ބަންގްލަދޭޝް ޔުނިވާސިޓީ އާއި މޯލްޑިވްސް ނޭޝަނަލް ޔުނިވާސިޓީއާ ދެމެދު އެއްބަސްވުމެއްގައި ސޮއިކޮށްފި

މަތީ ތަޢުލީމުގެ ދާއިރާއިން ގުޅުން ބަދަހިކުރުމަށާއި އެކި ދާއިރާތަކުން އެއްބާރުލުން ދިނުމާ ގުޅޭގޮތުން ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އާއި ބަންގްލަދޭޝް ޔުނިވަރސިޓީއާ ދެމެދު އެއްބަސްވުމެއްގައި ސޮއިކޮށްފިއެވެ.

 މި އެއްބަސްވުމުގައި ސޮއިކޮށްފައިވަނީ އެކަމަށްޓަކައި އެމްއެންޔޫގައި ބޭއްވި ޚާއްސަ ރަސްމިއްޔާތެއްގައެވެ.

މި އެއްބަސްވުމުގައި ގައުމީ ޔުނިވަރސިޓީގެ ފަރާތުން ސޮއިކުރެއްވީ ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމް އެވެ. ބަންގްލަދޭޝްގެ ފަރާތުން ސޮއިކުރެއްވީ ހައި ކޮމިޝަނަރ ޑރ. މުޙައްމަދު ނަޒްމުލް އިސްލާމް އެވެ. މި ރަސްމިއްޔާތުގައި ވާހަކަދައްކަވަމުން ހައިކޮމިޝަނަރު ވަނީ ބަންގްލަދޭޝްގެ މަޝްހޫރު ޔުނިވަރސިޓީތަކާއި އެމްއެންޔޫއާ ދެމެދު ފަހުމުނާމާތަކެއްގައި ސޮއިކުރުމުގެ މުހިންމުކަން ފާހަގަކުރައްވާފައެވެ.

ދިރާސާކުރުމާއި ޕީއެޗްޑީގެ ފުރުސަތުތައް
މި އެއްބަސްވުމުގެ ދަށުން އިންޖިނިއަރިންގ ސައިންސާއި އާކިޓެކްޗަރާ ގުޅުންހުރި ދާއިރާތަކުން މަތީ ތަޢުލީމު ނުވަތަ ޕީއެޗްޑީ ހާސިލުކުރުމުގެ ފުރުސަތުތައް ފަހިވެގެންދާނެއެވެ. މީގެ އިތުރުން، ޔުނިވަރސިޓީގެ އެކި ދާއިރާތަކުގައި މަސައްކަތްކުރާ މުވައްޒަފުންގެ ހުނަރާއި ޤާބިލުކަން އިތުރުކުރުމަށް ތަމްރީނު ޕްރޮގްރާމްތައް ހިންގުމަށް ވަނީ ރޭވިފައެވެ. މިފަދަ އެއްބަސްވުންތަކުގެ ސަބަބުން ދިރާސާކުރުމާއި، ތަމްރީނު ދިނުމާއި، ދަރިވަރުންނާއި މުދައްރިސުން ބަދަލުކުރުމުގެ ފުރުސަތުތައް ފަހިވެގެންދާނެކަމަށް ހައި ކޮމިޝަނަރ ވިދާޅުވިއެވެ.

ވައިސް ޗާންސެލަރ ޑރ. ޢާއިޝަތު ޝެހެނާޒް ވިދާޅުވީ، ބަންގްލަދޭޝްގެ ތަޖުރިބާކާރު މުދައްރިސުން ކުރު މުއްދަތަކަށް ގެނައުމަށާއި، ޚާއްޞަ ތަމްރީނު ޕްރޮގްރާމްތައް ހިންގުމަށް އެމްއެންޔޫއިން ޝައުގުވެރިވާ ކަމަށެވެ. އަދި ރާއްޖޭގެ އެކި ކަންކޮޅުތަކުގައި އެމްއެންޔޫގެ 21 މަރުކަޒެއް ހުރިއިރު، ގުޅިގެން ސެމިނާރުތަކާއި ކޮންފަރެންސްތައް ބޭއްވުމުގެ ފުރުސަތު ބޮޑުކަން ފާހަގަކުރެއްވިއެވެ.

