މާލޭގެ އިތުރުން އަތޮޅުތެރޭގެ ރަށްތަކުގައި ވެސް މަސްދަޅު ކޭސް ބަހަން ފަށައިފި

ރޯދަ ހަދިޔާގެ ގޮތުގައި ސަރުކާރުން ކޮންމެ ގޭބިސީއަކަށް ދިނުމަށް ނިންމާފައިވާ މަސްދަޅު ކޭސް މާލޭގެ އިތުރުން އަތޮޅުތެރޭގެ ރަށްތަކުގައި ވެސް ބަހަން ފަށައިފިއެވެ.

ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާއިން ހާމަކޮށްފައިވާ ގޮތުގައި، މަސްދަޅު ކޭސް ބެހުމުގެ މަސައްކަތް ރަށްރަށުގައި މިހާރު ވަނީ ފަށާފައެވެ. އެގޮތުން ބައެއް ރަށްރަށުގައި މަސަދަޅު ކޭސް ބެހުމުގެ ނިމިފައިފައިވާކަމަށް ވެސް އެ ވުޒާރާއިން ހާމަކުރެއެވެ. 

ރަށްރަށުގައި ރޯދަ ހަދިޔާއަށް ދޭ މަސްދަޅު ކޭސްތައް ފޮނުވަން ފަށާފައި ވަނީ ހޯމަދުވަހުއެވެ. މިކަން ކުރިޔަށް ގެންދަނީ ސްޓޭޓް ޓްރެޑިންގ އޯގަނައިޒޭޝަން (އެސްޓީއޯ) މެދުވެރިކޮށެވެ. 

ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާ ބެހޭ ވުޒާރާއން ވިދާޅުވީ، ރަށްތަކުގައި ރޯދަ ހަދިޔާ ބެހުމުގެ މަސައްކަތް ކުރިއަށް ގެންދާނީ އެ ރަށެއްގެ ކައުންސިލުގެ ބެލުމުގެ ދަށުން ކަމަށެވެ. އެގޮތުން، މި އަހަރު ރޯދަ ހަދިޔާ ބެހުމަށް އެކުލަވައިލި ގޭބިސީ ލިސްޓުގައިވާ ގޮތުން ރަށްރަށާއި ސިޓީތަކުގެ ގޭބިސީގެ ޖުމުލަ ޢަދަދަކީ 56،918 އެވެ. އަދި ޑޮމެސްޓިކް މީޓަރގެ ޢަދަދަކީ 61،755 އެވެ.

ސަރުކާރުން ހާމަކޮށްފައިވާ ގޮތުގައި މި ހަފްތާ ނިމުމުގެ ކުރިން ރާއްޖޭގެ ހުރިހާ އަތޮޅަކަށް މަސްދަޅު ކޭސްތައް ފޮނުވައި ނިންމާލެވޭނެއެވެ. މިއަހަރުގެ ރަމަޟާން މަސް ފެށުމުގެ ކުރިން ޖުމްލަ 118،673 މަސްދަޅު ކޭސް ބަހާ ނިންމުމަކީ ސަރުކާރުގެ ބޮޑު އަމާޒެކެވެ. މި މަސައްކަތުގައި ސަރުކާރުގެ ވުޒާރާތަކުގެ އިތުރުން ސަރުކާރު ހިއްސާވާ ބައެއް ކުންފުނިތަކުންވެސް އަންނަނީ އެހީތެރިކަން ފޯރުކޮށްދެމުންނެވެ.