ޖުމްހޫރީ ދައުލަތެއްގެ ގޮތުގައި އިންޑިއާއަކީ އެހެން ޤައުމުތަކަށް އިބުރަތެއް: ނައިބު ރައީސް

ޖުމްހޫރީ ދައުލަތެއްގެ ގޮތުގައި އިންޑިއާގެ ދުސްތޫރީ ހަޔާތް ބިނާވެގެން އައި ގޮތަކީ، އެހެން ޤައުމުތަކަށް އެއިން ގިނަގުނަ އިބުރަތެއްކަމުގައި ރައީސުލްޖުމްހޫރިއްޔާގެ ނައިބު، އަލްއުސްތާޛް ޙުސެއިން މުޙައްމަދު ލަޠީފް ވިދާޅުވެއްޖެއެވެ.

އެ މަނިކުފާނު މިފަދައިން ވިދާޅުވީ، އިންޑިއާގެ 77ވަނަ ޖުމްހޫރީ ދުވަހާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައެވެ.

ރައީސުލްޖުމްހޫރިއްޔާގެ ނައިބު ސޯޝަލް މީޑިއާގައި ކުރެއްވި ޕޯސްޓުގައި ވަނީ، އިންޑިއާގެ ނައިބު ރައީސް، ހިޒް އެކްސެލެންސީ ސްރީ ސީ. ޕީ. ރާދަކްރިޝްނަން އާއި އިންޑިއާ ސަރުކާރުގެ އިތުރުން އެ ޤައުމުގެ ރައްޔިތުންނަށް ދުވަހުގެ ތަޙުނިޔާ އަރިސްކުރައްވާފައެވެ.

It gives me great pleasure to convey my greetings and good wishes to Vice President HE Shri C. P. Radhakrishnan @VPIndia, the Government and the friendly people of India on the 77th Republic Day of India. India’s constitutional journey as a republic holds many inspirational… pic.twitter.com/oYzgXlgsNw

— Hussain Mohamed Latheef (@HucenSembe) January 26, 2026

އެ މަނިކުފާނު އިތުރަށް ވިދާޅުވީ، ދިވެހިރާއްޖެ އާއި އިންޑިއާއަކީ ވަރަށް ގާތް އެކުވެރި ގުޅުމެއްގެ ދިގު ތާރީޚެއް އޮތް ދެ ޤައުމު ކަމަށާއި، އަދި މި ގުޅުމުގެ ސަބަބުން ދެ ޤައުމުގެ ރައްޔިތުންނަށް ވެސް ބޮޑެތި މަންފާތަކެއް ކުރަމުންދާކަމަށެވެ.

އަދި އެ މަނިކުފާނުގެ އުންމީދަކީ ދެ ޤައުމުގެ ދެމެދުގައި މިހާރު އޮތް ގުޅުން ކުރިއަށް އޮތް ތަނުގައި އިތުރަށް ބަދަހިވެ ވަރުގަދަވެގެން ދިއުންކަމަށް ވެސް ވަނީ ވިދާޅުވެފައެވެ.

އިންޑިޔާގެ ޖުމްހޫރީ ދުވަސް ފާހަގަކުރަނީ އެ ޤައުމުގެ ޤާނޫނު އަސާސީ އެކުލަވާލާ، ޢަމަލުކުރަން ފެށި ދުވަހާއި ގުޅުވާއިގެންނެވެ. އެއީ 1950 ވަނަ އަހަރުގެ ޖެނުއަރީމަހުގެ 26 ވަނަ ދުވަހެވެ. އަދި އެ ދުވަހަކީ އިންޑިޔާގެ ފުރަތަމަ ރައީސް ޑޮކްޓަރ ރަޖެންދްރާ ޕްރަސާދް، ރައީސްކަމުގެ ހުވާކުރެއްވި ދުވަހެވެ.