ބެންގާލީ ބަސް އުނގަންނައިދޭ ކޯހެއް ތައާރަފުކުރުން
ރާއްޖޭގެ ފަތުރުވެރިކަމުގެ ދާއިރާއަށް އެހީތެރިވުމުގެ ގޮތުން ބެންގާލީ ބަސް އުނގަންނައިދޭ ކޯހެއް ތައާރަފުކުރުމަށް އެމްއެންޔޫއިން ގަސްދުކުރާކަން ވައިސް ޗާންސެލަރު ހާމަކުރެއްވިއެވެ. އަދި ރާއްޖޭގައި މަސައްކަތްކުރާ ބިދޭސީންނަށް ހުރި ގޮންޖެހުންތަކާ ގުޅޭގޮތުން ހެދި ދިރާސާތަކަށް އަލިއަޅުއްވާލައްވައި، ހޭލުންތެރިކަން އިތުރުކުރުމުގެ މަސައްކަތުގައި ބަންގްލަދޭޝްގެ އެހީތެރިކަމަށް އެދިވަޑައިގެންނެވިއެވެ.

ޝެހެނާޒް ވިދާޅުވީ، ދެ ޔުނިވަރސިޓީ ގުޅިގެން ކުރިއަށްގެންދާ ޕްރޮގްރާމްތަކާއި، ޖޮއިންޓް ރިސާރޗް ޕްރޮޖެކްޓްތަކުގެ އިތުރުން ފީލްޑް ސްޓަޑީޒްތަކުގެ ސަބަބުން ދެ މުއައްސަސާއަށްވެސް ބޮޑެތި ފައިދާތަކެއް ކުރާނެ ކަމަށެވެ. "މިއަދު ސޮއިކުރެވިގެންމިދިޔަ އެއްބަސްވުމުގެ ދަށުން އެކި ދާއިރާތަކުން މި ޔުނިވަރސިޓީގެ ދަރިވަރުންނަށްވެސް އެތައް ގޮތަކުން ފައިދާކުރާނެ. އޭގެތެރޭގަ އިންޖިނިއަރިން، ޓެކްނޮލޮޖީ، ބިޒްނަސް، ތިމާވެށި މިފަދަ ދާއިރާތަކުން ތަޢުލީމު ހާސިލުކުރާ ދަރިވަރުންނަށް ބޮޑެތި ފަސޭހަތަކެއް ލިބިގެންދާނެކަމަށް ގަބޫލުކުރެވޭ" ވައިސް ޗާންސެލަރ ވިދާޅުވިއެވެ.

މި ފަހުމްނާމާގެ ދަށުން ޔުނިވަރސިޓީތަކުގެ ދެމެދުގައި ތަޢުލީމީ ގޮތުންނާއި އިސްތިރާޖީ ގޮތުން މުހިންމު ދާއިރާތަކުން ގުޅުން ބަދަހިކުރުމަށް ވަނީ ހަމަޖެހިފައެވެ. އޭގެ ތެރޭގައި ބައިނަލްއަޤުވާމީ ގުޅުންތަކާއި، އިންޖިނިއަރިންގ ޓެކްނޮލޮޖީ، ވިޔަފާރި އަދި ތިމާވެށީގެ ދާއިރާ ހިމެނޭއިރު، މިއީ ދަރިވަރުންގެ ތައުލީމީ ފެންވަރު މަތިކުރުމަށް އެޅުނު މުހިންމު ފިޔަވަޅެއްގެ ގޮތުގައި އެމްއެންޔޫއިން ސިފަކުރެއެވެ.