ޣައްޒާގެ ރަފާ ބޯޑަރު 'ލިމިޓެޑް' ކޮށް ހުޅުވާލުމަށް އިސްރާއީލުން ނިންމައިފި

ޣައްޒާ އާއި މިސްރު ގުޅޭ ރަފާ ބޯޑަރު، އިސްރާއީލުގެ ފުރިހަމަ ބެލުމުގެ ދަށުން "ލިމިޓެޑް" ކޮށް ހުޅުވާލުމަށް އިސްރާއީލުން ނިންމައިފިއެވެ.

މި ނިންމުން އިއުލާނުކޮށްފައިވަނީ އެމެރިކާގެ ރައީސް ޑޮނަލްޑް ޓްރަމްޕްގެ ސުލްހައިގެ އެއްބަސްވުމުގެ ދަށުންނާއި، ޣައްޒާގައި ހައްޔަރުކޮށްފައި ހުރި އިސްރާއީލުގެ އެންމެ ފަހު އަސީރުގެ ހަށިގަނޑު ފެނިފައިވާ ދަނޑިވަޅެއްގައެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ހޯމަ ދުވަހު ބުނެފައިވަނީ، ޓްރަމްޕްގެ 20 ނުކުތާގެ ޕްލޭންގެ ދަށުން ރަފަހް ބޯޑަރު ހަމައެކަނި ހިނގާފައިދާ މީހުންނަށް ހުޅުވާލުމަށް އެއްބަސްވެފައިވާ ކަމަށެވެ. ނަމަވެސް، މިގޮތަށް ހުޅުވާލާނީ އިސްރާއީލުގެ ފުރިހަމަ އިންސްޕެކްޝަން މެކޭނިޒަމެއްގެ ދަށުން ކަމަށްވެސް އެ އޮފީހުން ބުންޏެވެ. ބޯޑަރު ހުޅުވާލުމުގެ ޝަރުތެއްގެ ގޮތުގައި އިސްރާއީލުން ހުށަހަޅާފައިވަނީ ދިރިތިބި ހުރިހާ އަސީރުން އަނބުރާ ގެނައުމާއި، މަރުވެފައިވާ އަސީރުން ހޯދުމަށް ހަމާސްއިން 100 އިންސައްތަ މަސައްކަތް ކުރުމެވެ.

މި އިއުލާނާ ގުޅިގެން އިސްރާއީލުގެ އަސްކަރިއްޔާއިން ބުނެފައިވަނީ، ޣައްޒާގެ އުތުރުގައި ހިންގި އޮޕަރޭޝަނެއްގައި އިސްރާއީލުގެ އެންމެ ފަހު ސިފައިންގެ މީހާ ކަމަށްވާ ރޭން ގްވިލީގެ ހަށިގަނޑު ފެނިފައިވާ ކަމަށެވެ. ނަމަވެސް އިސްލާމިކް ޖިހާދު ހަރަކާތުން ބުނެފައިވަނީ، އެ ހަށިގަނޑު އޮތް ތަން މީގެ ހަފުތާތަކެއް ކުރިން އިސްރާއީލަށް އަންގާފައިވާ ކަމަށާއި، އިސްރާއީލުން އެކަން ލަސްކުރީ ގަސްދުގައި ކަމަށެވެ.

ރިޕޯޓްތައް ބުނާގޮތުން، އިސްރާއީލުގެ މަގްސަދަކީ ޣައްޒާއަށް އެތެރެވާ މީހުންނަށްވުރެ ބޭރުވާ މީހުން ގިނަކޮށް، ފަލަސްތީނުގެ ރައްޔިތުން އެމީހުންގެ ބިމުން ބޭރުކޮށްލުމެވެ. 2024 ވަނަ އަހަރުގެ މޭ މަހު ރަފަހް ބޯޑަރު އިސްރާއީލުން ހިފި ފަހުން، އެތަނުގެ އިމާރާތްތައް ވަނީ ސުންނާފަތިކޮށްފައެވެ. މީގެ ސަބަބުން ޣައްޒާގެ ރައްޔިތުންނަށް، ހާއްސަކޮށް ބަލިމީހުންނަށް ބޭސްފަރުވާއަށް ބޭރަށް ދިއުމަށް ބޮޑެތި ހުރަސްތަކެއް ކުރިމަތިވެ، އިންސާނީ ބޮޑު ކާރިސާއެއް ވަނީ އުފެދިފައެވެ.

އިސްރާއީލުގެ ވައިނެޓް ނިއުސްއިން ރިޕޯޓްކޮށްފައިވާ ގޮތުގައި، ބޯޑަރު ހިންގުމުގެ އާ މޮޑެލްގެ ދަށުން ބޯޑަރު ބަލަހައްޓާނީ މިސްރުންނެވެ. އަދި ޔޫރަޕިއަން ޔޫނިއަންގެ މިޝަނަކުން މީހުން ދެނެގަތުމުގެ މަސައްކަތް ކުރާއިރު، އިސްރާއީލުން ކެމެރާ އާއި މޮނިޓަރިން ސިސްޓަމްތައް މެދުވެރިކޮށް ދުރުގައި ތިބެގެން މުޅި މަރުހަލާ ސުޕަވައިޒް ކުރާނެއެވެ.

ފަލަސްތީނުގެ ރައްޔިތުން ބިރުގަންނަނީ އިސްރާއީލުގެ މި އަމަލުތަކަކީ އެމީހުން ދާއިމީކޮށް ބިމުން ބޭރުކޮށްލުމަށް ރޭވޭ ރޭވުމެއްގެ ބައެއް ކަމަށެވެ. ޓްރަމްޕްގެ ސުލްހައިގެ އެއްބަސްވުމާ އިސްރާއީލުން ތަކުރާރުކޮށް ހިލާފުވަމުންދާ ކަމަށާއި، އެހީ ފޯރުކޮށްދިނުމަށް ހުރަސްއަޅައި އާންމުން މަރަމުންދާ ކަމަށްވެސް ރިޕޯޓްތައް ބުނެއެވެ.