50 ސްޓޯލާއެކު ހުޅުމާލޭގައި މާދަމާ "ރޯދަ ބާޒާރު" ފެށުމަށް ތައްޔާރުވެއްޖެ

50 ސްޓޯލާއެކު ހުޅުމާލޭގައި މާދަމާ "ރޯދަ ބާޒާރު" ފެށުމަށް ތައްޔާރުވެފައިވާކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވިދާޅުވެއްޖެއެވެ.

މިއީ މިއަހަރުގެ ރަމަޟާން މަހަށް ތައްޔާރުވުމަށް އެޗްޑީސީން ކުރަމުން އަންނަ މަސައްކަތްތަކުގެ ތެރެއިން ފާހަގަކޮށްލެވޭ މަސައްކަތެކެވެ.

އެޗްޑީސީން ވިދާޅުވީ، އެ ކުންފުންޏާއި ހައިރައިސް ގުޅިގެން މި ބާޒާރު ކުރިއަށްގެންދާނީ މާދަމާއިން ފެށިގެން އަންނަ ހޮނިހިރު ދުވަހުގެ ނިޔަލަށް، ކޮންމެ ދުވަހެއްގެ ހަވީރު 16:00 އިން 18:00 އަށް އަދި، ރޭގަނޑު 20:00 އިން 23:30 އަށް ހުޅުމާލޭ ސެންޓްރަލް ޕާކުގައި ކަމަށެވެ. އެގޮތުން، މި ބާޒާރުގައި ޖުމްލަ 50 ސްޓޯލް ބެހެއްޓުމަށް ހަމަޖެހިފައިވާއިރު، އެ ސްޓޯލްތަކުން ކައްކާ ތެއްޔާއި، ބަދިގޭގައި ހިފާ ގެންގުޅޭ ތަކެއްޗާއި، ގޭތެރެ ޒީނަތްތެރިކުރާ ތަކެއްޗާއި، އަންނައުނު، އަދި ހާޑްވެއާ ސާމާނުގެ އިތުރުން ކާބޯތަކެއްޗާއި އެހެނިހެން ތަކެތި ވެސް ލިބޭނެކަމަށް އެޗްޑީސީން މަޢުލޫމާތުދެއެވެ.

އެޗްޑީސީން އިތުރަށް ވިދާޅުވީ، މިއީ ރޯދައަށް ތައްޔާރުވުމަށް ކުރިއަށްގެންދާ ހަރަކާތްތަކުގެ ތެރެއިން، ގޭތެރެއަށް ބޭނުންވާ ތަކަތި ފަސޭހައިން އެއްތަނަކުން އަދި އަގުހެޔޮކޮށް ލިބޭނެ ގޮތް މަގުފަހިކުރުމަށް ކުރިއަށްގެންދާ ބާޒާރެއް ކަމަށެވެ.

ހުޅުމާލެއަކީ ހުރިހާ ޚިދުމަތެއް ވެސް ފަސޭހަކަމާއެކު ލިބެން ހުންނަ، އަދި ހިތްފަސޭހަ ތަނަކަށް ހެދުމަށް އެޗްޑީސީން އަބަދުވެސް އަންނަނީ މަސައްކަތް ކުރަމުންނެވެ.