ޝަހީދުޢަލީ ސްކޫލް ހުޅުވުމުގެ އެންމެ ފަހުގެ ތައްޔާރީތައް އެޗްޑީސީ އިން ކުރަނީ

ހުޅުމާލެ ދެވަނަ ފިޔަވަހީގައި އަލަށް ތަރައްޤީކޮށްފައިވާ "ޝަހީދު ޢަލީ" ސްކޫލް މާދަމާ ރަސްމީކޮށް ހުޅުވުމަށް ހުޅުމާލެ ޑިވެލޮޕްމެންޓް ކޯޕަރޭޝަން (އެޗްޑީސީ) އާއި ތަޢުލީމީ ވުޒާރާއިން އެންމެ ފަހުގެ ތައްޔާރީތައް ކުރަމުން އެބަގެންދެއެވެ.

މި ސްކޫލަކީ މި ސަރުކާރުން ތަރައްޤީކޮށް ހުޅުވާ ފުރަތަމަ ސްކޫލް ކަމަށްވާއިރު، ކިޔަވައިދިނުން ކުރިއަށް ގެންދިއުމަށް ހަމަޖެހިފައިވަނީ ދެ ދަންފަޅިއަށެވެ.

ތަޢުލީމީ ވުޒާރާއިން ހާމަކުރި ގޮތުގައި މި ސްކޫލްގައި ކިޔެވުމަށް މިހާތަނަށް 1,950 ދަރިވަރަކަށް ޖާގަ ދީފައިވެއެވެ. އަދި ސްކޫލްގެ ހިންގުމުގެ ކަންކަމަށް 230 މުވައްޒަފުން މިހާރު ވަނީ ނަގާފައެވެ. އާރްސީސީއާ ހަވާލުކޮށްގެން ތަރައްޤީކުރި މި ސްކޫލްގެ މަސައްކަތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވައިދެއްވީ 2023 ވަނަ އަހަރުގެ ޑިސެމްބަރު މަހުގައެވެ.

ސްކޫލް ހުޅުވުމުގެ ތައްޔާރީތައް ބައްލަވާލެއްވުމަށް ތަޢުލީމީ ވަޒީރު ޑރ. އިސްމާޢީލް ޝަފީޢު ވަނީ އެ ސްކޫލަށް ޒިޔާރަތް ކުރައްވާފައެވެ. ވަޒީރު ވިދާޅުވީ ސްކޫލް ހުޅުވާއިރު އެއްވެސް ދަތިކަމެއް ކުރިމަތިނުވާނެހެން ހުރިހާ އިންތިޒާމެއް ފުރިހަމަވެފައިވާ ކަމަށެވެ. "ދަރިވަރުންނަށް ދަތިކެއް ދިމާނުވާނެ ހެން މިހާރު ވަނީ ތައްޔާރުވެފައި. ކްލާސްރޫމްތަކާއި ފަރުނީޗަރުތައްވެސް ވަނީ ނިމިފައި. ލެބޯޓަރީތަކާއި ކޮމްޕިއުޓަރ ލެބްގެ މަސައްކަތްތައް ވަނީ ނިމިފައި،" ވަޒީރު ވިދާޅުވިއެވެ.

ޝަހީދު ޢަލީ ސްކޫލަކީ ފަސް ފަންގިފިލާއަށް، 50 ކްލާސްރޫމް ހިމެނޭހެން ތަރައްޤީކޮށްފައިވާ އިމާރާތެކެވެ. މި ސްކޫލްގައި މަލްޓިޕާޕަސް ހޯލަކާއި، ޓާފް ދަނޑެއްގެ އިތުރުން އިންޑޯ ކުޅިވަރުތައް ކުޅެވޭނެ އިންތިޒާމުތައް ވަނީ ޤާއިމުކޮށްފައެވެ. 1,500 ކުދިންގެ ޖާގައިގެ މި ސްކޫލްގައި ދެ ދަންފަޅިއަށް ކިޔަވައިދޭނަމަ 2,500 ކުދިންނަށް ކިޔެވޭނެ ކަމަށް ވުޒާރާއިން މަޢުލޫމާތުދެއެވެ.