ކާރިސާތަކުން ލިބޭ ގެއްލުންތައް ރިޕޯޓުކުރުމާއި ތަފާސްހިސާބު ބެލެހެއްޓުން ޑިޖިޓަލްކޮށްފި

ކާރިސާތަކުން ލިބޭ ގެއްލުންތައް ރިޕޯޓުކުރުމާއި ތަފާސްހިސާބު ބެލެހެއްޓުމުގެ މަސައްކަތް ހަރުދަނާކުރުމުގެ ގޮތުން، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން 'ޑެމޭޖް އެސެސްމަންޓް އެންޑް ލޮސް އެނަލިސިސް' (ޑާލާ) ޕޯޓަލް ރަސްމީކޮށް އިފްތިތާހްކޮށްފިއެވެ.

ހޮޓެލް ޖެންގައި ބޭއްވި މި ރަސްމިއްޔާތު ޝަރަފުވެރިކޮށްދެއްވީ ދަޚީލީ ސަލާމަތާއި ފަންނިއްޔާތާއި ބެހޭ ވަޒީރު ޢަލީ އިހުސާންއެވެ. މި ރަސްމިއްޔާތުގައި ދިފާޢީ ވަޒީރު ޣައްސާން މައުމޫން ވެސް ބައިވެރިވެވަޑައިގެންނެވިއެވެ.

ޔޫއެންޑީޕީގެ ފަންޑިންގް ވިންޑޯގެ ތެރެއިން ޑެންމާކް، ލަގްޒެމްބާގް އަދި ދެކުނު ކޮރެއާގެ އެހީތެރިކަމާއެކު ތަރައްޤީކޮށްފައިވާ މި ޕޯޓަލްއަކީ އެންޑީއެމްއޭގެ މަސައްކަތްތައް ޑިޖިޓަލައިޒްކޮށް، ކާރިސާތަކުގެ މައުލޫމާތު އެއްކޮށް ބެލެހެއްޓުމަށް ތަރައްޤީކޮށްފައިވާ މަންސައެކެވެ. މީގެ ކުރިން މެނުއަލްކޮށް ކުރަމުންދިޔަ ކާރިސާތަކުގެ ގެއްލުން ވަޒަންކުރުމުގެ މަސައްކަތް، މި ޕޯޓަލްގެ ސަބަބުން ފަސޭހަ، ރައްކާތެރި އަދި ގުޅިފައިވާ ޑިޖިޓަލް ނިޒާމަކަށް ބަދަލުވެގެންދާނެ ކަމަށް އެންޑީއެމްއޭއިން ބުނެއެވެ.

މި ޕޯޓަލް މެދުވެރިކޮށް އޮންލައިންކޮށް ކާރިސާތަކުގެ މަޢުލޫމާތު ކަމާގުޅޭ މުއައްސަސާތަކަށް ރިޕޯޓުކުރެވޭނެއެވެ. އަދި ލިބުނު ގެއްލުންތަކުގެ ހިސާބުކޮށް، ބަދަލު ދިނުމުގެ މަރުހަލާތައް ވެސް މި ނިޒާމުގެ ތެރެއިން ފުރިހަމަކުރެވޭނެ ކަމަށް އެންޑީއެމްއޭއިން ފާހަގަކުރެއެވެ. ވަޒީރު ޢަލީ އިޙްސާން ވިދާޅުވީ، މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ 'މޯލްޑިވްސް 2.0' ސިޔާސަތުގެ ތެރެއިން ކުރެވުނު މުހިންމު މަސައްކަތެއް ކަމަށެވެ. "ޑާލާ މެދުވެރުކޮށް ކާރިސާތަކަށް އިޖާބަދިނުމުގެ ބަދަލުގައި އެކަމަށް ތައްޔާރުވާން ފުރުޞަތު ލިބޭ. މިއީ މޯލްޑިވްސް 2.0 އެއް އަސާސް،" ވަޒީރު ވިދާޅުވިއެވެ.

އެންޑީއެމްއޭގެ ޗީފް އެގްޒެކެޓިވް ހިސާން ހަސަން ވިދާޅުވީ، މި ސިސްޓަމްގެ ހުރިހާ މަސައްކަތެއް މިހާރު ނިމި، ރަށްރަށުގައި މައުލޫމާތު އަޅާނެ ފަރާތްތަކަށް އެކްސެސް ދެވިފައިވާ ކަމަށެވެ. "ލޯންޗުކުރުމާއެކު މިއަހަރު މި ޕޯޓަލް މެދުވެރިކޮށް ލިބޭ ގެއްލުންތައް ވަޒަންކުރުމާއި އަދި އޭގެ އެހީ ފޯރުކޮށްދިނުމުގެ ހުރިހާ މަރުހަލާއެއް ކުރިއަށްދާނީ،" ހިސާން ވިދާޅުވިއެވެ. އަދި މި ނިޒާމުގެ ސަބަބުން ރައްޔިތުންގެ އިތުބާރު އެންޑީއެމްއޭގެ މަސައްކަތްތަކަށް އިތުރަށް ލިބިގެންދާނެ ކަމަށްވެސް އޭނާ ވިދާޅުވިއެވެ.

މީގެ އިތުރުން، އެންޑީއެމްއޭއިން ވަނީ ވޭތުވެދިޔަ 5 އަހަރުގެ ކާރިސާތަކުގެ މައުލޫމާތު ވެސް މިހާރު މި ޕޯޓަލްއަށް އަދާހަމަކޮށްފައެވެ. މީގެ ސަބަބުން ގެއްލުންވި ފަރާތްތަކަށާއި ކައުންސިލްތަކަށް، އަދި ގުޅުންހުރި އެހެނިހެން އިދާރާތަކަށް ހުރިހާ ތަފްސީލެއް އެއްތަނަކުން ފެންނަން ހުންނާނެ ކަމަށް އެ އޮތޯރިޓީން މައުލޫމާތުދެއެވެ.