ކުޅުދުއްފުށީ ރީޖަނަލް ހޮސްޕިޓަލުގައި އެކޮމޮޑޭޝަން ބްލޮކެއް ތަރައްޤި ކުރުމަށް، އެއްބަސްވުމެއްގައި ސޮއިކޮށްފި

ހދ. ކުޅުދުއްފުށީ ރީޖަނަލް ހޮސްޕިޓަލުގައި އެކޮމޮޑޭޝަން ބްލޮކެއް ތަރައްޤީ ކުރުމަށްޓަކައި ސަރުކާރުން އަލްޓެކް މޯލްޑިވްސްއާއެކު އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގައި ޞިއްޙީ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރ ޚަދީޖާ އަބްދުއްސަމަދު ޢަބްދުﷲ އެވެ. އަދި އަލްޓެކް މޯލްޑިވްސްގެ ފަރާތުން ސޮއިކުރެއްވީ އެ ކުންފުނީގެ ޖެނެރަލް މެނޭޖަރ ޙުސައިން ތަސްމީންއެވެ.

ކުޅުދުއްފުށީ ރީޖަނަލް ހޮސްޕިޓަލަކީ މާލޭގެ ހޮސްޕިޓަލްތައް ފިޔަވައި ރާއްޖޭގައި އެންމެ ގިނަ ބަޔަކު ޚިދުމަތް ހޯދާ އެއް ހޮސްޕިޓަލެވެ. ހއ، ހދ އަދި ށ. އަތޮޅުގެ ރައްޔިތުން ޚިދުމަތް ހޯދާ މި ހޮސްޕިޓަލުގައި މިހާރުވެސް 700 އެއްހާ މުވައްޒަފުން މަސައްކަތް ކުރަމުންދެއެވެ. އެހެންކަމުން، މި ހޮސްޕިޓަލުގެ ޚިދުމަތްތައް ހަރުދަނާކޮށް، ސްޕެޝަލިސްޓުންނާއި ސުޕަރ ސްޕެޝަލިސްޓުންގެ ޚިދުމަތް އިތުރުކުރުމަކީ ރާއްޖޭގެ ޞިއްޙީ ނިޒާމު ތަރައްޤީކުރުމަށް ސަރުކާރުން ދެއްވާ މުހިންމު އިސްކަމެކެވެ.

މަޝްރޫޢުގެ ދަށުން ގާއިމުކުރެވޭ ވަސީލަތްތައް
މި މަޝްރޫޢުގެ ދަށުން ތަރައްޤީކުރާ އައު އިމާރާތުގައި ޑަޔަލިސިސް ރޫމަކާއި، އިމަރޖެންސީ ރޫމަކާއި، މެޑިކަލް ސްޓޯރގެ އިތުރުން ޖެނެރަލް ސްޓޯރ، ނާސް ސްޓޭޝަން، އެޑްމިން ރޫމް އަދި ބްރީފިން ރޫމް ހިމެނޭނެއެވެ. މީގެއިތުރުން ނަމާދުކުރާ ކޮޓަރިއާއި މުވައްޒަފުންނަށް ބޭނުންވާ ކާ ކޮޓަރި ފަދަ އަސާސީ ވަސީލަތްތައްވެސް މި އިމާރާތުގައި ހިމެނޭނެ ކަމަށް ޞިއްޙީ ވުޒާރާއިން މަޢުލޫމާތު ދެއްވައެވެ.

މި މަޝްރޫޢާ ގުޅޭގޮތުން ޞިއްޙީ ވަޒީރު ޢަބްދުﷲ ނާޘިމް އިބްރާހީމް ވިދާޅުވީ، "މި އެއްބަސްވުމުގެ ދަށުން ބިނާކުރާ ފެސިލިޓީގައި 14 ޕްރައިވެޓް ރޫމް ހިމެނޭނެ. މި ކޮޓަރިތަކަކީ ބަލި މީހުންނާއި، އެހިތެރިންނަށް އެކުގައި ތިބޭވޭނެހެން، އެކަމަށް ބޭނުންވާ ފާޚާނާ ފަދަ ޒަރޫރީ ވަސީލަތްތަކާއި، ޒަމާނީ ފެންވަރަށް ފަރުމާކޮށްފައިވާ ކަންކަން ހިމެނިގެންދާނެ ތަންތަން." މީގެއިތުރުން، ޚާއްޞަ އެހީތެރިކަމަށް ބޭނުންވާ ފަރާތްތަކަށް ބޭނުންވާނެ ފެސިލިޓީތައްވެސް މިތަނުގައި ހިމެނޭނެ ކަމަށް ވަޒީރު ފާހަގަކުރެއްވިއެވެ.

އޭޝިއަން އިންފްރާސްޓްރަކްޗަރ އިންވެސްޓްމަންޓް ބޭންކުގެ ފަންޑުގެ އެހީގައި ކުރިއަށްގެންދާ މި މަޝްރޫޢަށް ސަރުކާރުން 53 މިލިޔަނަށްވުރެ ގިނަ ރުފިޔާ ޚަރަދު ކުރެއެވެ. މި މަސައްކަތަކީ ކުޅުދުއްފުށީ ރީޖަނަލް ހޮސްޕިޓަލް ޓާޝައަރީ ފެންވަރަށް ތަރައްޤީކުރުމަށް ކުރެވޭ މުހިންމު މަސައްކަތެކެވެ.

މި މަޝްރޫޢު ނިމުމުން، ހޮސްޕިޓަލުން ޚިދުމަތް ހޯދާ ފަރާތްތަކަށް ބޮޑެތި ލުއިފަސޭހަތަކެއް ލިބި، ޚިދުމަތުގެ ފެންވަރު އިތުރަށް ރަނގަޅުވެގެންދާނެ ކަމަށް ސަރުކާރުން އުންމީދު ކުރައްވައެވެ.