އެޗްޑީސީގެ މުވައްޒިފުން ލޭ ހަދިޔާ ކުރުމުގެ ހަރަކާތެއް ކުރިއަށް ގެންދަނީ

މޯލްޑިވްސް ބްލަޑް ސާވިސް (އެމްބީއެސް) އިން ލޭ ހުސްވަމުންދާތީ، ލޭ ހޯދުމަށް ކޮށްފައިވާ އިއުލާނަކާ ގުޅިގެން އެހީތެރިކަން ފޯރުކޮށްދިނުމުގެ ގޮތުން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މުވައްޒަފުން ލޭ ހަދިޔާކުރުމުގެ ހާއްސަ ކޭމްޕެއް ފަށައިފިއެވެ.

އެޗްޑީސީ އާއި އެމްބީއެސް ގުޅިގެން މިއަދު ފެށި މި ކޭމްޕާ ގުޅޭގޮތުން އެޗްޑީސީން ބުނީ، މި ހަރަކާތުގެ މައިގަނޑު މަގްސަދަކީ ބްލަޑް ބޭންކުން މި ދަނޑިވަޅުގައި ލޭ މަދުވެފައިވާތީ، އެކަމަށް އަވަސް ހައްލެއް ހޯދައިދިނުމުގައި އެ ކޯޕަރޭޝަނުގެ މުވައްޒަފުންގެ ފަރާތުން އެހީތެރިކަމާއި އެއްބާރުލުން ފޯރުކޮށްދިނުން ކަމަށެވެ.

އެމްބީއެސްއިން މިދިޔަ ހަފްތާގެ ތެރޭގައި ހާމަކޮށްފައިވާ ގޮތުގައި، މިވަގުތު އެންމެ ބޮޑަށް ބޭނުންވަނީ އޭ ޕޮޒިޓިވް، އޯ ޕޮޒިޓިވް، އޯ ނެގެޓިވް، ބީ ޕޮޒިޓިވް، ބީ ނެގެޓިވް އަދި އޭބީ ޕޮޒިޓިވް ލެޔެވެ. ބްލަޑް ބޭންކުން ލޭގެ ސްޓޮކް މަދުވުމަކީ ތެލެސީމިއާ ކުދިންނަށާއި އެހެނިހެން ބަލިމީހުންނަށް ފަރުވާ ދިނުމުގައި ބޮޑެތި ގޮންޖެހުންތަކެއް ކުރިމަތިވާ ކަމެކެވެ.

ލޭ ހަދިޔާ ކުރަން ބޭނުންވާ އާންމު ފަރާތްތަކަށް ވެސް އެ ފުރުސަތު އޮތްއިރު، ކޮންމެ ހަފްތާއެއްގެ އާދިއްތަ ދުވަހުން ފެށިގެން ބުރާސްފަތި ދުވަހުގެ ނިޔަލަށް، ހެނދުނު 8:00 އިން ރޭގަނޑު 8:00 އާ ހަމައަށް ހުޅުމާލޭގައި ހުންނަ އޮރެންޖް ހިޔާ ވަނީ އެކަމަށް ހުޅުވާލެވިފައެވެ.