ފިލިޕީންސްގައި 350 އަށްވުރެ ގިނަ މީހުންނާއެކު ދަތުރުކުރި ފެރީއެއް ބަންޑުން ޖަހާލައި 18 މީހުން މަރުވެއްޖެ

ފިލިޕީންސްގެ ދެކުނުގެ ޕްރޮވިންސެއް ކަމަށްވާ ބަސިލަން ކައިރިއަށް 350 އަށްވުރެ ގިނަ މީހުންނާއެކު ދަތުރުކުރި ފެރީއެއް ބަންޑުން ޖަހާލައި، މަދުވެގެން 18 މީހުން މަރުވެއްޖެ ކަމަށް އެ ގައުމުގެ އޮފިޝަލުން ކަށަވަރުކޮށްދީފިއެވެ.

މި ހާދިސާ ހިނގާފައިވަނީ ހޯމަ ދުވަހުގެ ރޭ މެންދަމުގެ ވަގުތެއްގައެވެ.

އެމް.ވީ ޓްރިޝާ ކާސްޓިން 3 ނަމަކަށް ކިޔާ މި އުޅަނދު ދަތުރުކުރަމުން ދިޔައީ ޒަމްބޮއަންގާ ސިޓީން ފުރައިގެން ސުލޫގެ ޖޯލޯ އައިލެންޑަށެވެ. ފިލިޕީންސް ކޯސްޓްގާޑުން ބުނި ގޮތުގައި، ރެކޯޑްތަކުން ދައްކާ ގޮތުގައި 332 ފަސިންޖަރުންނާއި 27 ފަޅުވެރިން ތިބި މި އުޅަނދުން އެހީއަށް އެދި ސިގްނަލް ފޮނުވާފައިވަނީ ހޯމަ ދުވަހުގެ ފަތިހު 1:50 ގައެވެ. މިއީ އެ އުޅަނދު ދަތުރު ފެށިތާ ގާތްގަނޑަކަށް ހަތަރު ގަޑިއިރު ފަހެވެ.

ކޯސްޓްގާޑުން މައުލޫމާތު ދޭ ގޮތުގައި ފެރީ އަޑިއަށް ގޮސްފައިވަނީ މޫސުން ރަނގަޅު ވަގުތެއްގައި، ބަސިލަން ޕްރޮވިންސްގެ ބަލޫކް-ބަލޫކް އަވަށާ ގާތްގަނޑަކަށް އެއް ނޯޓިކަލް މޭލު ބޭރުންނެވެ. މިހާތަނަށް 317 މީހުން ސަލާމަތް ކުރެވިފައިވާއިރު، 18 މީހަކު މަރުވެ، 24 މީހަކު އަދިވެސް ވަނީ ގެއްލިފައެވެ. ގެއްލުނު މީހުން ހޯދުމުގެ މަސައްކަތުގައި ނޭވީ އާއި އެއަރ ފޯސްގެ އެހީތެރިކަން ދަނީ ހޯދަމުންނެވެ.

ބަސިލަންގެ އެމަޖެންސީ ރެސްޕޮންޑަރުން ބުނި ގޮތުގައި ސަލާމަތްކުރެވުނު މީހުންގެ ތެރެއިން ސިއްހީ އެހީތެރިކަން ބޭނުންވާ މީހުން ވަނީ އިސަބެލާ ސިޓީގެ ހޮސްޕިޓަލަށް ގެންގޮސްފައެވެ. މެޑިކަލް އޮފިޝަލެއް ކަމަށްވާ ރޮނަލިން ޕެރޭޒް ވިދާޅުވީ، "މިވަގުތު އޮތް އެންމެ ބޮޑު ގޮންޖެހުމަކީ އެއްފަހަރާ ގިނަ އަދަދެއްގެ ބަލިމީހުން އަންނަމުންދިއުން، އަދި އަޅުގަނޑުމެންގެ މުވައްޒަފުން މިވަގުތު މަދުވުން" ކަމަށެވެ.

މިންޑަނާއޯގެ ކޯސްޓްގާޑް ކޮމާންޑަރު ދުއާ ވިދާޅުވީ ފެރީ އަޑިއަށް ދިޔަ ސަބަބު އަދި ސާފުނުވާ ކަމަށާއި، އެކަން ތަހުގީގު ކުރާނެ ކަމަށެވެ. އަދި އުޅަނދު ފުރުމުގެ ކުރިން ކޯސްޓްގާޑުން ޗެކްކުރި އިރު، އޯވަރލޯޑް ކޮށްފައިވާ ކަމުގެ އެއްވެސް ނިޝާނެއް ފެނިފައިނުވާ ކަމަށްވެސް އޭނާ ވިދާޅުވިއެވެ.

ފިލިޕީންސްގެ ރަށްތަކުގެ މެދުގައި ކަނޑުމަތީގެ މިފަދަ ހާދިސާތައް ހިނގުމަކީ އާންމު ކަމެކެވެ. މީގެ ސަބަބުތަކުގެ ތެރޭގައި ގިނައިން ތޫފާންތައް ކުރިމަތިވުމާއި، އުޅަނދުފަހަރު ރަނގަޅަށް މަރާމާތު ނުކުރުމާއި، އަދި ސަލާމަތީ ގަވާއިދުތަކަށް ފުރިހަމައަށް އަމަލުނުކުރުން ހިމެނެއެވެ.