ޤައުމީ ފިރިހެން ފުޓުބޯޅަ ޓީމާއި ފުޓްސަލް ޓީމަށް އެއް މިލިއަންގެ ބޯނަހެއް ދިނުމަށް ނިންމައިފި

ދިވެހިރާއްޖޭގެ ޤައުމީ ފިރިހެން ފުޓުބޯޅަ ޓީމަށާއި ޤައުމީ ފިރިހެން ފުޓްސަލް ޓީމަށް އެއް މިލިއަން ރުފިޔާގެ ބޯނަހެއް ދިނުމަށް ރައީސުލްޖުމްހޫރިއްޔާ ނިންމައިފިއެވެ.

ދައުލަތުގެ މީޑިއާ، ޕީއެސްއެމްއަށް ދެއްވި އިންޓަވިއުއެއްގައި ކުޅިވަރާއި ހަށިހެޔޮކަމާއި ބެހޭ ވަޒީރު އަބުދުﷲ ރާފިޢު ވިދާޅުވީ، ރައީސުލްޖުމްހޫރިއްޔާ ނިންމަވާފައި ވަނީ، ޓީމުގެ ކުޅުންތެރިންނާއި އޮފިޝަލުން ހިމެނޭ ގޮތަށް މުޅި ޓީމަށް ބޯނަސް ދިނުމަށެވެ.

އެގޮތުން ޤައުމީ ފިރިހެން ފުޓުބޯޅަ ޓީމަށް ބޯނަސް ދޭން ނިންމެވީ، މިދިޔަ އަހަރުގެ ސެޕްޓެމްބަރު މަހު ސްރީލަންކާގައި ބޭއްވި ސައުތު އޭޝިއަން ސުޕަ ކަޕް ކާމިޔާބުކޮށްފައިވާތީއެވެ. އަދި ފުޓްސަލް ޓީމަށް ބޯނަސް ދޭން ނިންމެވީ، ސައުތު އޭޝިއަން ފުޓުބޯޅަ ފެޑެރޭޝަން (ސާފް)އިން މުޅިން އަލަށް ބޭއްވި ސަރަޙައްދީ ފުޓްސަލް މުބާރާތުގެ ތަށި ޔަޤީންކުރުމާ ގުޅިގެންނެވެ.

ވަޒީރު ވިދާޅުވީ، ރައީސުލްޖުމްހޫރިއްޔާގެ މި ނިންމެވުމަކީ މިދިޔަ އަހަރުގެ އޮކްޓޫބަރު 2 ގައި ގައުމީ ޓީމާއެކު ސިޓްރޮން ރެސްޓޯރެންޓުގައި ބޭއްވެވި ބައްދަލުކުރެއްވުމެއްގައި ނިންމެވި ނިންމެވުމެއް ކަމަށެވެ.

ސަރުކާރުން މި ފައިސާ ކުޅުންތެރިންނާ ހަވާލުކުރުމަށް ނިންމާފައި ވަނީ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) މެދުވެރިކޮށެވެ. 

ކާމިޔާބީތައް ހޯދައި ޤައުމަށް ރީތި ނަން ހޯދައިދޭ ޤައުމީ ޓީމުތަކަށް ފައިސާގެ އިނާމު ދިނުމަށް ސަރުކާރުން ނިންމާފައި ވަނީ، ކުޅުންތެރިންނަށް ހިތްވަރުދީ، ކުޅުންތެރިންގެ ފެންވަރު މަތިކޮށް، ބައިނަލްއަޤުވާމީ މައިދާނުގައި ދިވެހި ކުޅުންތެރިން ހޯދާ ކާމިޔާބީތައް އިތުރު ކުރުމުގެ މަޤުސަދުގައެވެ.