ދިރާސީ އައު އަހަރުގެ ތަހުނިޔާ މެޑަމް ސާޖިދާ ފޮނުއްވައިފި

މިއަދު ފެށުނު ދިރާސީ އައު އަހަރުގެ ތަހުނިޔާ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ފޮނުއްވައިފިއެވެ.

ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ދިރާސީ އައު އަހަރުގެ ހެޔޮ އެދުމާއި، ތަހުނިޔާ ފޮނުއްވާފައި ވަނީ އެކަމާއި  ގުޅިގެން މީސްމީޑިއާގައި ހިއްސާކުރެއްވި ޕޯސްޓެއްގައެވެ.

މި ޕޯސްޓުގައި ރައީސުލްޖުމްހޫރިއްޔާގެ އަނބިކަނބަލުން  ވަނީ، މި ފެށުނު ދިރާސީ އަހަރަކީ ކޮންމެ ކިޔަވާ ކުއްޖަކަށް ވެސް ފާގަތި، ބާއްޖަވެރި އަހަރަކަށް ވުން އެދި ދުޢާ ދަންނަވާފައެވެ. ހަމަ އެހެންމެ،  ދިރާސީ އައު އަހަރުގެ ހެޔޮ އެދުމާއި ތަހުނިޔާ ދަރިވަރުންނާއި ބެލެނިވެރިންނާއި ތަޢުލީމީ ދާއިރާގެ އެދުރުންނާއި ހިންގުންތެރިންނާއި އެހީތެރިންނަށް އަރިސްކުރައްވާކަމަށް އެކަމަނާ ވަނީ ވިދާޅުވެފައެވެ.

ކޮންމެ ކިޔަވާ ކުއްޖަކަށްވެސް މިއީ ފާގަތި، ބާއްޖަވެރި އަހަރަކަށް ވުން އެދި ހެޔޮ ދުޢާކުރަން. ދިރާސީ އައު އަހަރުގެ ހެޔޮ އެދުމާއި ތަހުނިޔާ ދަރިވަރުންނާއި ބެލެނިވެރިންނާއި ތަޢުލީމީ ދާއިރާގެ އެދުރުންނާއި ހިންގުންތެރިންނާއި އެހީތެރިންނަށް އަރިސްކުރަން. pic.twitter.com/ltS2o7FBY6

— First Lady Sajidha Mohamed (@sajidhaamohamed) January 27, 2026

ދިވެހިރާއްޖޭގެ ހުރިހާ ސްކޫލެއްގައި ކިޔެވުން މިއަދު ފަށާއިރު، މި އަހަރު ދަރިވަރުންނަށް ބޮޑު ޗުއްޓީ ލިބޭނީ ކުރިން އޮތްގޮތަށް ޑިސެމްބަރު މަހުއެވެ. އެގޮތުން ދަރިވަރުންގެ ބޮޑު ޗުއްޓީ ފެށޭނީ ޑިސެމްބަރު މަހުގެ 17 ވަނަ ދުވަހުގައެވެ. އަދި 2027 ވަނަ އަހަރުގެ ކިޔެވުން ފެށޭނީ ޖެނުއަރީ މަހުގެ 17 ވަނަ ދުވަހުއެވެ.

މިއަހަރުގެ ދިރާސީ އަހަރުގެ ކިޔެވުން ފަށާއިރު ސަރުކާރުގެ 218 އެއްހާ ސްކޫލްގައި 77،000 އަށް ވުރެ ގިނަ ދަރިވަރުން ތަޢުލީމު ހާސިލްކުރަމުން ދާނެކަމަށް ތަޢުލީމީ ވުޒާރާއިން ވަނީ ވިދާޅުވެފައެވެ.