ކުރުދީ ޕާޓީތަކުގެ މެދުގައި އެއްބަސްވުމަކަށް ނާދެވި، އިރާގުގެ ރިޔާސީ އިންތިޚާބު ފަސްކޮށްފި

އިރާގުގެ ރައީސަކު އިންތިޚާބު ކުރުމަށްޓަކައި އެ ގައުމުގެ ޕާލަމެންޓުގައި ބޭއްވުމަށް ހަމަޖެހިފައި އޮތް ވޯޓުލުން، ކުރުދީ ދެ ޕާޓީގެ މެދުގައި ކެންޑިޑޭޓަކާ މެދު އެއްބަސްވުމަކަށް އައުމަށް އިތުރު ވަގުތު ދިނުމުގެ ގޮތުން ފަސްކޮށްފިއެވެ.

އިރާގު ނިއުސް އެޖެންސީ (އައި.އެން.އޭ) އިން ރިޕޯޓްކޮށްފައިވާ ގޮތުގައި، އަންގާރަ ދުވަހަށް ތާވަލުކުރި މި ވޯޓުލުން ފަސްކުރީ ކުރުދިސްތާން ޑިމޮކްރެޓިކް ޕާޓީ (ކޭ.ޑީ.ޕީ) އާއި ޕެޓްރިއޮޓިކް ޔޫނިއަން އޮފް ކުރުދިސްތާން (ޕީ.ޔޫ.ކޭ) ގެ އެދުމުގެ މަތިންނެވެ.

އިރާގުގައި އަމަލުކުރަމުންދާ ސިޔާސީ ނިޒާމުގެ ދަށުން، ބޮޑުވަޒީރުގެ މަގާމު ޝީއީ ބޭފުޅަކަށް، މަޖިލީހުގެ ރައީސްގެ މަގާމު ސުންނީ ބޭފުޅަކަށް، އަދި ރަމްޒީ ގޮތުން އޮންނަ ރައީސުލްޖުމްހޫރިއްޔާގެ މަގާމު ކުރުދީ ބޭފުޅަކަށް ޚާއްޞަކުރެވިފައިވެއެވެ. އާންމުގޮތެއްގައި ކުރުދީ ދެ ޕާޓީގެ މެދުގައި އޮންނަ އެއްބަސްވުމެއްގެ ދަށުން ރައީސްކަން ކުރައްވަނީ ޕީ.ޔޫ.ކޭގެ މެންބަރެކެވެ. ނަމަވެސް، މިފަހަރު ކޭ.ޑީ.ޕީ އިން ވަނީ އެ ޕާޓީގެ އަމިއްލަ ކެންޑިޑޭޓެއްގެ ގޮތުގައި ފޮރިން މިނިސްޓަރު ފުއާދު ހުސައިން ނެރުމަށް ނިންމާފައެވެ.

އަލްޖަޒީރާގެ ރިޕޯޓަރު ބަޣުދާދުން މައުލޫމާތު ދިން ގޮތުގައި، ކުރުދީ ޕާޓީތަކުން ނެރޭ ކެންޑިޑޭޓަކަށް ޕާލަމެންޓުގެ ޝީއީ އަދި ސުންނީ ބްލޮކްތަކުގެ ތާއީދު ލިބެންޖެހެއެވެ. އާ ރައީސަކު އިންތިޚާބުވުމުން، 15 ދުވަހުގެ ތެރޭގައި ބޮޑުވަޒީރަކު އައްޔަންކުރަން ޖެހޭނެއެވެ. ބޮޑުވަޒީރުގެ މަގާމަށް އަންނާނެ ކަމަށް ބެލެވެނީ ކުރީގެ ލީޑަރު ނޫރީ އަލް މާލިކީއެވެ.

އުމުރުން 75 އަހަރުގެ އަލް މާލިކީ ވަނީ 2006 އިން 2014 އަށް ދެ ދައުރު ބޮޑުވަޒީރުކަން ކުރައްވާފައެވެ. އޭނާއަކީ އީރާނާ ގާތް ގުޅުމެއް ބާއްވާ ބޭފުޅެއްގެ ގޮތުގައި ބެލެވޭއިރު، ޝީއީ ޕާޓީތަކުގެ އިއްތިހާދު "ކޯޑިނޭޝަން ފްރޭމްވޯކް" އިން ވަނީ އޭނާއަށް ތާއީދުކޮށްފައެވެ. ނަމަވެސް، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ އީރާނަށް ތާއީދުކުރާ ސަރުކާރެއް އިރާގުގައި އުފެދިދާނެތީ އެކަމުގެ އިންޒާރު ދެއްވާފައެވެ.

އެމެރިކާގެ މަންދޫބުން ފޮނުވި ސިޓީއެއްގައި ބުނެފައިވަނީ ބޮޑުވަޒީރަކު ހޮވުމަކީ އިރާގުގެ އަމިއްލަ ނިންމުމެއް ނަމަވެސް، އެމެރިކާގެ މަސްލަހަތުތަކަށް ބަލައި އާ ސަރުކާރާ މެދު އަމިއްލަ ގޮތްތަކެއް ނިންމާނެ ކަމަށެވެ. މާލިކީގެ އިއްތިހާދުން ގަބޫލުކުރާ ގޮތުގައި އެމެރިކާގެ ކަންބޮޑުވުންތަކަށް މާލިކީއަށް ހައްލު ހޯއްދަވައިދެއްވޭނެއެވެ. އިރާގަކީ ޒަމާނުއްސުރެ އެމެރިކާ އާއި އީރާނުގެ ނުފޫޒު އޮންނަ، އަދި އެ ދެ ގައުމުގެ ދެމެދުގައި ހަމަހަމަކަން ހިފެހެއްޓުމަށް މަސައްކަތްކުރާ ގައުމެކެވެ.