އީ-މޯބިލިޓީއާ ގުޅޭ ޤައުމީ ފެންވަރުގެ މަސައްކަތު ބައްދަލުވުމެއް މިއަދު ފަށައިފި

އީ-މޯބިލިޓީ މޮނިޓަރިންގ، ރިޕޯޓިންގ އަދި ވެރިފިކޭޝަން  އާ ގުޅޭ ގޮތުން ދެ ދުވަހުގެ މުއްދަތަށް ކުރިއަށްގެންދާ ޤައުމީ ފެންވަރުގެ މަސައްކަތު ބައްދަލުވުމެއް މިއަދު ފަށައިފިއެވެ.

މި ބައްދަލުވުމަކީ ދެމެހެއްޓެނިވި ގޮތެއްގައި ދަތުރުފަތުރުގެ ނިޒާމު ބައްޓަންކުރުމަށް ބޭނުންވާ ޢިލްމާއި ހުނަރު، ކަމާބެހޭ ފަރާތްތަކަށް ފޯރުކޮށްދިނުމަށް ބާއްވާ ބައްދަލުވުމެކެވެ.

މި މަސައްކަތު ބައްދަލުވުން އިފްތިތާޙުކޮށްދެއްވުމުގެ ގޮތުން ވާހަކަފުޅު ދައްކަވަމުން، ފަތުރުވެރިކަމާ ތިމާވެށްޓާ ބެހޭ ވުޒާރާގެ ސްޓޭޓް މިނިސްޓަރު ފާއިޒް ވިދާޅުވީ، ރާއްޖެއިން މިހާރު މިސްރާބު ޖަހާފައިވަނީ ތިމާވެށްޓާ ރައްޓެހި، ސާފު އަދި ހަރުދަނާ ދަތުރުފަތުރުގެ ނިޒާމަކަށް ކަމަށެވެ. އެގޮތުން، މާލެއާއި ހުޅުމާލެ އަދި ވެލާނާ އިންޓަނޭޝަނަލް އެއާޕޯޓަށް ތަޢާރަފުކުރެވޭ އިލެކްޓްރިކް ޓެކްސީތަކުގެ މައްޗަށް އޭނާ ވަނީ އަލިއަޅުއްވާލައްވާފައެވެ.

ސްޓޭޓް މިނިސްޓަރުގެ ވާހަކަފުޅުގައި، ޖައްވަށް ބޭރުކުރާ ވިހަ ގޭސްތައް މަދުކުރެވޭ މިންވަރު ދެނެގަތުމަށާއި، މި ދާއިރާއިން ކުރެވޭ އިންވެސްޓްމަންޓްތަކަށް މަގުދެއްކުމަށްޓަކައި ހަރުދަނާ 'އެމް.އާރް.ވީ' ނިޒާމެއްގެ މުހިންމުކަން ވަނީ ފާހަގަކުރައްވާފަ އެވެ. ހަމަ އެހެންމެ، މިއީ މޫސުމަށް އަންނަ ބަދަލުތަކާ ގުޅޭ ސިޔާސަތުތައް އެކުލަވާލުމަށް ލިބޭ ބޮޑު ބާރެއް ކަމަށްވެސް ސްޓޭޓް މިނިސްޓަރ ވިދާޅުވިއެވެ.

މި މަސައްކަތު ބައްދަލުވުމުގައި ދުނިޔޭގެ އަދި ސަރަޙައްދީ ފެންވަރުގައި އީ-މޯބިލިޓީގެ އޮއިވަރު ހުރި ގޮތާއި، އިލެކްޓްރިކް އުޅަނދުތަކަށް ބަދަލުވުމަށް ބޭނުންވާ ސިޔާސީ އޮނިގަނޑުތަކާއި، އެމް.އާރް.ވީ އަށް ބޭނުންވާ މައުލޫމާތު އެއްކުރުމާ ގުޅޭގޮތުން ސެޝަންތައް ކުރިއަށްދާނެއެވެ. މީގެ އިތުރުން، ބައިވެރިންގެ މެދުގައި މަޝްވަރާ ބައްދަލުވުންތައް ވެސް ބޭއްވުމަށް ވަނީ ހަމަޖެހިފައެވެ.

މި ބައްދަލުވުން ކުރިއަށް ގެންދަނީ ޔޫ.އެން.އީ.ޕީ އާއި އޭޝިއަން އިންސްޓިޓިއުޓް އޮފް ޓެކްނޮލޮޖީ ގެ އެހީތެރިކަމާ އެކުގައެވެ.