ސައިބަރ ކްރައިމްގެ މައްސަލައެއްގައި 10 މީހަކު ހައްޔަރުކޮށްފި

މީހެއްގެ މީސް މީޑިއާ އެކައުންޓްތައް ހެކްކޮށް، އެ މީހާގެ ހިއްސާ އޮންނަ ކުންފުންޏެއްގެ ބޭންކު އެކައުންޓުން ގިނަ އަދަދެއްގެ ފައިސާ ވަގަށް ނެގި މައްސަލައެއްގައި ތުހުމަތުކުރެވޭ 10 މީހަކު ފުލުހުން ހައްޔަރުކޮށްފިއެވެ. ދިވެހި ފުލުހުންގެ ހިދުމަތުން މައުލޫމާތު ދީފައިވާ ގޮތުގައި، މި މައްސަލައަކީ މީހެއްގެ އަމިއްލަ މީސް މީޑިއާ އެކައުންޓްތަކުގެ ކޮންޓްރޯލް ހޯދުމަށްފަހު، އެ ކުންފުނީގެ އެކައުންޓުން 279,600 އަށްވުރެ ގިނަ ރުފިޔާ ނެގި މައްސަލައެކެވެ.

މި ފައިސާތައް ހޯދުމަށް ހިންގި ހާއްސަ އޮޕަރޭޝަން ފަށާފައިވަނީ މި މަހުގެ 21 ވަނަ ދުވަހުއެވެ. މި މައްސަލައިގައި ރާއްޖޭގެ އެކި ސަރަޙައްދުތަކުން މީހުން ހައްޔަރުކޮށްފައިވާއިރު، އޭގެ ތެރޭގައި ހިމެނެނީ ލ. އިސްދޫ މުހައްމަދު ހަސަން (59އ)، ސ. ހިތަދޫ ޢަލީ ޢިރުފާނު އަހުމަދުދީދީ (26އ)، ސ. ހިތަދޫ ޢަލީ ޝިރާޒު (38އ)، ހދ. ވައިކަރަދޫ ޢަބްދުﷲ ނާފިޛު (39އ)، ގއ. ކަނޑުހުޅުދޫ މުހައްމަދު އަލީ (42އ)، މާލޭގެ މުހައްމަދު ނުހާދު އަލީ (30އ)، ހއ. ކެލާ މުހައްމަދު ސިމާދު (38އ)، ގދ. ފިޔޯރީ އަލީ އިމްރާން (38އ)، ގދ. ތިނަދޫ އަބްދުﷲ އިސްރާގް (19އ) އަދި ކ. ހިންމަފުށީ މުހައްމަދު އިބްރާހީމް (49އ) އެވެ.

ފުލުހުންގެ ތަހުގީގުން ހާމަވެފައިވާ ގޮތުގައި، ހައްޔަރުކުރި މީހުންގެ ތެރެއިން 6 މީހަކީ މަކަރާއި ހީލަތުން ހޯދި ފައިސާ އެމީހުންގެ އަމިއްލަ އެކައުންޓްތަކަށް ޖަމާކޮށް، އެ ފައިސާ ނެގުމުގައި އަމަލީގޮތުން ބައިވެރިވި މީހުންނެވެ. މީގެ އިތުރުން، އެކަކު ވަނީ މި ފައިސާ އެކި ވިޔަފާރިތަކަށް ޓްރާންސްފާކޮށް މުދާ ގަތުމަށް ބޭނުންކޮށްފައެވެ. އަދި ބާކީ ތިބި 3 މީހުންނަކީ އެކި މީހުން އޭޓީއެމްތަކަށް ގެންގޮސް، އޮޅުވާލައިގެން ފައިސާ ނެގުވުމަށްފަހު އެ ފައިސާއާ ހަވާލުވި މީހުންނެވެ.

މި މީހުންގެ ތެރެއިން 3 މީހަކު އައްޑޫ ސިޓީން ހައްޔަރުކުރިއިރު، އެކަކު ހައްޔަރުކުރީ ކ. ހިންމަފުށިންނެވެ. ބާކީ ތިބި 6 މީހުން ހައްޔަރުކޮށްފައިވަނީ މާލެއިންނެވެ. މި މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ އެކި މުއްދަތުތަކަށް އެމީހުން ބަންދުކުރުމަށް އަމުރުކޮށްފައެވެ. އެގޮތުން މުހައްމަދު އިބްރާހީމަށް 5 ދުވަސް، މުހައްމަދު އަލީއާއި މުހައްމަދު ހަސަނަށް 7 ދުވަސް، އަލީ އިރުފާނަށް 10 ދުވަސް އަދި ބާކީ ތިބި 6 މީހުންނަށް 15 ދުވަހުގެ ބަންދުގެ މުއްދަތެއް ދީފައިވެއެވެ.

ގޭންގު ކްރައިމް ޔުނިޓާއި، ހިންމަފުށި އަދި އައްޑޫ ސިޓީ ފުލުހުން ގުޅިގެން ހިންގި މި އޮޕަރޭޝަންގެ މައްސަލަ މިހާރު އިތުރަށް ތަހުގީގު ކުރަމުންދަނީ ފުލުހުންގެ އެންޓި ސްކޭމް ސެންޓަރުންނެވެ.