އދ. އޮމަދޫގައި އަލަށް ތަރައްޤީކުރި "މަސްޖިދުއްރަޙުމާ" ރަސްމީކޮށް ހުޅުވައިފި

އދ. އޮމަދޫގައި އަލަށް ތަރައްޤީކޮށްފައިވާ މިސްކިތް، "މަސްޖިދުއްރަޙުމާ" ރަސްމީކޮށް ހުޅުވައިފިއެވެ.

އެރަށުގައި ބޭއްވުނު ޚާއްޞަ ރަސްމިއްޔާތެއްގައި މި މިސްކިތް ހުޅުވައިދެއްވީ އިސްލާމީ ކަންތައްތަކާ ބެހޭ ވުޒާރާގެ ސްޓޭޓް މިނިސްޓަރ އަލްއުސްތާޛް އަބްދުލް އަޒީޒް ޖަމާލް އަބޫބަކުރެވެ. މި މިސްކިތަކީ ހެޔޮއެދޭ ފަރާތަކުން އެ ރަށުގެ ރައްޔިތުންނަށްޓަކައި ބިނާކޮށްދީފައިވާ ރީތި މިސްކިތަކަށްވާއިރު، މި މިސްކިތް ހުޅުވުމަށް ބޭއްވި ރަސްމިއްޔާތުގައި ސްޓޭޓް މިނިސްޓަރުގެ އިތުރުން ރަށު ކައުންސިލްގެ އިސްވެރިންނާއި، ރަށުގެ ގިނަ ޢަދަދެއްގެ ރައްޔިތުން ބައިވެރިވިއެވެ. މި މިސްކިތް ހުޅުވުމާއެކު، އޮމަދޫގައި ނަމާދު ކުރާނެ ޖާގައިގެ ދަތިކަމަށް ބޮޑު ލުޔެއް ލިބިގެންދާނެއެވެ.

އދ. އޮމަދޫ އައު މިސްކިތް “މަސްޖިދުއްރަޙުމާ” ރަސްމީކޮށް ހުޅުވައިފި pic.twitter.com/KbFIypBKTz

— Ministry of Islamic Affairs (@MVIaffairs) January 26, 2026

އިސްލާމީ ކަންތައްތަކާ ބެހޭ ވުޒާރާއިިން ވިދާޅުވީ، މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އިސްލާމީ ދީނަށް ލޯބިޖެއްސުމާއި، މިސްކިތްތައް ބިނާކޮށް އާބާދުކުރުމަށް ދެއްވާ އަހައްމިއްޔަތުގެ ދަށުން ކުރިއަށްދިޔަ މުހިންމު މަސައްކަތެއް ކަމަށެވެ. މިސްކިތް ހުޅުވައިދެއްވުމަށްފަހު، ސްޓޭޓް މިނިސްޓަރު ވަނީ މިސްކިތް ބިނާކޮށްދެއްވި ފަރާތަށް ޝުކުރު އަދާކުރައްވައި، މިސްކިތުގެ ބޭނުން އެންމެ ހެޔޮގޮތުގައި ހިފުމަށް ރަށުގެ ރައްޔިތުންނަށް އިލްތިމާސްކުރައްވާފައެވެ.

ރާއްޖޭގެ އެކިކަންކޮޅުތަކުގައި ޢިމާރާތްކުރަން ފަށާފައިވާ މިސްކިތްތަކުގެ މަސައްކަތުގެ ދުވެލި އަވަސްކޮށް ވީހާވެސް އަވަހަށް މަޝްރޫޢުތައް ނިންމުމަށް ގިނަ މަސައްކަތްތަކެއް ކުރަމުން އަންނައިރު، ކުރިއަށް އޮތް ރަމަޟާން މަހުގެ ކުރިން 15 މިސްކިތެއް ހުޅުވުމަށް ތައްޔާރުވަމުންދާކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެފައިވެއެވެ.