އިންޑިއާގެ ވެެސްޓް ބެންގާލް ސަރަހައްދުގައި ނިޕާ ވައިރަސް ފެތުރޭތީ ދަތުރުކުރައްވާ ބޭފުޅުން ސަމާލުވުމަށް އިލްތިމާސްކޮށްފި

އިންޑިއާގެ ވެސްޓް ބެންގާލް ސަރަހައްދުގައި ނިޕާ ވައިރަސް ފެތުރެމުންދާތީ، އެ ސަރަހައްދަށް ދަތުރުކުރާ ދިވެހިން ސަމާލުވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.

އެޗްޕީއޭއިން މިގޮތަށް އިލްތިމާސްކުރީ މި ހިނގާ ޖެނުއަރީ މަހުގެ ތެރޭގައި ވެސްޓް ބެންގޯލްއިން ނިޕާ ވައިރަސްގެ ތިން ކޭސްއެއް ފެނުމާ ގުޅިގެންނެވެ.

އެޗްޕީއޭއިން ނެރުނު ބަޔާނެއްގައި ވިދާޅުވީ، މި ވަގުތު ރާއްޖެއަށް މި ވައިރަސްގެ ނުރައްކާ އޮތް މިންވަރު ކުޑަ ނަމަވެސް، އިންޑިއާގެ ހާލަތު ވަރަށް ގާތުން މޮނިޓަރު ކުރަމުންދާ ކަމަށެވެ. އަދި ބަލި ފެނިފައިވާ ސަރަހައްދަށް ދަތުރުކުރާ ފަރާތްތަކުން ރައްކާތެރިކަމުގެ ފިޔަވަޅުތައް އެޅުމަކީ މުހިންމު ކަމެއް ކަމަށް އެ އެޖެންސީން ފާހަގަކުރައްވައެވެ.

ނިޕާ ވައިރަސްއަކީ ޓެރޯޕަސް އާއިލާގެ ވާލުންނާއި އޫރުގެ ފަރާތުން އިންސާނުންނަށް ފެތުރޭ ބައްޔެކެވެ. ވެސްޓް ބެންގޯލްއިން ފެނުނު ކޭސްތަކާ ގުޅިގެން 180 އަށްވުރެ ގިނަ މީހުން ކޮންޓެކްޓުންގެ ގޮތުގައި ފާހަގަކުރެވި، މިހާރު ވަނީ ކަރަންޓީނުކޮށްފައެވެ. ނަމަވެސް، އިންޑިއާގެ އެހެން ސަރަހައްދަކުން ނުވަތަ އެހެން ގައުމަކުންވެސް މި ބަލި ފެނިފައިވާ ކަމުގެ ރިޕޯޓެއް މިހާތަނަށް ލިބިފައެއް ނުވެއެވެ.

ރާއްޖޭގެ ހާލަތަށް ބަލާއިރު، މި ބައްޔާ ގުޅޭ އެއްވެސް ކޭސްއެއް ނުވަތަ ކޮންޓެކްޓެއް މިހާތަނަށް އެޗްޕީއޭއަށް ރިޕޯޓްކޮށްފައި ނުވާކަމަށް އެ އެޖެންސީން މައުލޫމާތު ދެއްވައެވެ.

ބަލީގެ އަލާމާތްތަކާއި ފަރުވާ

ނިޕާ ވައިރަސް ޖެހުމުން ފެންނަ އާންމު އަލާމާތްތަކުގެ ތެރޭގައި ހުން އައުން، ބޮލުގައި ރިއްސުން، ކެއްސުން، ކަރުގައި ރިއްސުން އަދި ނޭވާލާން އުނދަގޫވުން ހިމެނެއެވެ. ބަލި ބޮޑުވާ ހާލަތްތަކުގައި ސިކުނޑިއަށް އަސަރުކޮށް، ވާނުވާ ނޭނގުމާއި ފިޓުޖެހުން ފަދަ ނުރައްކާތެރި އަލާމާތްތައް ފެނުމަކީ އެކަށީގެންވާ ކަމެއް ކަމަށް އެޗްޕީއޭއިން ވިދާޅުވިއެވެ.

މި ބަލި ޖެހުމުން ބައެއް ފަހަރު އެއްވެސް އަލާމާތެއް ނުފެނިވެސް ހިނގައިދާނެއެވެ. ނިޕާ ވައިރަސްއަށް ވަކި ހާއްސަ ފަރުވާއެއް ނެތް ނަމަވެސް، ބަލީގެ ސަބަބުން ފެންނަ އަލާމާތްތަކަށް ފަރުވާ ކުރެވޭނެ ކަމަށް ސިއްހީ މާހިރުން ވިދާޅުވެއެވެ.