މޫސުމަށް އަންނަ ބަދަލުތައް ކުޑަކުރުމަށް ހަދާ ޖެންޑަރ އެކްޝަން ޕްލޭންއާ ގުޅޭ މަސައްކަތު ބައްދަލުވުމެއް ބާއްވައިފި

މޫސުމަށް އަންނަ ބަދަލުތައް ކުޑަކުރުމަށް ހަދާ ޖެންޑަރ އެކްޝަން ޕްލޭންއާ ގުޅޭ މަސައްކަތު ބައްދަލުވުމެއް ބާއްވައިފިއެވެ. "މޫސުމަށް އަންނަ ބަދަލުތަކާ ގުޅޭ ޖެންޑަރ އެކްޝަން ޕްލޭން" އަކީ ދިވެހިރާއްޖޭގައި ފުރަތަމަ ފަހަރަށް އެކުލަވައިލާ މިފަދަ އެކްޝަން ޕްލޭންއެވެ. 

މި އެކްޝަންޕްލޭންއާ ގުޅޭގޮތުން މަޝްވަރާ ކުރުމަށް، ފަތުރުވެރިކަމާއި ތިމާވެއްޓާއި ބެހޭ ވުޒާރާއިން އިންތިޒާމުކޮށްގެން އިޖުތިމާޢީ އަދި އާއިލީ ތަރައްޤީއާ ބެހޭ ވުޒާރާއާއެކު ބޭއްވި މަސައްކަތު ބައްދަލުވުން ކުރިޔަށް ގެންގޮސްފައިވަނީ 26 ޖަނަވަރީ 2026 ވަނަ ދުވަހުއެވެ.

މި ވޯކްޝޮޕް ރަސްމީކޮށް އިފްތިތާޙުކޮށްދެއްވީ ފަތުރުވެރިކަމާއި ތިމާވެއްޓާއި ބެހޭ ވުޒާރާގެ ސްޓޭޓް މިނިސްޓަރ، އަލްފާޟިލް އިބްރާހީމް މިމްރާޙެވެ. މިނިސްޓްރ އޮފް ސްޓޭޓްގެ ވާހަކަފުޅުގައި، މޫސުމަށް އަންނަ ބަދަލުތަކުގެ ނޭދެވޭ އަސަރު ފޯރާ ދާއިރާތަކުގެ ތެރެއިން ޞިއްޙީ ދާއިރާ، ބިނާވެރި ކަމާއި މޫސުމީ ކާރިސާތަކުން ރައްކާތެރިވުމުގެ ދާއިރާ، ބޯހިޔާވަހިކަން އަދި އާމްދަނީ ހޯދުމަށް ކުރާ މަސައްކަތްތަކަށް ބަލާއިރު، މިންތީގެ ތަފާތުތަކުގެ ސަބަބުން ކުރިމަތިވާ ނުރައްކާތަކާއި ގޮންޖެހުންތައް ސާފުކޮށް ފެންނަން ހުރިކަމަށް ފާހަގަކުރެއްވިއެވެ.  

ހަމައެއާއެކު، އަންހެނުންނާއި ޙާއްސަ ސަމާލުކަމެއް ދޭންޖެހޭ ފަރާތްތަކުގައި ހުރި މުހިންމު އިލްމާއި، އަދި އިސްނެގުމުގެ ހުނަރުތައް، މޫސުމަށް އަންނަ ބަދަލުތަކާ ގުޅޭ ޕްލޭންތައް އެކުލަވައިލުމާއި އެކަންކަން ތަންފީޒުކުރުމުގައި އެންމެ އެދެވޭ ގޮތެއްގައި ހިފެމުން ނުދާކަން ފާހަގަ ކުރެއްވިއެވެ. 

އަދި ރާއްޖޭގެ ތިންވަނަ ނެޝަނަލީ ޑިޓަރމައިންޑް ކޮންޓްރިބިއުޝަންސް ނުވަތަ ރާއްޖޭގެ ކްލައިމެޓް އެކްޝަން ޕްލޭންގައި އަންހެނުން ބާރުވެރިކުރުވުމަށް ހަރަކާތްތަކެއް ފާހަގަކޮށްފައިވީ ނަމަވެސް، މޫސުމަށް އަންނަ ބަދަލުތަކާ ގުޅޭ ދައިރާތަކުން މީންތީގެ ހަމަހަމަކަން ކަށަވަރުކުރުމަށް ހާއްސަކޮށްގެން ހަދާ މިއީ ފުރަތަމަ ޕްލޭންކަންވެސް ފާހަގަ ކުރެއްވިއެވެ.

ފަތުރުވެރިކަމާއި ތިމާވެއްޓާއި ބެހޭ ވުޒާރާގެ ކްލައިމެޓް ޗޭންޖް ޑިޕާޓްމަންޓްއިން ތައްޔާރުކުރާ މި އެކްޝަން ޕްލޭނަކީ މޫސުމަށް އަންނަ ބަދަލުތަކުގެ އަސަރުތައް ކުޑަކުރުމަށާއި ހޭނުމުގެ ގޮތުން ރާވާ ރޭވުންތަކުގައި އަންހެނުންނާއި ފިރިހެނުންގެ ދައުރު ހަމަހަމަކޮށް ހިމެނުމަށް މަގުފަހިކޮށްދޭނެ މުހިންމު ޕްލޭންއަކަށްވާނެކަން ފާހަގަކުރެއްވިއެވެ.

މި މަސައްކަތު ބައްދަލުވުގައި، ސަރުކާރުގެ އެކި ވުޒާރާތަކުންނާއި، މަދަނީ ޖަމިއްޔާތަކުން އަދި އދ. ގެ އިދާރާތަކުން ބައިވެރިވިއެވެ. މި ބައްދަލުވުމުގެ ބައިވެރިން ވަނީ ރާއްޖޭގައި މޫސުމަށް އަންނަ ބަދަލުތަކުގެ ސަބަބުން މިންތީގެ ތަފާތުތަކަށް ބިނާކޮށް ކުރިމަތިވާ ނާޒުކު ހާލަތްތަކާ ގޮންޖެހުންތަކާއި ގުޅޭގޮތުން މަޝްވަރާކޮށް، އިސްކަންދޭނެ ދާއިރާތައް ކަންތައް އަލިއަޅުފާލާފައެވެ.

މި އެކްޝަން ޕްލޭން އެކުލަވައިލުމުގެ މަސައްކަތް ކުރިއަށްދަނީ " ނެޕް ގްލޯބަލް ނެޓްވޯކް (NAP Global Network) " ގެ ފަންނީ އެހީތެރިކަމާއެކުގައިކަމަށް ވެސް ފަތުރުވެރިކަމާއި ތިމާވެއްޓާއި ބެހޭ ވުޒާރާއިން ވަނީ ހާމަކޮށްފައެވެ.