ފުޓްސަލް މުބާރާތުގެ ޗެމްޕިއަންކަން ހޯދި ޤައުމީ ފުޓްސަލް ޓީމަށް ރަސްމީކޮށް މަރުޙަބާ ދަަންނަވާނީ ރައީސް މުޢިއްޒު

ސާފް ފުޓްސަލް ޗެމްޕިއަންޝިޕްގައި ގައުމީ ފުޓްސަލް ޓީމުން ހޯދި ތާރީޚީ ކާމިޔާބީ ފާހަގަކުރުމަށް މާދަމާ ރޭ އާޓިފިޝަލް ބީޗްގައި ބާއްވާ ޚާއްޞަ ހަރަކާތުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ބައިވެރިވެވަޑައިގެން، ޓީމަށް ރަސްމީކޮށް މަރުހަބާ ދަންނަވާނެ ކަމަށް މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަނުން ހާމަކޮށްފިއެވެ.

ދެކުނު އޭޝިއާ ސަރަހައްދުގެ އެންމެ ފުރަތަމަ ފުޓްސަލް މުބާރާތުގެ ޗެމްޕިއަންކަން ރާއްޖެއިން ހޯދީ ކުޅުނު ހުރިހާ މެޗަކުން މޮޅުވެ، ސައްތައިންސައްތަ ރެކޯޑަކާ އެކުގައެވެ. މި ކާމިޔާބީ ފާހަގަކުރުމަށް ބާއްވާ ރަސްމިއްޔާތުގައި ރައީސް މުއިއްޒު ޓީމާ މުހާތަބުކޮށް ވާހަކަފުޅު ދައްކަވާނެ ކަމަށާއި، މި ހަރަކާތުގެ ތެރެއިން އުފާފާޅުކުރުމުގެ ގޮތުން ހަވާ އަރުވާނެ ކަމަށްވެސް މިނިސްޓްރީން ބުނެފައިވެއެވެ.

ޤައުމީ ފުޓްސަލް ޓީމު ރާއްޖެ އައުމަށް ހަމަޖެހިފައިވަނީ މާދަމާ ރޭ 7:45 ގައެވެ. ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލުގެ ވީއައިޕީން ޓީމަށް މަރުހަބާ ކިޔުމުގައި ސްޕޯޓްސް މިނިސްޓްރީގެ އިސްވެރިންނާއި އެފްއޭއެމްގެ އިސްވެރިން ބައިވެރިވެވަޑައިގަންނަވާނެއެވެ. އެއަށްފަހު ޓީމުގެ ކުޅުންތެރިންނާއި އޮފިޝަލުން އާޓިފިޝަލް ބީޗަށް ދިއުމަށް ހަމަޖެހިފައިވަނީ ޚާއްޞަ ލޮރީއެއްގައެވެ.

އާޓިފިޝަލް ބީޗުގައި ރައީސުލްޖުމްހޫރިއްޔާ ޓީމާ ބައްދަލުކުރައްވާނީ މާދަމާ ރޭ 10:00 ޖަހާއިރުއެވެ. މި ބައްދަލުކުރެއްވުމުގައި ޓީމުގެ ފަރާތުން ރައީސަށް މުބާރާތުގެ ތަށި ހަވާލުކުރުމާއި، ކުޅުންތެރިންނާއި އޮފިޝަލުންނާއެކު ގްރޫޕް ފޮޓޯ ނެގުން އޮންނާނެއެވެ. ރަސްމިއްޔާތު ނިންމާލުމަށް ހަމަޖެހިފައިވަނީ ޤައުމީ ސަލާމުންނެވެ.

މި ކާމިޔާބީގެ އަގުވަޒަންކުރުމުގެ ގޮތުން ރައީސް މުއިއްޒު ވަނީ ޤައުމީ ފުޓްސަލް ޓީމަށާއި، މިދިޔަ އަހަރުގެ ސެޕްޓެމްބަރު މަހު ލަންކާގައި ބޭއްވި ސައުތު އޭޝިއަން ސުޕަކަޕް ކާމިޔާބުކުރި ޤައުމީ ފުޓްބޯޅަ ޓީމަށް އިނާމު ފައިސާގެ ގޮތުގައި އެއް މިލިއަން ރުފިޔާ ދިނުމަށް ނިންމަވާފައެވެ. މިއީ ކުޅިވަރުގެ ދާއިރާއިން ރާއްޖެ ހޯދަމުންދާ ކާމިޔާބީތައް ފާހަގަކޮށް ކުޅުންތެރިންނަށް ހިތްވަރު ދިނުމުގެ ގޮތުން ސަރުކާރުން ކުރިއަށްގެންދާ ހަރަކާތެކެވެ.