.އެމް.ޓީ އިން 10:02) ގައެވެ. މި ޕްލާންޓް އަލުން ހުޅުވުމުގެ ހުއްދަ ސަރަހައްދީ ގަވަރުނަރު މިދިޔަ މަހު ދެއްވާފައިވީ ނަމަވެސް، މިކަމާ މެދު އާންމުންގެ މެދުގައި ވަނީ ބޮޑެތި ޚިޔާލުތަފާތުވުންތަކެއް އުފެދިފައެވެ.

ސެޕްޓެމްބަރު މަހު ނެގި ޚިޔާލު ހޯދުމުގެ ވޯޓަކުން ދެއްކި ގޮތުގައި، އެ ސަރަހައްދުގެ ރައްޔިތުންގެ %60 މީހުން ޕްލާންޓް ހުޅުވުމާ ދެކޮޅެވެ. މިކަމާ ދެކޮޅަށް ގިނަ އަދަދެއްގެ މީހުން، ޚާއްޞަކޮށް އުމުރުން ދުވަސްވީ މީހުން، މިދިޔަ އަންގާރަ ދުވަހު ވަނީ ބޯކޮށް ސްނޯ ފައިބަމުން ދިޔަ ވަގުތުވެސް ޕްލާންޓް ކައިރީގައި މުޒާހަރާކޮށްފައެވެ. މުޒާހަރާގެ ބައިވެރިން ކަންބޮޑުވުން ފާޅުކުރަމުން ދިޔައީ ބިންހެލުންތަކުގެ ނުރައްކަލާއި، ކާރިސާއެއް ދިމާވެއްޖެނަމަ ރައްކާތެރި ސަރަހައްދުތަކަށް މީހުން ބަދަލުކުރާނެ އެކަށީގެންވާ ޕްލޭނެއް ނެތުމުގެ އިތުރުން ޓެޕްކޯ ކުންފުނީގެ އިތުބާރާ މެދުގައެވެ.

ރައްކާތެރިކަން ކަށަވަރު ކުރުމުގެ ގޮތުން މި ޕްލާންޓުގައި މިހާރު ވަނީ 15 މީޓަރުގެ އުސް ސުނާމީ ފާރަކާއި، ކުއްލި ހާލަތްތަކުގައި ބޭނުންކުރާނެ ކަރަންޓުގެ ވަސީލަތްތައް އިތުރަށް ހަރުދަނާކޮށްފައެވެ. ޓެޕްކޯއިން ބުނި ގޮތުގައި، ޕްލާންޓުގެ މަސައްކަތް ކުރިއަށް ގެންދާނީ ހުރިހާ ވަސީލަތްތަކެއްގެ ރައްކާތެރިކަން ވަރަށް ފަރުވާތެރިކަމާއެކު ޗެކްކުރުމަށްފަހުގައެވެ.

ޖަޕާނު ސަރުކާރުގެ އަމާޒަކީ ބޭރުން އެތެރެކުރާ ތެލާއި ގޭހަށް ބަރާސާވާ މިންވަރު މަދުކުރުމެވެ. މިހާރު %70 ގައި ހުރި މި މިންވަރު ކުރިއަށް އޮތް 15 އަހަރު ތެރޭގައި %30 އާއި %40 އާ ދެމެދުގެ މިންވަރަކަށް ތިރިކޮށް، އިއާދަކުރަނިވި ހަކަތައާއި ނިއުކްލިއާ ހަކަތަ ބޭނުންކުރާ މިންވަރު އިތުރުކުރުމަށް ވަނީ ނިންމާފައެވެ. ސަރުކާރުގެ ޕްލޭނުގައިވާ ގޮތުން 2040 ވަނަ އަހަރާ ހަމައަށް ދާއިރު ގައުމުގެ ކަރަންޓުގެ %20 އުފައްދާނީ ނިއުކްލިއާ ހަކަތައިންނެވެ.

ޖަޕާނުން މި ޕްލާންޓް އަލުން ހުޅުވާފައި މިވަނީ، މީގެ އަހަރުތަކެއް ކުރިން ހިނގި ފުކުޝީމާ ކާރިސާގެ އަސަރުތައް ނައްތާލުމުގެ މަސައްކަތް އަދިވެސް ކުރިއަށްދާ ދަނޑިވަޅެއްގައެވެ. ކަމާބެހޭ ފަރާތްތަކުން ރައްކާތެރިކަމަށް އިސްކަންދޭނެ ކަމަށް ބުނި ނަމަވެސް، ބިންހެލުން ގިނަ އެ ގައުމުގެ ރައްޔިތުން ތިބީ ނިއުކްލިއާ ހަކަތައާ މެދު ނުތަނަވަސްކަމެއްގެ ތެރޭގައެވެ.