ބީއެމްއެލް ކްރެޑިޓް ކާޑުގެ ލިމިޓް އިތުރުކޮށްފި

ބޭންކް އޮފް މޯލްޑިވްސް (ބީއެމްއެލް) އިން ދޫކޮށްފައިވާ ކްރެޑިޓް ކާޑުތަކުން ރާއްޖެއިން ބޭރުގެ މުއާމަލާތްތައް ކުރެވޭ ލިމިޓް އިތުރުކުރުމަށް އެ ބޭންކުން ނިންމައިފިއެވެ.

 މި ބަދަލާއެކު ކޮންމެ ކަސްޓަމަރަކަށްވެސް އެމީހެއްގެ ކްރެޑިޓް ކާޑުގެ ބާވަތަށް ބަލައި ކުރިއަށްވުރެ އިތުރު އަދަދަކަށް ބޭރު ފައިސާގެ މުއާމަލާތްތައް ކުރެވޭނެއެވެ.

ބޭންކުން ހާމަކޮށްފައިވާ ގޮތުގައި، މި ގެނެވުނު ބަދަލަކީ ކޮންމެ ކަސްޓަމަރަކަށް ޑެބިޓް ކާޑުން ބޭނުންކުރެވޭ ގޮތަށް ހަމަޖައްސާފައިވާ ލިމިޓްގެ އިތުރުން، އެ ކަސްޓަމަރެއްގެ ކްރެޑިޓް ކާޑަށް ހަމަޖައްސާފައިވާ ލިމިޓެކެވެ. މީގެ ސަބަބުން ރާއްޖެއިން ބޭރުގެ ވިޔަފާރިތަކަށާއި އޮންލައިން ޕޭމަންޓްތަކަށް ކަސްޓަމަރުންނަށް ބޮޑު ލުޔެއް ލިބިގެންދާނެއެވެ.

ކާޑުތަކުގެ ލިމިޓަށް އައި ބަދަލުތައް
ކްރެޑިޓް ކާޑުގެ ލިމިޓަށް ގެނައި ބަދަލުތަކަށް ބަލާއިރު، ކްލެސިކް ކްރެޑިޓް ކާޑުގެ ލިމިޓް ވަނީ 750 ޑޮލަރުން 1400 ޑޮލަރަށް އިތުރުކޮށްފައެވެ. އަދި ގޯލްޑް ކްރެޑިޓް ކާޑުގެ ލިމިޓް 750 ޑޮލަރުން 1500 ޑޮލަރަށް ބޮޑުކޮށްފައިވާއިރު، ޕްލެޓިނަމް ކްރެޑިޓް ކާޑުގެ ލިމިޓް ވަނީ 1500 ޑޮލަރުން 3000 ޑޮލަރަށް އިތުރުކޮށްފައެވެ.

ބީއެމްއެލް އިން ބުނި ގޮތުގައި ކްރެޑިޓް ކާޑުން ކޮންމެ ކަސްޓަމަރަކަށް ރާއްޖެއިން ބޭރުގެ މުއާމަލާތްތައް ކުރުމަށް ކަނޑައަޅާފައިވާ މި އާ ލިމިޓްތަކަށް އަމަލުކުރަން ފަށާނީ 1 ފެބްރުއަރީ 2026 އިން ފެށިގެންނެވެ. މި ބަދަލަކީ ކަސްޓަމަރުންނަށް ބޭރު ފައިސާގެ މުއާމަލާތްތައް ކުރުމުގައި ދިމާވާ ދަތިތަކަށް ހައްލެއް ހޯދައިދިނުމުގެ ގޮތުން ގެނައި ބަދަލެކެވެ.