ބަންކަރިންގެ ޚިދުމަތުން މިހާތަނަށް 1.5 މިލިޔަން ޑޮލަރުގެ އާމްދަނީއެއް : ވަޒީރު މުޙައްމަދު ސަޢީދު

އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެފައިވަނީ ބަންކަރިންގ ޚިދުމަތުން މިހާތަނަށް 1.5 މިލިއަން އެމެރިކާ ޑޮލަރުގެ އާމްދަނީއެއް ލިބިފައިވާ ކަމަށެވެ. ވަޒީރު މި މަޢުލޫމާތު ހާމަކުރެއްވީ "ހަފްތާ52" ގެ ނަމުގައި ގެނެސްދިން ޚާއްސަ ޕެނަލް ޑިސްކަޝަންގައި ވާހަކަފުޅު ދައްކަވަމުންނެވެ.

ވަޒީރު ސަޢީދު ވިދާޅުވި ގޮތުގައި، އިޤްތިޞާދު އޮތް ދަތި ހާލަތުގައިވެސް އަދި އޮފްޝޯ ފެސިލިޓީއެއްގެ ގޮތުގައި ބަންކަރިންގ ޚިދުމަތް ފަށައިގެން މިހާތަނަށް މި އަދަދުގެ އާމްދަނީއެއް އެސްޓީއޯއަށް ލިބިފައިވެއެވެ. މީގެ އިތުރުން، އިހަވަންދިއްޕޮޅުގައި ތަރައްޤީކުރާ މޯލްޑިވްސް އިކޮނޮމިކް ގޭޓުވޭގެ މަޝްރޫޢުގެ ދަށުން ބަނދަރު ހަދާނެ ފަރާތެއް މިހާރު ލިބިފައިވާ ކަމަށާއި، އިންޓަނޭޝަނަލް ފައިނޭންސިން ސެންޓަރު ޤާއިމްކުރުމުގެ މަސައްކަތްތައް ފަށާފައިވާ ކަމަށްވެސް ވަޒީރު ވިދާޅުވިއެވެ.

ބައިނަލްއަޤްވާމީ ބަންކަރިންގ ޚިދުމަތް އުތުރުގައި ފެށިފައިވަނީ މިއަހަރުގެ ސެޕްޓެމްބަރު 19 ވަނަ ދުވަހުއެވެ. މި ޚިދުމަތް ރާއްޖޭގައި ފޯރުކޮށްދެނީ އެސްޓީއޯއިންނެވެ. މި ޚިދުމަތް ދިނުމަށްޓަކައި އެސްޓީއޯއިން ވަނީ ގާތްގަނޑަކަށް 4000 ޓަނުގެ ތެޔޮ އުފުލޭ 2 ބޯޓު ރާއްޖެ ގެނެސްފައެވެ.

ސަރުކާރުން ލަފާކުރައްވާ ގޮތުގައި ބަންކަރިންގ ޚިދުމަތް ފެށުމުން އޭގެ ތެރެއަށް މުޅިން އަލަށް 400 މިލިއަން ޑޮލަރު ވަންނާނެއެވެ. މިއާއެކު 6 ބިލިއަން ދިވެހި ރުފިޔާގެ މުޅިން އައު ސިނާއަތެއް އުފެދޭނެ ކަމަށް ބެލެވެއެވެ.

ބަންކަރިންގއާ ގުޅިފައިވާ އެހެން ޚިދުމަތްތައް ދިނުމަށްޓަކައި މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ވަނީ އުތުރު މެރިޓައިމް ސަރވިސަސް ޤާއިމްކޮށްފައެވެ. މީގެ ތެރޭގައި ޕައިލޮޓޭޖް، ޑޮކިންގ، ކުރޫ ބަދަލުކުރުން އަދި މެއިންޓަނަންސްފަދަ މުހިންމު ޚިދުމަތްތައް ހިމެނެއެވެ. މި ޚިދުމަތްތަކަކީވެސް ރާއްޖޭގެ އިޤްތިޞާދަށް ބޭރު ފައިސާ ވަންނާނެ ދާއިރާތަކެއް ކަމުގައި ބެލެވެއެވެ.