އިންޑިއާގެ ޖުމްހޫރީ ދުވަހުގެ ތަހުނިޔާ ރައީސް މުޢިއްޒު ފޮނުއްވަވައިފި

އިންޑިއާގެ 77 ވަނަ ޖުމްހޫރީ ދުވަހުގެ މުނާސަބަތުގައި، އެ ޤައުމުގެ ރައީސާ ދުރޫޕަދީ މުރުމޫ އަށާއި ބޮޑުވަޒީރު ނަރެންދުރަ މޯދީއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަހުނީޔާ ފޮނުއްވައިފިއެވެ.

މި މުނާސަބަތުގައި ރައީސުލްޖުމްހޫރިއްޔާ ކުރެއްވި އެކްސް ޕޯސްޓެއްގައި، އިންޑިއާގެ ސަރުކާރަށާއި އެކުވެރި ރައްޔިތުންނަށް ދުވަހުގެ ހެޔޮއެދުންތަކާއި ތަހުނީޔާ ވަނީ ފޮނުއްވާފައެވެ. ރައީސްގެ މެސެޖުގައި ފާހަގަކުރެއްވި ގޮތުގައި، މި ދުވަހަކީ މިނިވަންކަމާއި، ޑިމޮކްރަސީ އަދި ހެޔޮވެރިކަމުގެ އުސޫލުތައް ދެމެހެއްޓުމަށް އިންޑިއާގެ ރައްޔިތުން ކުރާ މަސައްކަތް ވަރަށް ބޮޑަށް ރަމްޒުކޮށްދޭ ދުވަހެކެވެ.

މީގެ އިތުރުން، ރާއްޖެއާއި އިންޑިއާއާ ދެމެދު އޮތް ބަދަހި ގުޅުން އިތުރަށް ވަރުގަދަކުރުމަށް އެކުގައި މަސައްކަތް ކުރެއްވުމަށް އެދިވަޑައިގަންނަވާ ކަމަށް ރައީސް ވިދާޅުވިއެވެ. އަދި މި ގުޅުމުގެ ސަބަބުން ދެ ޤައުމުގެ ރައްޔިތުންގެ ލާބައާއި މަންފާއަށް ބޮޑެތި ކުރިއެރުންތަކެއް ލިބިގެންދާނެކަން އެމަނިކުފާނު ފާހަގަކުރެއްވިއެވެ.

Warmest greetings and best wishes to President HE Smt Droupadi Murmu @rashtrapatibhvn, Prime Minister HE Shri Narendra Modi @narendramodi, the government and the friendly people of India as they celebrate their 77th Republic Day.

This day strongly signifies the commitment of… pic.twitter.com/q84u5OBD5y

— Dr Mohamed Muizzu (@MMuizzu) January 26, 2026

ރައީސުލްޖުމްހޫރިއްޔާގެ މި ތަހުނީޔާގެ މެސެޖު ނިންމަވާލައްވާފައިވަނީ ދެ ޤައުމުގެ ދެމެދުގައި އޮތް ޒަމާންވީ ގާތް ގުޅުން ކުރިއަށް އޮތް ތަނުގައިވެސް ދެމިއޮންނާނެ ކަމުގެ އުންމީދު އާކުރައްވަމުންނެވެ.