ރޯދަމަހު ކިޔެވުން އޮންނާނީ ފުރަތަމަ ހަފްތާގައި އެކަނި

ބޯމަތިވެފައިވާ ރޯދަމަހު ސްކޫލްތަކުގެ ކިޔެވުން އޮންނާނީ ފުރަތަމަ ހަފްތާގައި އެކަނިކަމަށް، ތަޢުލީމީ ވުޒާރާއިން ހާމަކޮށްފިއެވެ.

މީލާދީ ކަލަންޑަރުގައިވާގޮތުން، މުލަރޯދަ ދުވަހަކީ މި އަންނަ ފެބުރުވަރީ މަހުގެ 18 ވާ ބުދަދުވަހެވެ. އެ ދުވަހާ ޖެހިގެން، ފެބުރުވަރީ 19ވާ ބުރާސްފަތި ދުވަސްވެސް ބަންދެވެ.

އަދި ތަޢުލީމީ ކަލަންޑަރުގައިވާގޮތުން އެ ހަފްތާގެ ހަފްތާ ބަންދަށްފަހު ފެބުރުވަރީ 22-26އަށް ސްކޫލްތަކުގައި ކިޔެވުން ކުރިޔަށްދާނެއެވެ. 

އެއަށްފަހު ޖެހިގެން އަންނަ ހަފްތާއަކީ ޓީޗަރުންގެ ޕްރޮފެޝަނަލް ޑިވެލޮޕްމެންޓަށް ޚާއްޞަކޮށްފައިވާ ދުވަސްތަކެއް ކަމުން، އެ ދުވަސްތަކުގައި ދަރިވަރުންގެ ކިޔެވުމެއް ނޯންނާނެއެވެ. އެއީ މާރިޗު 1-8އަށެވެ.

އަދި މާރިޗު 9ވަނަ ދުވަހަކީ ރޯދަ މަހުގެ ފަހު 10ގެ ފުރަތަމަ ދުވަސްކަމުން، އެ ދުވަހުން ފެށިގެން ސްކޫލްތައް ބަންދުކުރުމަށްފަހު ދެން ހުޅުވޭނީ ފިޠުރު ޢީދަށްފަހު މާރިޗު 23ގައެވެ. އެހެންކަމުން އެ މުއްދަތުގައި ދަރިވަރުންނަށް 24 ދުވަހުގެ ޗުއްޓީއެއް ލިބޭނެއެވެ.

މި އަހަރު އަންނަ ސްކޫލް ބަންދު އެހެނިހެން ދުވަސްތައް:

• ފުރަތަމަ ޓަރމުގެ މެދު-ބަންދު: 24 މޭ 2026 - 30 މޭ 2026
• ފުރަތަމަ ޓަރމުގެ ޗުއްޓީ: 17 ޖުލައި 2026 - 01 އޯގަސްޓު 2026
• ދެވަނަ ޓަރމުގެ މެދު-ބަންދު: 13 ސެޕްޓެމްބަރު 2026 - 19 ސެޕްޓެމްބަރު 2026
• ދެވަނަ ޓާމު ޗުއްޓީ: 18 ޑިސެމްބަރު 2026 - 12 ޖެނުއަރީ 2027

މި އަހަރުގެ ދިރާސީ އަހަރު ކިޔެވުން ފެށުމުގެ ކުރިން ތަޢުލީމީ ވުޒާރާއިން ވަނީ އެކަމަށް ދުރާލާ ތައްޔާރުވާން ފަށާފައެވެ. ޚާއްސަކޮށް ދަރިވަރުންނަށް ބޭނުންވާނެ ޓެކްސްޓް ފޮތްތައް ސްކޫލްތަކަށް ފޮނުވުމުގެ މަސައްކަތް މިދިޔަ ޑިސެމްބަރު މަހުގެ ތެރޭގައި ވަނީ ފަށާފައެވެ. އަދި މިހާރުވަނީ ސަރުކާރުގެ ސްކޫލްތަކަށް ޓެކްސްޓްފޮތްތައް ފޮނުވާ ނިންމާފައިވާކަމަށް ތަޢުލީމީ ވުޒާރާއިން ވަނީ ވިދާޅުވެފައެވެ. މީގެ އިތުރުން މުދައްރިސުން ހަމަކުރުމުގެ މަސައްކަތްވެސް ކުރައްވާފައިވާކަން ފާހަގަކޮށްލެވެއެވެ.