ފޮއްދޫ ޞިއްޙީ މަރުކަޒުގެ ފައުންޑޭޝަން މަސައްކަތުގެ 95 އިންސައްތަ ނިންމާލައިފި

ނ. ފޮއްދޫ ޞިއްޙީ މަރުކަޒުގެ ފައުންޑޭޝަން މަސައްކަތުގެ 95 އިންސައްތަ ނިންމާލައިފިއެވެ.

މި މަސައްކަތް ކޮންޓްރެކްޓްކޮށްފައިވާ، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ (އެމްޓީސީސީ)ގެ ފަރާތުން ހާމަކޮށްފައިވާ އަދާހަމަ މަޢުލޫމާތުން އެނގޭ ގޮތުގައި، އެ މަޝްރޫޢުގެ މަސައްކަތްތަކުގެ ތެރެއިން، ފައުންޑޭޝަންގެ ކޮންކްރީޓް މަސައްކަތުގެ %95 މިހާރު ވަނީ މިހާރު ނިމިފައެވެ. 

ފޮއްދޫ ސިއްޙީ މަރުކަޒުގެ ބިންގާ އަޅާފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނ. އަތޮޅަށް ކުރެއްވެވި ދަތުރުފުޅުގެ ތެރެއިން، 23 ޖުލައި 2025ގައެވެ. އެ ސިއްޙީ މަރުކަޒުގެ ބިންގާ އަޅުއްވާދެއްވީ ސިއްޙީ ވަޒީރު ޢަބްދުﷲ ނާޡިމް އިބްރާހީމެވެ.

ފޮއްދޫގައި ތަރައްޤީ ކުރަނީ 16 އެނދުގެ ސިއްޙީ މަރުކަޒެކެވެ. މިމަޝްރޫޢަކީ ސަރުކާރުން 26.8 މިލިޔަން ރުފިޔާ ޚަރަދުކޮށްގެން ކުރިއަށް ގެންދާ މަޝްރޫޢެކެވެ. މިމަޝްރޫޢު އެމްޓީސީސީއާ ހަވާލުކޮށްފައިވަނީ 360 ދުވަސް ތެރޭ ނިންމާ ގޮތަށެވެ.

_{ނ. ފޮއްދޫ ޞިއްޙީ މަރުކަޒުގެ މަސައްކަތް / ފޮޓޯ: އެމްޓީސީސީ}

ރާއްޖޭގައި ޞިއްޙީ ޚިދުމަތް ރަނގަޅުކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރައްވަމުންނެވެ. 

އެގޮތުން، ނ. އަތޮޅުގައި ވެސް ގިނަ މަސައްކަތްތަކެއް ފައްޓަވައި، މުހިންމު ޚިދުމަތްތަކެއް މިހާރު ވަނީ ދޭން ފަށާފައެވެ.

މީގެ ތެރެއިން ބައެއް ކަންކަމަށް ބަލާލާއިރު، އެ އަތޮޅު ވެލިދޫގައި މުޅިން އަލަށް ތަރައްޤީކުރާ ހޮސްޕިޓަލާއި، ނ. އަތޮޅު ހޮސްޕިޓަލުގެ އައު އިމާރާތުގެ ބިންގާ މިދިޔަ ޖުލައި މަހު ވަނީ އަޅާފައެވެ. 

އަދި ނ. ވެލިދޫގައި މިދިޔަ އެޕްރީލް މަހު ވަނީ ޑަޔަލިސިސްގެ ޚިދުމަތް ފަށާފައެވެ. މިއީ މާލޭގެ އިތުރުން މި ޚިދުމަތް ދޭން ފެށި 15ވަނަ ރަށެވެ.

މީގެ އިތުރުން ވެލިދޫ ޞިއްޙީ މަރުކަޒުންނާއި، ހޮޅުދޫ ޞިއްޙީ މަރުކަޒުން އަންނަނީ މިދިޔަ ނޮވެންބަރުން ފެށިގެން އެކްސްރޭގެ ޚިދުމަތް ވެސް ދެމުންނެވެ.

ނ. ކުޑަފަރީ ސިއްޙީ މަރުކަޒުގެ އައު އިމާރާތް ތަރައްޤީކުރުމަށާއި އެ އަތޮޅު މާފަރު ސިއްޙީ މަރުކަޒު އަޕްގްރޭޑް ކުރުމުގެ މަސައްކަތް ކުރުމަށް ވެސް މިދިޔަ ޖުލައި މަހު ވަނީ ކޮންޓްރެކްޓަރުންނާ ހަވާލުކޮށްފައެވެ.