ސަރުކާރުގެ ރޯދަ ހަދިޔާ: މިހާތަނަށް 12،274 މަސްދަޅުކޭސް ދޫކޮށްފި

ރަމަޟާން މަހުގެ ހަދިޔާގެ ގޮތުގައި ސަރުކާރުން ގޭބިސީތަކަށް ބަހާ މަސްދަޅު ކޭސްތަކުގެ ތެރެއިން، ގްރޭޓާ މާލެ ސަރަހައްދުގެ ގޭބިސީތަކަށް ރޭގެ ނިޔަލަށް 12،274 މަސްދަޅު ކޭސް ދޫކޮށްފިއެވެ. ސަރުކާރުގެ އަމާޒަކީ ރަމަޟާން މަސް ފެށުމުގެ ކުރިން ރާއްޖޭގެ ހުރިހާ ގޭބިސީއަކަށް މަސްދަޅު ކޭސް ބަހާ ނިންމުމެވެ.

ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާއިން ހާމަކުރި ގޮތުގައި، މާލެ ސަރަހައްދުގައި ރަޖިސްޓްރީ ކުރެވިފައިވާ 65،230 ޑޮމެސްޓިކް މީޓަރުގެ ތެރެއިން މިހާތަނަށް 18.8 ޕަސެންޓް ގޭބިސީއަށް ވަނީ މަސްދަޅު ކޭސް ހަވާލުކޮށްފައެވެ. ކޮންމެ ގޭބިސީއަކަށް ދޫކުރަނީ 48 ދަޅުގެ އެއް ކޭހެވެ. މާލެ ސަރަހައްދުގައި މަސްދަޅު ބެހުމުގެ މަސައްކަތް  ފަށާފައިވާއިރު، މިހާތަނަށް 12،274 މަސްދަޅުކޭސް ދޫކޮށްފައިވެއެވެ. 

މާލެ ސަރަހައްދުގައި މަސްދަޅު ދޫކުރާ މަރުކަޒުތައް
މާލެ އާއި ހުޅުމާލެ އަދި ވިލިމާލޭގައި މަސްދަޅު ދޫކުރުމަށް ގިނަ މަރުކަޒުތަކެއް ވަނީ ގާއިމްކޮށްފައެވެ. އެގޮތުން މާލޭގައި މިފްކޯ މަރުކަޒު، ސޯޝަލް ސެންޓަރު، އެމްޓީސީސީ ސޯމިލު، ހެންވޭރު ބޯޅަދަނޑު އަދި ގަލޮޅު ދަނޑުން މަސްދަޅު ދޫކުރަމުންދެއެވެ.

ހުޅުމާލެ ފޭސް 1 ގައި އުމަރު ޒާހިރު ބިލްޑިންގ، ޕޮލްކޯ ޓަވަރު އަދި މުހައްމަދު ގާސިމް ޕްރީސްކޫލުން މަސްދަޅު ދޫކުރާއިރު، ފޭސް 2 ގައި މަސްދަޅު ދޫކުރަނީ ކާމިލްދީދީ ސްކޫލް، ހިޔާ ޓަވަރު 10 އަދި އެމްޕީއެލް ޓަވަރު ޕީ އިންނެވެ. ވިލިމާލޭގައި މަސްދަޅު ދޫކުރުމުގެ މަސައްކަތް ކުރިއަށްދަނީ ވެމްކޯ ސައިޓުގައެވެ.

ސަރުކާރުން ހާމަކޮށްފައިވާ ގޮތުގައި މި ހަފްތާ ނިމުމުގެ ކުރިން ރާއްޖޭގެ ހުރިހާ އަތޮޅަކަށް މަސްދަޅު ކޭސްތައް ފޮނުވައި ނިންމާލެވޭނެއެވެ. މިއަހަރުގެ ރަމަޟާން މަސް ފެށުމުގެ ކުރިން ޖުމްލަ 118،673 މަސްދަޅު ކޭސް ބަހާ ނިންމުމަކީ ސަރުކާރުގެ ބޮޑު އަމާޒެކެވެ. މި މަސައްކަތުގައި ސަރުކާރުގެ ވުޒާރާތަކުގެ އިތުރުން ސަރުކާރު ހިއްސާވާ ބައެއް ކުންފުނިތަކުންވެސް އަންނަނީ އެހީތެރިކަން ފޯރުކޮށްދެމުންނެވެ.