ނޫސްތަކާއި މީޑިއާތައް ކޮންޓްރޯލް ކުރުމަކީ އަޅުގަނޑު ޤަބޫލުކުރާ ހަމައެއްނޫން: ރައީސް މުޢިއްޒު

ނޫސްތަކާއި މީޑިއާތައް ކޮންޓްރޯލް ކުރުމަކީ ޤަބޫލުފުޅު ކުރައްވާ ހަމައެއްނޫން ކަމަށް ރައީސުލްޖުމްހޫރިއްޔަ ޑރ މުޙައްމަދު މުޢިއްޒު ވިދާޅުވެއްޖެއެވެ. 

ރައީސް ޑރ މުއިއްޒު މިހެން ވިދާޅުވީ އެމަނިކުފާނު އެކްސްގައި ކުރެއްވެވި ޕޯސްޓެއްގައެވެ. 

ރައީސް ޑރ މުޢިއްޒު މިފަދަ ޕޯސްޓެއް ކުރައްވައިފައިމިވަނީ މީޑިއާތަކާއި ވަކިވަކި ނޫސްވެރިން ޖޫރިމަނާކޮށް، ލައިސަންސް ބާތިލް ކުރުމުގެ ބާރު ލިބޭ ގޮތަށް މީޑިއާ އެންޑް ބްރޯޑްކާސްޓިން ކޮމިޝަންގެ ޤާނޫނާއި ގުޅޭ ބިލެއް ސަރުކާރުގެ ފަރާތުން މަޖިލީހުގެ ތުޅާދޫ ދާއިރާގެ މެމްބަރު ޢަބްދުލް ހަންނާން އަބޫބަކުރު މަޖިލީހަށް ހުށައަޅުއްވާފައިވާ ދަނޑިވަޅެއްގައެވެ.

އަދި ސަރުކާރުގެ މެމްބަރު ހަންނާނު ހުށައެޅުއްވި މި ބިލާއި ގުޅިގެން އިދިކޮޅު އެމްޑީޕީ އިން ނުރުހުން ފާޅުކޮށް ފާޑުކިޔައިފައިވާކަން ފާހަގަކޮށްލަންޖެހެއެވެ.

ރައީސް މުޢިއްޒު މިއަދު ކުރެއްވެވި ޕޯސްޓުގައި ވިދާޅުވެފައިވަނީ ނޫސްތަކާއި މީޑިއާ ތައް ކޮންޓްރޯލް ކުރުމަކީ އެމަނިކުފާނު ޤަބޫލުފުޅު ކުރައްވާ ހަމައެއް ނޫން ކަމަށެވެ.

މާތް ވެގެންވާ އިސްލާމްދީނާއި ދިވެހިރާއްޖޭގެ ޤާނޫނު އަސާސީ އާއި ޚިލާފު ނުވާހާ ހިނދަކު ދިވެހި ދައުލަތުގެ ސިޔާދަތީ ބާރު ހިނގާ ސަރަޙައްދުގައި ކޮންމެ ދިވެއްސަކަށްވެސް އެމީހެއްގެ އަމިއްލަ މިނިވަންކަމާއެކު އެމީހަކު ބޭނުންކަމެއްކޮށް އުޅުމުގެ ޙައްޤު އޮންނާނެ

ރައީސް ޑރ މުއިއްޒު ވިދާޅުވެފައިވެއެވެ.

ރައީސް މުޢިއްޒު މިހެން ވިދާޅުވެފައިވާއިރު ސަރުކާރުގެ މެމްބަރު ހަންނާނު މަޖިލީހަށް ހުށައެޅުއްވެވި ބިލާއި ގުޅިގެން އެ ބިލަކީ ނޫސްވެރިކަމަށް އޮތް ނުރައްކަލެއް ކަމަށް ބުނެ އެކަމާ ކަންބޮޑުވުން ފާޅުކޮށް މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)އިން ވަނީ ބަޔާނެއް ނެރެފައެވެ. 

ތުޅާދޫ ދާއިރާގެ މެމްބަރު ޢަބްދުލް ހަންނާން އަބޫބަކުރު މަޖިލީހަށް މިއަދު ހުށައެޅުއްވެވި ބިލުގެ މަޤްސަދެއް ކަމުގައި ބުނެފައިވަނީ ނޫސް މަޖައްލާ ރަޖިސްޓްރީކުރުމަށް ލުއި ފަސޭހަ އަދި ހަރުދަނާ މިންގަނޑުތަކެއް ކަނޑައަޅައި، ބްރޯޑްކާސްޓިން ދާއިރާވެސް ހިމެނޭހެން މީޑިއާގެ ކަންކަން ތަންފީޒުކުރުމަށް ވަކި މުއައްސަސާ އެއް އުފެއްދުން ކަމަށް ބިލުގައިވެއެވެ.

އަދި މި ޤާނޫނުގެ ދަށުން އުފައްދާ ކޮމިޝަނުން އެކުލަވާލާ ނޫސްވެރިކަމުގެ ސުލޫކީ މިންގަނޑާ ތަކުރާރުކޮށް ޚިލާފު ވެއްޖެ ނަމަ 5،000 ރުފިޔާ އާއި 50،000 ރުފިޔާ އާ ދެމެދުގެ އަދަދަކުން ނޫސް މަޖައްލާ ޖޫރިމަނާ ކުރެވޭ އިރު، އަދި ވަކިވަކި ނޫސްވެރިން ވެސް 5،000 ރުފިޔާ އާއި 10،000 ރުފިޔާ އާ ދެމެދުން ޖޫރިމަނާ ކުރެވޭނެއެވެ.

މި ޤާނޫނުން އުފައްދާ ކޮމިޝަނުގައި ހަތް މެންބަރުން ތިބޭއިރު އެ ކޮމިޝަނުގެ ދައުރަކީ ފަސް އަހަރެވެ. މަޖިލީހަށް ހުށައެޅުނު މިބިލް ފާސްވެ ޤާނޫނަކަށް ބަދަލުވުމުން މީޑިއާ ކައުންސިލާއި ބްރޯޑްކޮމް އުވި އެދެމުއްސަސާ އެއްމުއައްސަސާއަކަށް ވެގެންދާނެއެވެ.