ޑާލާ ޕޯޓަލްއަކީ މޯލްޑިވްސް 2.0ގެ ލަނޑުދަނޑިތައް ހާސިލްކުރުމަށް އެހީތެރިވެދޭ ޕޯޓަލެއް: ވަޒީރު އިޙްސާން

ޑާލާ ޕޯޓަލްއަކީ މޯލްޑިވްސް 2.0ގެ ލަނޑުދަނޑިތައް ހާސިލްކުރުމަށް އެހީތެރިވެދޭ ޕޯޓަލެއް ކަމަށް ދާޚިލީ ސަލާމަތާއި ފަންނީއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ ކާރިސާތަކުން ލިބޭ ގެއްލުންތައް ރިޕޯޓުކުރުމާއި ތަފާސްހިސާބު ބެލެހެއްޓުން ޑިޖިޓަލްކުރުމަށްޓަކައި، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެން.ޑީ.އެމް.އޭ) އިން ތައާރަފްކުރި 'ޑެމޭޖް އެސެސްމަންޓް އެންޑް ލޮސް އެނަލިސިސް' (ޑާލާ) ޕްލެޓްފޯމް އިފްތިތާހްކުރުމުގެ ރަސްމިއްޔާތުގައެވެ.

މި ރަސްމިއްޔާތުގައި ވާހަކަ ދައްކަވަމުން ވަޒީރު އިޙްސާން ވިދާޅުވީ، ޑާލާ ޕޯޓަލްއަކީ ޓެކްނޮލޮޖީގެ ނަޒަރުން ބަލާއިރު، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ޑިޖިޓަލައިޒް ތަޞައްވުރު 2.0 ރަމްޒުކޮށްދޭ މުހިންމު ވަސީލަތެއް ކަމަށެވެ. އަދި މި ތަޞައްވުރުގެ ދަށުން މުއައްސަސާތައް ޒަމާނީ ފެންވަރަށް ތަރައްޤީކޮށް، ޢާންމު ޚިދުމަތްތައް ފޯރުކޮށްދިނުމުގައި ޑިޖިޓަލް ވަސީލަތްތައް ބޭނުންކުރުމަކީ ސަރުކާރުގެ އަމާޒެއްކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވި ގޮތުގައި މި ޕްލެޓްފޯމް މެދުވެރިކޮށް ކާރިސާތަކުގެ ސަބަބުން ރަށްރަށާއި މުޖުތަމައުތަކަށް ކުރާ އަސަރުތައް ވަރަށް ސާފުކޮށް ދެނެގަނެވޭނެއެވެ. "މި ޕޯޓަލްގެ ސަބަބުން ސަރުކާރުގެ އިދާރާތަކަށް ޓާގެޓެޑް ރެސްޕޮންސް ސްޓްރެޓެޖީތައް އެކުލަވާލުމާއި، އިންވެސްޓްމަންޓްތަކަށް އިސްކަން ދިނުމާއި، ރިކަވަރީ އެކްޝަންތައް ރޭވުމަށް މަގު ފަހިވެގެންދާނެ،" ވަޒީރު ވިދާޅުވިއެވެ. މީގެ އިތުރުން، ޓެކްނޮލޮޖީގެ އެހީގައި ހަރުދަނާ ސިޔާސަތުތައް ނިންމުމާއި، ޖަވާބުދާރީ ކުރުވުމުގެ އިތުރުން ރައްޔިތުންގެ އިތުބާރު ބޮޑުވެގެންދާނެ ކަމަށްވެސް ވިދާޅުވިއެވެ.

ޑާލާ ޕްލެޓްފޯމަކީ ކާރިސާތަކުގައި ލިބޭ ގެއްލުންތައް ރިޕޯޓުކުރުން ޑިޖިޓަލްކޮށް، ހެކީގެ މައްޗަށް ބިނާކޮށް ނިންމުންތައް ނިންމުމުގެ ނިޒާމު ހަރުދަނާކުރުމަށް ފަރުމާކޮށްފައިވާ ގައުމީ ފެންވަރުގެ ޕްލެޓްފޯމެކެވެ. މީގެ ކުރިން މެނުއަލްކޮށް ކުރަމުންދިޔަ ގެއްލުން ވަޒަންކުރުމުގެ މަސައްކަތް މިހާރު އޮންލައިންކޮށް ކުރެވޭނެ އިންތިޒާމު މިވަނީ ހަމަޖެހިފައެވެ. މީގެ ސަބަބުން ލިބުނު ގެއްލުންތަކުގެ ހިސާބުތައް އޮޓޮމެޓިކުން ތައްޔާރުކުރެވި، މަސައްކަތުގެ ސައްހަކަން އިތުރުވެ އަވަސްވެގެންދާނެއެވެ.

މި މަސައްކަތަކީ އެން.ޑީ.އެމް.އޭގެ ސްޓްރެޓީޖިކް އެކްޝަން ޕްލޭނާ އެއްގޮތްވާ ގޮތުގެމަތިން ކުރިއަށްގެންދާ މަސައްކަތެކެވެ. މިއީ ރައީސުލްޖުމްހޫރިއްޔާ އިއުލާންކުރައްވާފައިވާ ޑިޖިޓަލް މޯލްޑިވްސް 2.0ގެ ލަނޑުދަނޑިތަކާ އެއްގޮތް، އަދި 'ސެންޑާއީ ފްރޭމްވޯކް ފޯ ޑިޒާސްޓަރ ރިސްކް ރިޑަކްޝަން' ފަދަ ބައިނަލްއަގުވާމީ އިލްތިޒާމުތަކަށް ބާރުދޭ މުހިންމު ފިޔަވަޅެކެވެ.

ޑާލާ ޕޯޓަލް ފަރުމާކުރުމުގެ މަސައްކަތް ކޮށްފައިވަނީ ޔޫ.އެން.ޑީ.ޕީގެ ފަންޑިން ވިންޑޯ މެދުވެރިކޮށް ޑެންމާކާއި ލަގްޒެމްބާގް އަދި ދެކުނު ކޮރެއާ ސަރުކާރުގެ އެހީތެރިކަމާއެކުގައެވެ. މި ޕޯޓަލްއާއެކު ރާއްޖެއަކީ ކާރިސާތަކަށް އިޖާބަދިނުމުގައި ވިލުންތެރި އަދި ހަރުދަނާ ނިޒާމެއް އޮތް ގައުމަކަށް ވެގެންދާނެ ކަމަށް ސަރުކާރުން އުންމީދު ކުރެއެވެ.