ޝަހީދުންގެ ޢަދަދު 43000 މައްޗަށް އަރައިގެން ގޮއްސި، އަނިޔާވެރިކަމަށް ނިމުމެއް ނެތް!

ފަލަސްޠީނުގައި އިޒްރާއިލުގެ ހައްދުފަހަނައެޅި އަނިޔާވެރި ސިފައިން ދިން ހަމަލާތަކުގެ ސަބަބުން ޝަހީދުވެގެން ގޮސްފައިވާ މީހުންގެ ޢަދަދު 43،713 އަށް އަރައިގެން ގޮސްފިއެވެ. 

ޝަހީދުންގެ ޢަދަދު މިހާމައްޗަށް އަރައިގެން ގޮސްފައިވާއިރު އެކިވަރުގެ އަނިޔާތައް ލިބިފައިވާ މީހުންގެ ޢަދަދު 103،258 އަށް ވަނީ އަރައިގެންގޮސްފައެވެ.

ޝަހީދުންގެ ޢަދަދާއި ޒަޚަމްވީމީހުންގެ ޢަދަދު ދުވަހެއް ދުވަހަކަށް މަތިވަމުންދާއިރު އިޒްރާއިލްގެ ހަމަލާތައް ދަނީ ހުއްޓުމެއް ނެތި ދެމުންނެވެ. 

އެގޮތުން މިއަދުވެސް ޣައްޒާގެ އުތުރުގައި އޮންނަ ޖަބަލިއްޔާ ރެފިއުޖީ ކޭމްޕްގެ ގެއަކަށް އިޒްރާއީލުން ދިން ވައިގެ ހަމަލާއެއްގައި ކުޑަކުދިން ހިމެނޭ ގޮތަށް ފަލަސްތީނުގެ 10 މީހަކު ވަނީ ޝަހީދުވެގެން ގޮސްފައެވެ.

މީގެއިތުރުންވެސް ޣައްޒާ ސިޓީގެ ޝުޖާއޭއަށް ދިން ހަމަލާތަކުގައި މަދުވެގެން ދެ މީހަކު ޝަހީދުވެފައިވާއިރު، ޣައްޒާގެ ދެކުނުގެ އަލް މަވާސީ ސަރަހައްދުގައި އިތުރު އަށް މީހަކު ވަނީ ޝަހީދުކޮށްލައިފައެވެ. 

އަލް މަވާސީ އަށް ދިން ހަމަލާތައް ދީފައިވަނީ ރައްކާތެރިކަން ދޭ އިންސާނީ ސަރަޙައްދެއްގެ ގޮތުގައި ފާހަގަކޮށްފައިވާ ސަރަޙައްދަކަށެވެ. 

މިހަމަލާތަކުގައި އަށް މީހަކު ޝަހީދުވީއިރު އެ ސަރަހައްދުގައި ތިބި ސިވިލް ޑިފެންސް ޓީމުތަކާއި އެމްބިއުލާންސްގެ ޓީމުތަކުން ބުނާ ގޮތުގައި އަދިވެސް މީހުން ތިބީ އިމާރާތް ތަކުގެ ކުނިތަކުގެ ދަށުގައި ތާށިވެފައި ކަަމަށެވެ. އެ ސަރަހައްދުގައި ތިބި މީހުން ބުނެފައިވަނީ އެއީ މިއަދު އަލްމަވާސީއަށް ދިން ދެވަނަ ވައިގެ ހަމަލާ ކަމަށެވެ. 

އިޒްރާއިލުން ފަލަސްޠީނުގެ ޣައްޒާއަށް ހުއްޓުމެއްނެތި ހަމަލާތައް ދެމުންދާއިރު އަވައްޓެރި ލުބްނާނަށްވެސް ހުއްޓުމެއްނެތި ވަރުަގަދަ ހަމަލާތައް ދަނީ ދެމުންނެވެ. 

އިޒްރާއިލުން ލުބްނާނަށް ދެމުންދާ ހަމަލާތަކުގައި މިހާތަނަށް 3287 މީހަކު ޝަހީދުވެ، 14،222 މީހަކަށް ވަނީ އެކިވަރުގެ ޒަޚަމްތައް ވަނީ ލިބިފައެވެ.